Kita Magalakaw sa Ngalan ni Jehova Hangtod sa Kahangtoran!

“Kita . . . magalakaw sa ngalan ni Jehova nga atong Diyos hangtod sa panahong walay tino, bisan hangtod sa kahangtoran.”—MIQUEAS 4:5.

1. Unsang mga mensahe ang gihatag diha sa Miqueas mga kapitulo 3 hangtod sa 5?

 SI Jehova dunay isulti sa iyang katawhan, ug iyang gigamit si Miqueas ingong iyang manalagna. Katuyoan sa Diyos nga molihok batok sa mga mamumuhat ug daotan. Iyang pagasilotan ang Israel tungod sa iyang pagkaapostata. Apan, ikalipay nga panalanginan ni Jehova kadtong nagalakaw sa iyang ngalan. Tataw kining maong mga mensahe diha sa mga kapitulo 3 hangtod sa 5 sa tagna ni Miqueas.

2, 3. (a) Ang mga pangulo sa Israel angay untang magpakita sa unsang hiyas, apan unsa may ilang ginabuhat? (b) Unsaon nimo pagpatin-aw ang mahulagwayong sinultihan nga gigamit diha sa Miqueas 3:2, 3?

² Ang manalagna sa Diyos nagpahayag: “Patalinghog, palihog, kamong mga pangulo ni Jacob ug kamong mga komandante sa balay sa Israel. Dili ba inyong katungdanan ang pagkahibalo sa hustisya?” Oo, mao unta kanay ilang katungdanan, apan unsa may ilang ginabuhat? Miingon si Miqueas: “Kamong nagadumot sa maayo ug nahigugma sa pagkadaotan, nga naglaksi sa panit sa katawhan gikan kanila ug sa ilang unod gikan sa ilang mga bukog; kamo nga nagkaon usab sa unod sa akong katawhan, ug nagpanit kanila, ug naggupok sa ilang mga bukog, ug nagdugmok niini sama nianang anaa sa kawa ug sama sa unod sulod sa kulon.”—Miqueas 3:1-3.

³ Aw, ang mga pangulo nagdaogdaog sa kabos, walay-panalipod nga mga tawo! Ang mahulagwayong pinulongan nga gigamit dinhi dali rang masabtan niadtong nakadungog kang Miqueas. Sa dihang pabukalan ang giihaw nga karnero, kini panitan una ug dayon balibalion ang mga lutahan. Usahay buk-on ang mga bukog aron mogula ang utok. Ang unod ug mga bukog pabukalan diha sa usa ka dakong kawa, sama nianang gihisgotan ni Miqueas. (Ezequiel 24:3-5, 10) Pagkahaom nga ilustrasyon sa pagdaogdaog nga naeksperyensiyahan sa mga tawo sa adlaw ni Miqueas diha sa mga kamot sa ilang daotang mga pangulo!

Gidahom ni Jehova nga Kita Magpasundayag ug Hustisya

4. Unsay kalainan tali kang Jehova ug sa mga pangulo sa Israel?

⁴ Adunay dayag nga kalainan tali sa mahigugmaong Magbalantay nga si Jehova, ug sa mga pangulo sa Israel. Tungod kay wala sila magpasundayag ug hustisya, wala nila matuman ang gisugo kanila nga panalipdan ang panon. Hinunoa, sila mahakogong nagpahimulos sa mahulagwayong mga karnero, nga naghikaw kanila sa hustisya ug nagpailalom kanila sa “mga pag-ula ug dugo,” sumala sa giingon sa Miqueas 3:10. Unsay atong makat-onan gikan niining situwasyona?

5. Unsay gidahom ni Jehova niadtong nagapanguna sa iyang katawhan?

⁵ Gidahom sa Diyos nga ipasundayag ang hustisya niadtong nagapanguna sa iyang katawhan. Mao kiniy atong nakita nga nahitabo sa mga alagad ni Jehova karon. Dugang pa, kaharmonya kini sa Isaias 32:1, diin atong mabasa: “Tan-awa! Usa ka hari magahari alang sa pagkamatarong; ug mahitungod sa mga prinsipe, sila magmando ingong mga prinsipe alang sa hustisya.” Apan, unsay atong makita sa adlaw ni Miqueas? “Kadtong nagadumot sa maayo ug nahigugma sa pagkadaotan” nagpadayon sa pagtuis sa hustisya.

