Kang Kinsang mga Sukdanan ang Imong Masaligan?

Ang tawong mibisita sa Aprika sa unang higayon naikag sa pagkakita sa usa ka tawo nga nagtisar diha sa daplin sa dalan. Iyang namatikdan nga matag pipila ka minutos, ang tawo misagudsod sa iyang mga tiil ug miirog ug diyutay kaayo sa usa ka kilid samtang nagtisar gihapon. Sa ulahi lamang nga naamgohan sa bisita kon nganong ingon niana ang linihokan sa maong tao. Sa pagkatinuod, siya nagpatungod lamang sa landong sa poste sa telegrapo. Ang landong nag-irog ug diyutay samtang nagkasalop ang adlaw.

SAMA nianang landong sa poste sa telegrapo, ang mga kahikayan ug mga sukdanan sa tawo kanunayng nagbalhinbalhin ug nag-usab-usab. Sa kaatbang, si Jehova nga Diyos, ang “Amahan sa langitnong mga kahayag,” dili mausab. “Kaniya,” misulat ang disipulong si Santiago, “walay pagkausab sa pagbalhin sa landong.” (Santiago 1:17) Ang Hebreohanong manalagna nga si Malaquias nagsulat sa gipamulong mismo sa Diyos: “Ako si Jehova; ako dili mausab.” (Malaquias 3:6) Sa nasod sa Israel sa mga adlaw ni Isaias, ang Diyos miingon: “Bisan hangtod sa pagkatigulang sa usa ako mao gihapon Siya; ug hangtod sa pagkaubanon sa usa ako magpadayon sa pagpas-an. Ako molihok gayod.” (Isaias 46:4) Busa, ang paglabay sa panahon dili makapausab sa pagsalig nga atong mabatonan diha sa mga saad sa Labing Gamhanan.

Usa ka Pagtulon-an Gikan sa Balaod

Maingon nga ang mga saad ni Jehova kasaligan ug dili mausab, mao man usab ang iyang mga sukdanan sa kon unsay husto ug sayop. Mosalig ka ba sa usa ka negosyante nga mogamit ug duha ka matang sa timbangan, nga usa ra niana ang  tukma? Dili gayod. Sa susama, “ang usa ka timbangan nga limbongan maoy dulumtanan kang Jehova, apan ang eksaktong bato sa timbangan makapahimuot kaniya.” (Proverbio 11:1; 20:10) Sa Balaod nga gihatag niya sa mga Israelinhon, gilakip ni Jehova kining maong sugo: “Dili kamo maghimog inhustisya sa paghukom, sa pagsukod, sa pagtimbang o sa pagsukod sa mga likido. Kinahanglan nga magbaton kamo ug tukmang timbangan, tukma nga mga bato sa timbangan, tukma nga ephah ug tukma nga hin. Ako mao si Jehova nga inyong Diyos, nga nagpagawas kaninyo gikan sa yuta sa Ehipto.”—Levitico 19:35, 36.

Tungod sa pagsugot nianang sugoa ang mga Israelinhon nakaangkon sa pag-uyon sa Diyos maingon man sa daghang materyal nga mga benepisyo. Sa susama, ang pagsunod sa dili-mausab nga mga sukdanan ni Jehova, dili lamang sa mga timbangan ug mga sukdanan kondili sa tanang bahin sa kinabuhi, moresulta sa mga panalangin alang sa mga magsisimba nga nagasalig kaniya. Ang Diyos nag-ingon: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan.”—Isaias 48:17.

Nganong Nagakaus-os ang mga Sukdanan Karon?

Gipunting sa Bibliya ang rason kon nganong nagakaus-os ang mga sukdanan karon. Ang kataposang basahon sa Bibliya, ang Pinadayag, nagbatbat bahin sa usa ka gubat didto sa langit, nga ang sangpotanan niana nakaapektar sa tanang tawo hangtod karon. Si apostol Juan misulat: “Miulbo ang gubat sa langit: Si Miguel ug ang iyang mga manulonda nakiggubat sa dragon, ug ang dragon ug ang mga manulonda niini nakiggubat apan kini wala makadaog, ni may dapit pa alang kanila sa langit. Busa gitambog ang dakong dragon, ang orihinal nga halas, ang usa nga gitawag Yawa ug Satanas, nga nagpahisalaag sa tibuok gipuy-ang yuta; siya gitambog sa yuta, ug ang iyang mga manulonda gitambog uban kaniya.”—Pinadayag 12:7-9.

