Pagkat-on Gikan sa Pulong Sa Diyos

Unsaon Nimo Pagpakigsuod sa Diyos?

Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Mamati ba ang Diyos sa tanang pag-ampo?

Gidapit ni Jehova ang tanang tawo sa pagduol kaniya sa pag-ampo. (Salmo 65:2) Apan dili tanang pag-ampo iyang pamation. Pananglitan, sa dihang ang mga Israelinhon nagpadayon sa ilang pagkadaotan, ang Diyos wala mamati sa ilang mga pag-ampo. (Isaias 1:15) Lain pa, kon ang bana magmaltratar sa iyang asawa, ang iyang mga pag-ampo mababagan o dili pamation. (1 Pedro 3:7) Sa laing bahin, ang Diyos mamati sa pag-ampo bisan sa hilabihan ka makasasala kon siya maghinulsol.—Basaha ang 2 Cronicas 33:9-13.

2. Unsaon nato pag-ampo?

Ang pag-ampo usa ka pribilehiyo ug bahin sa atong pagsimba, busa angayng kang Jehova lamang kita moampo. (Mateo 4:10; 6:9) Sanglit kita dili hingpit, kinahanglan tang moampo pinaagi sa ngalan ni Jesus kay siya mao ang tinudlong “dalan.” (Juan 14:6) Dili gusto si Jehova nga atong sublisublion ang sinag-ulo o sinulat nga mga pag-ampo kondili mag-ampo ta nga kinasingkasing.—Basaha ang Mateo 6:7; Filipos 4:6, 7.

Ang atong Maglalalang mamati gani sa hilom nga mga pag-ampo. (1 Samuel 1:12, 13) Siya nagdapit kanato sa pag-ampo sa tanang higayon, pananglitan sa atong pagbangon, pagkatulog, pagpangaon, ug kon duna kitay mga problema.—Basaha ang Salmo 55:22; Mateo 15:36.

3. Nganong angayng magkatigom ang mga Kristohanon?

Ang pagpakigsuod sa Diyos dili sayon kay kita nagkinabuhi taliwala sa mga tawong walay pagtuo sa Diyos ug nagbiaybiay sa iyang gisaad nga pakigdait sa yuta. (2 Timoteo 3:1, 4; 2 Pedro 3:3, 13) Busa kinahanglan tang magdinasigay uban sa atong isigkamagtutuo.—Basaha ang Hebreohanon 10:24, 25.

Ikaw makapakigsuod sa Diyos kon makighigala ka sa mga nahigugma Kaniya. Kon motambong ka sa mga tigom sa mga Saksi ni Jehova, ikaw madasig ug mapalig-on sa ilang pagtuo.—Basaha ang Roma 1:11, 12.

  4. Unsaon nimo pagpakigsuod sa Diyos?

Ikaw makapakigsuod kang Jehova pinaagi sa pagpamalandong sa imong nakat-onan gikan sa Bibliya. Palandonga ang iyang mga buhat, mga sugo, ug mga saad. Ang tim-os nga pagpamalandong makapalig-on sa imong pagpabili sa gugma ug kaalam sa Diyos.—Basaha ang Josue 1:8; Salmo 1:1-3.

Masuod ka sa Diyos kon ikaw may pagsalig ug pagtuo kaniya. Apan ang pagtuo samag buhing butang nga kinahanglang atimanon kanunay. Kinahanglan usab nga padayon nimong atimanon ang imong pagtuo pinaagi sa pagpamalandong sa imong nakat-onan.—Basaha ang 1 Tesalonica 5:21; Hebreohanon 11:1, 6.

5. Sa unsang paagi ka makabenepisyo sa pagpakigsuod sa Diyos?

Si Jehova nahingawa niadtong nahigugma kaniya. Siya nanalipod kanila batok sa bisan unsa nga makapameligro sa ilang pagtuo ug sa ilang paglaom sa kinabuhing walay kataposan. (Salmo 91:1, 2, 7-10) Siya nagpasidaan kanato batok sa mga buhat nga makadaot sa atong panglawas ug makapaguol kanato. Si Jehova nagtudlo kanato sa labing maayong paagi sa pagkinabuhi.—Basaha ang Salmo 73:27, 28; Santiago 4:4, 8.

Alang sa dugang impormasyon, tan-awa ang kapitulo 17 niining libroha, Unsay Tinuod nga Gitudlo sa Bibliya? nga gipatik sa mga Saksi ni Jehova.