Kansang mga Pag-ampo ang Tubagon?

6, 7. Unsang hinungdanong punto ang gipasiugda sa Miqueas 3:4?

⁶ Ang daotan bang mga tawo sa panahon ni Miqueas makadahom sa pabor ni Jehova? Siyempre dili! Ang Miqueas 3:4 nag-ingon: “Sila magpakitabang  kang Jehova, apan siya dili motubag kanila. Ug iyang itago ang iyang nawong gikan kanila sa maong panahon, sumala sa ilang gihimong pagkadaotan sa ilang mga pagpakiglabot.” Nagpasiugda kini sa usa ka hinungdanon kaayong punto.

⁷ Dili tubagon ni Jehova ang atong mga pag-ampo kon kita nagpakasala. Tinuod kana kon kita nagkinabuhi ug dobleng pagkinabuhi, nga nagtago sa atong mga buhat nga daotan samtang nagpakaaron-ingnon nga nag-alagad sa Diyos nga matinumanon. Sumala sa Salmo 26:4, si David miawit: “Wala ako molingkod uban sa mga tawo sa kabakakan; ug dili ako mosulod uban niadtong magpakaaron-ingnon.” Labi nang dili tubagon ni Jehova ang mga pag-ampo niadtong tinuyo nga molapas sa iyang Pulong!

Gihatagan ug Gahom sa Espiritu sa Diyos

8. Ang bakak nga mga manalagna sa panahon ni Miqueas gipasidan-an sa unsa?

⁸ Pagkamakapasubong mga panggawi ang komon taliwala sa espirituwal nga mga pangulo sa Israel! Ang bakak nga mga manalagna nagpahinabo sa katawhan sa Diyos nga maglatagaw sa espirituwal. Ang dalo nga mga pangulo nagasinggit ug “Pakigdait!” apan sa pagkatinuod nagabalaan sa gubat batok ni bisan kinsa nga dili mopakaon kanila. “Busa,” nagaingon si Jehova, “mainyo ang kagabhion, mao nga walay panan-awon; ug mainyo ang kangitngit, aron walay pagpanag-an. Ug ang adlaw mosalop diha sa mga manalagna, ug ang adlaw mongitngit ibabaw kanila. Ug ang mga bisyonaryo mangaulaw, ug ang mga mananag-an mahigawad. Ug sila magtabon sa bigote.”—Miqueas 3:5-7a.

9, 10. Unsay kahulogan sa ‘pagtabon sa bigote,’ ug nganong si Miqueas dili angayng mobuhat niana?

⁹ Nganong ‘tabonan ang bigote’? Kini maoy buhaton sa daotang mga tawo sa panahon ni Miqueas tungod sa kaulaw. Ug kining daotang mga tawo angayng maulaw. “Walay tubag gikan sa Diyos,” sumala niining maong mga tawo. (Miqueas 3:7b) Si Jehova dili magpatalinghog sa mga pag-ampo ni bisan kinsang mapahitas-on nga mga daotan.

¹⁰ Si Miqueas dili angayng “magtabon sa bigote.” Wala siya maulaw. Gitubag ni Jehova ang iyang mga pag-ampo. Matikdi ang Miqueas 3:8, diin ang matinumanong manalagna nag-ingon: “Sa laing bahin, ako napuno sa gahom, pinaagi sa espiritu ni Jehova, ug sa hustisya ug pagkagamhanan.” Mapasalamaton gayod si Miqueas nga sulod sa iyang dugay ug matinumanon nga pagministeryo, siya kanunayng “napuno sa gahom, pinaagi sa espiritu ni Jehova”! Nakahatag kini kaniya ug kusog nga “isulti kang Jacob ang iyang pagsukol ug sa Israel ang iyang sala.”

11. Sa unsang paagi ang mga tawo mahatagan ug gahom sa pagmantala sa mga mensahe sa Diyos?

¹¹ Si Miqueas nagkinahanglan ug labaw pa kay sa kusog sa tawo aron sa pagmantala sa mensahe sa Diyos sa bug-at nga paghukom. Hinungdanon ang espiritu, o gamhanang aktibong gahom, ni Jehova. Komosta kita? Matuman lamang nato ang sugo nga mosangyaw kon si Jehova magpalig-on kanato pinaagi sa iyang balaang espiritu. Walay kapuslanan ang atong pagsangyaw kon kita tinuyong magpakasala. Nianang kahimtanga ang Diyos dili makatubag sa atong mga pag-ampo alang sa kalig-on sa paghimo niining buluhatona. Tino nga dili nato ikapahayag ang mga mensahe sa paghukom sa atong langitnong Amahan gawas kon ang “espiritu ni Jehova” maanaa kanato. Pinaagi sa mga pag-ampo nga gidungog ug uban sa tabang sa balaang espiritu, makasulti kita sa pulong sa Diyos nga maisogon sama kang Miqueas.

12. Nganong ang mga tinun-an ni Jesus kaniadto ‘nakapadayon sa pagsulti sa pulong sa Diyos uban ang bug-os nga kaisog’?

 ¹² Tingali nahinumdoman nimo ang asoy sa Buhat 4:23-31. Handurawa nga ikaw maoy usa sa unang-siglong mga tinun-an ni Jesus. Ang panatikong mga maglulutos naningkamot sa pagpahilom sa mga sumusunod ni Kristo. Apan kining maong mga maunongon nag-ampo sa ilang Soberanong Ginoo, nga naghangyo: “Jehova, hatagig pagtagad ang ilang mga hulga, ug itugot sa imong mga alagad ang pagpadayon pagsulti sa imong pulong uban ang bug-os nga kaisog.” Unsay resulta? Sa dihang sila nakapangamuyo na, ang dapit diin sila nagkatigom natay-og, ug silang tanan napuno sa balaang espiritu ug nanagsulti sa pulong sa Diyos uban ang kaisog. Busa hinaot nga kita mainampoong modangop kang Jehova ug mosalig sa iyang tabang pinaagi sa balaang espiritu samtang atong ginatuman ang atong ministeryo.

13. Unsay mahitabo sa Jerusalem ug Samaria, ug ngano?

¹³ Palandonga pag-usab ang adlaw ni Miqueas. Sumala sa Miqueas 3:9-12, ang sad-an-sa-dugo nga mga magmamando naghukom tungod sa hiphip, ang mga saserdote nagtudlo tungod sa suhol, ug ang bakak nga mga manalagna nanagna tungod sa salapi. Mao diay nga gisugo sa Diyos nga ang kaulohan sa Juda, ang Jerusalem, “mahimong tipun-og sa kagun-oban”! Tungod kay ang bakak nga pagsimba ug moral nga kadunotan kaylap usab sa Israel, si Miqueas giinspirar sa pagpasidaan nga himoon sa Diyos ang Samaria nga “usa ka tapok sa mga ginun-ob.” (Miqueas 1:6) Gani, ang manalagna nakalabang-buhi ug nakakita sa gitagnang kalaglagan sa Samaria sa mga kamot sa mga kasundalohan sa Asirya sa 740 W.K.P. (2 Hari 17:5, 6; 25:1-21) Dayag nga kining  gamhanang mga mensahe batok sa Jerusalem ug Samaria ikapahayag lamang pinaagi sa kusog ni Jehova.

14. Sa unsang paagi ang tagna nga nasulat sa Miqueas 3:12 natuman, ug sa unsang paagi kini nag-apektar kanato?

¹⁴ Ang Juda dili gayod makaikyas sa grabeng paghukom ni Jehova. Ingong katumanan sa tagna nga nasulat sa Miqueas 3:12, ang Zion “pagadarohon ingon sa usa lamang ka uma.” Sa atong panglantaw niining ika-21ng siglo, kita nahibalo nga kining mga butanga nahitabo sa dihang ang mga Babilonyanhon naggun-ob sa Juda ug Jerusalem sa 607 W.K.P. Nahitabo kini paglabay sa daghang katuigan human magtagna si Miqueas, apan segurado siya nga kini moabot. Tino nga kita angayng sama usab ka masaligon nga ang presenteng daotang sistema sa mga butang matapos sa gitagnang “adlaw ni Jehova.”—2 Pedro 3:11, 12.

Si Jehova Nagtul-id sa mga Butang

15. Sa imong kaugalingong mga pulong, unsaon nimo paghubit ang tagna nga nasulat diha sa Miqueas 4:1-4?

¹⁵ Agig paghinumdom, atong makita nga si Miqueas nagpahayag usab ug makapahinam nga mensahe sa paglaom. Pagkamakapadasig nga mga pulong ang atong makita diha sa Miqueas 4:1-4! Sa bahin, si Miqueas nag-ingon: “Mahitabo sa kaulahiang bahin sa mga adlaw nga ang bukid sa balay ni Jehova lig-ong matukod ibabaw sa tumoy sa kabukiran, ug kini igatuboy gayod ibabaw sa kabungtoran; ug nganha niini ang mga katawhan magaganayan. . . . Ug siya magahukom gayod taliwala sa daghang mga katawhan, ug magatul-id sa mga butang labot sa gamhanang mga nasod sa halayo. Ug ilang pagasalsalon ang ilang mga espada nga mga punta sa daro ug ang ilang mga bangkaw nga mga galab. Dili sila mobakyaw sa espada, nasod batok sa nasod, ni makakat-on pa sila sa gubat. Ug sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila; kay ang baba ni Jehova sa mga panon nagsulti niini.”

16, 17. Sa unsang paagi ang Miqueas 4:1-4 natuman karon?

¹⁶ Kinsa ang “daghang mga katawhan” ug ang “gamhanang mga nasod” nga gihisgotan dinhi? Dili sila mao ang mga nasod ug mga gobyerno niining kalibotana. Hinunoa, ang tagna mapadapat sa mga indibiduwal gikan sa tanang nasod kinsa nahiusa karon sa sagradong pag-alagad diha sa bukid ni Jehova sa matuod nga pagsimba.

¹⁷ Kaharmonya sa tagna ni Miqueas, ang hinlo nga pagsimba kang Jehova sa dili madugay pagabuhaton sa bug-os nga diwa sa tibuok yuta. Karon, ang mga tawo nga “hustong nakiling alang sa kinabuhing walay kataposan” ginatudloan sa mga dalan ni Jehova. (Buhat 13:48) Si Jehova nagahukom ug nagatul-id sa mga butang sa espirituwal nga paagi alang sa mga magtutuo nga mobarog dapig sa Gingharian. Sila makalabang-buhi sa “dakong kasakitan” ingong bahin sa “dakong panon.” (Pinadayag 7:9, 14) Tungod kay ila nang gisalsal ang ilang mga espada aron mahimong mga punta sa daro, bisan karon sila nagkinabuhi na nga malinawon uban sa mga isigka-Saksi ni Jehova ug sa uban. Pagkamakapalipay nga makauban nila!

Determinadong Molakaw sa Ngalan ni Jehova

18. Unsay gisimbolohan sa ‘paglingkod ilalom sa kaugalingong paras ug kahoyng igos’?

¹⁸ Sa atong adlaw, sa dihang ang mga tawo sa tibuok kalibotan mahadlokon kaayo, kita malipay nga daghan ang nakakat-on sa mga dalan ni Jehova. Nangandoy kita sa panahon nga haduol na sa dihang ang tanang mahigugmaon sa Diyos dili na makakat-on sa gubat kondili manglingkod ilalom sa ilang kaugalingong paras ug kahoyng igos. Ang mga kahoyng igos kasagarang itanom diha sa mga parasan. (Lucas 13:6) Ang paglingkod ilalom sa kaugalingong paras ug kahoyng igos nagsimbolo sa malinawon, mauswagon, ug may kasegurohan nga mga kahimtang. Bisan karon, ang atong relasyon kang Jehova naghatag kanatog kalinaw sa hunahuna ug espirituwal nga kasegurohan. Sa dihang ang maong mga kahimtang maglungtad ilalom sa pagmando sa Gingharian, kita dili na mahadlok ug bug-os nga adunay kasegurohan.

19. Unsay kahulogan sa paglakaw diha sa ngalan ni Jehova?

¹⁹ Aron matagamtam ang pag-uyon ug panalangin sa Diyos, kita kinahanglang molakaw sa ngalan ni Jehova. Kini puwersadong gipahayag diha sa Miqueas 4:5, diin ang manalagna nag-ingon: “Ang tanang mga katawhan, sa ilang bahin, magalakaw ang tagsatagsa sa ngalan sa iyang diyos; apan kita, sa atong bahin, magalakaw  sa ngalan ni Jehova nga atong Diyos hangtod sa panahong walay tino, bisan hangtod sa kahangtoran.” Ang paglakaw diha sa ngalan ni Jehova wala magpasabot ug pag-ingon lamang nga siya mao ang atong Diyos. Kini nagkinahanglan ug labaw pa kay sa atong pagpakigbahin diha sa Kristohanong mga tigom ug sa buluhatong pagsangyaw sa Gingharian, bisan tuod ang maong mga kalihokan hinungdanon usab. Kon kita nagalakaw sa ngalan ni Jehova, kita napahinungod ngadto kaniya ug naningkamot sa pag-alagad kaniya nga matinumanon tungod sa bug-os-kalag nga gugma. (Mateo 22:37) Ug ingong iyang mga magsisimba, tino nga kita determinado nga molakaw sa ngalan ni Jehova nga atong Diyos hangtod sa kahangtoran.

20. Unsay gitagna diha sa Miqueas 4:6-13?

²⁰ Karon palihog tagda ang matagnaong mga pulong sa Miqueas 4:6-13. Ang “anak nga babaye sa Zion” kinahanglang madestiyero “sa Babilonya.” Mao gayod kanay nahitabo sa mga molupyo sa Jerusalem sa ikapitong siglo W.K.P. Bisan pa niana, ang tagna ni Miqueas nagpakita nga ang usa ka nahibilin mobalik sa Juda, ug sa dihang mapasig-uli ang Zion, seguroon ni Jehova nga ang iyang mga kaaway mangadugmok.

21, 22. Sa unsang paagi natuman ang Miqueas 5:2?

²¹ Ang ubang tataw nga mga kaugmaran gitagna diha sa Miqueas kapitulo 5. Pananglitan, matikdi kon unsay giingon diha sa Miqueas 5:2-4. Si Miqueas nagtagna nga ang tinudlo-sa-Diyos nga Magmamando—ang usa “kansang kagikan maoy gikan pa sa unang kapanahonan”—mogula sa Betlehem. Siya magamando ingong magbalantay sa panon “diha sa kusog ni Jehova.” Dugang pa, kining maong Magmamando mahimong dako, dili lamang sa Israel, kondili hangtod sa “kinatumyan sa yuta.” Naglibog tingali ang kalibotan sa katibuk-an kon kinsa siya, apan siya dili misteryo alang kanato.

²² Kinsa ang labing hinungdanong persona nga natawo sukad sa Betlehem? Ug kinsa ang mahimong “dako hangtod sa mga kinatumyan sa yuta”? Walay lain kondili ang Mesiyas, si Jesu-Kristo! Sa dihang si Herodes nga Bantogan nangutana sa pangulong mga saserdote ug mga eskriba kon asa matawo ang Mesiyas, sila mitubag: “Sa Betlehem sa Judea.” Gikutlo pa gani nila ang giingon sa Miqueas 5:2. (Mateo 2:3-6) Ang ubang ordinaryong mga tawo nahibalo usab niini, kay ang Juan 7:42 nagkutlo kanila nga nag-ingon: “Dili ba ang Kasulatan nag-ingon nga ang Kristo magagikan sa kaliwat ni David, ug gikan sa Betlehem ang balangay diin didto si David?”

Tinuod nga Kahayahay Alang sa mga Tawo

23. Unsay nagakahitabo karon ingong katumanan sa Miqueas 5:7?

²³ Ang Miqueas 5:5-15 naghisgot sa pagsulong sa Asirya nga molampos lamang sa makadiyot ug nagpunting nga ang Diyos magpahamtang ug panimalos nganha sa dili-masinugtanong mga nasod. Ang Miqueas 5:7 nagsaad nga mapasig-uli ang mahinulsolong Hudiyo nga nahibilin ngadto sa ilang yutang natawhan, apan kining mga pulonga mapadapat usab sa atong adlaw. Si Miqueas nag-ingon: “Ang mga nahibilin ni Jacob mahimong sama sa yamog gikan kang Jehova sa taliwala sa daghang mga katawhan, sama sa dagayang ulan sa katanoman.” Kining maanindot nga simbolismo gigamit aron sa pagtagna nga ang nahibilin sa espirituwal nga Jacob, o Israel, mahimong gasa sa Diyos alang sa katawhan. Ang “ubang mga karnero” ni Jesus, kinsa adunay yutan-ong paglaom, malipay sa pag-alagad nga nahiusa uban sa modernong-adlaw nga nahibilin sa “Israel sa Diyos,” nga nagtabang sa paghatag ug kahayahay sa uban sa espirituwal nga paagi. (Juan 10:16; Galacia 6:16; Sofonias 3:9) Bahin niini, dunay hinungdanong punto nga angayng palandongon. Ingong mga magmamantala sa Gingharian, angayng mahalon natong tanan ang atong pribilehiyo sa pagdala ug tinuod nga kahayahay ngadto sa uban.

24. Unsang mga punto gikan sa Miqueas mga kapitulo 3 hangtod sa 5 ang nahinumdoman nimo?

 ²⁴ Unsay imong nakat-onan gikan sa mga kapitulo 3 hangtod sa 5 sa tagna ni Miqueas? Tingali ang mga punto nga sama niini: (1) Gidahom sa Diyos nga ipasundayag ang hustisya niadtong nagapanguna sa iyang katawhan. (2) Si Jehova dili motubag sa atong mga pag-ampo kon kita tinuyong magpakasala. (3) Matuman lamang ang sugo kanato nga mosangyaw kon palig-onon kita sa Diyos pinaagi sa iyang balaang espiritu. (4) Aron mabatonan ang pabor sa Diyos, kita kinahanglang molakaw sa ngalan ni Jehova. (5) Ingong mga magmamantala sa Gingharian, angay natong mahalon ang atong pribilehiyo sa pagdala ug tinuod nga kahayahay ngadto sa mga tawo. Tingali may nahinumdoman ka pang ubang mga punto. Unsa pay atong makat-onan gikan niining matagnaong basahon sa Bibliya? Ang sunod nga artikulo motabang kanato sa pagkuha ug praktikal nga mga leksiyon gikan sa nahibiling duha ka kapitulo sa makapalig-on-sa-pagtuo nga tagna ni Miqueas.

Unsaon Nimo Pagtubag?

• Unsay gidahom sa Diyos niadtong nagapanguna sa iyang katawhan?

• Nganong ang pag-ampo ug ang balaang espiritu hinungdanon maylabot sa atong pag-alagad kang Jehova?

• Sa unsang paagi ang mga tawo “magalakaw sa ngalan ni Jehova”?

[Mga Pangutana sa Pagtuon]

[Hulagway sa panid 15]

Ikapatin-aw mo ba ang ilustrasyon ni Miqueas bahin sa kulon?

[Mga hulagway sa panid 16]

Sama kang Miqueas, kita maisogong nagtuman sa atong ministeryo