Unsa ang dihadihang epekto nianang maong gubat? Si Juan mipadayon: “Tungod niini, paglipay kamong kalangitan ug kamong nanagpuyo niini! Alaot ang yuta ug ang dagat, tungod kay ang Yawa nanaog kaninyo, nga may dakong kasuko, kay nahibalo nga hamubo na lamang ang iyang panahon.”—Pinadayag 12:12.

Ang ‘pagkaalaot sa yuta’ nahitabo sa dihang miulbo ang Gubat sa Kalibotan I sa 1914 ug nagtapos sa yugto diin ang mga sukdanan lahi kaayo nianang sa atoa karon. “Ang Dakong Gubat sa 1914-18 samag usa ka utlanan nga nag-ulang nianang panahona gikan sa atoa,” matod sa historyanong si Barbara Tuchman. “Kay mihunos ug daghan kaayong kinabuhi nga mahimo untang mapuslanon ug mabungahon sa misunod nga katuigan, migun-ob ug mga tinuohan, nag-usab sa mga ideya, ug nagbilin ug dili-maalim nga mga samad sa kalugda, kana nagmugna ug pisikal maingon man sikolohikanhon nga bung-aw tali sa duha ka yugto sa panahon.” Ang laing historyano nga si Eric Hobsbawm miuyon: “Sukad sa 1914 dihay namatikdan nga pag-us-os sa mga sukdanan nga giisip kaniadtong normal diha sa naugmad nga mga nasod . . . Dili daling sabton ang ikasubong nagkagrabe nga gilapdon sa pagbalik ngadto sa gitawag sa atong ikanapulog-siyam-nga-siglo  nga mga katigulangan nga mga sukdanan sa barbarismo.”

Sa iyang librong Humanity—A Moral History of the Twentieth Century, ang awtor nga si Jonathan Glover nag-ingon: “Ang usa ka timailhan sa atong panahon mao ang nagakahanaw nga balaod sa moralidad.” Bisan tuod maduhaduhaon siya sa moral nga balaod gikan sa gawas nga tinubdan tungod sa pagkahuyang sa relihiyon sa Kasadpanhong kalibotan, siya nagpasidaan: “Kadtong dili motuo sa relihiyosong balaod sa moral kinahanglang mabalaka gihapon sa pagkahanaw niini.”

Ang presenteng-adlaw nga pagbudhi—kaha sa komersiyo, politika, o relihiyon o bisan diha sa personal ug pamilyahanong mga relasyon—ug ang makalilisang nga mga sangpotanan maoy bahin sa daotang laraw sa Yawa sa pagpahinabo ug kaalaot sa mga molupyo sa yuta. Si Satanas determinadong makiggubat hangtod sa kataposan ug madala niya sa pagkalaglag kadtong tanan nga naningkamot sa pagkinabuhi sumala sa mga sukdanan sa Diyos.—Pinadayag 12:17.

Duna bay lutsanan, usa ka solusyon sa kaylap nga pagbudhi? Si apostol Pedro mitubag: “Adunay bag-ong mga langit ug usa ka bag-ong yuta nga atong ginapaabot sumala sa saad [sa Diyos], ug niini magpuyo ang pagkamatarong.” (2 Pedro 3:13) Masaligan nato ang maong saad tungod kay dili lang kay ang Diyos dunay gahom sa pagpalampos sa iyang katuyoan kondili gigarantiya usab niya ang katumanan niini. Bahin sa bisan unsang ‘pulong nga mogula sa iyang baba’ si Jehova nag-ingon: “Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.” Usa gayod ka kasaligang saad!—Isaias 55:11; Pinadayag 21:4, 5.

Pagkinabuhi Sumala sa mga Sukdanan sa Diyos

Sa kalibotan diin nag-usab-usab ug nagakaus-os ang mga sukdanan, ang mga Saksi ni Jehova naningkamot sa pagkinabuhi sumala sa mga sukdanan sa panggawi nga gihatag sa Bibliya. Ingong resulta, sila lahi sa kinabag-an sa katawhan, ug kini kasagarang nakadani sa pagtagad—ug pagtamay—sa uban.

Sa usa ka kombensiyon sa mga Saksi ni Jehova sa London, usa ka tigpamaba gipangutana sa usa ka tigbalita sa TV kon ang mga Saksi ni Jehova tinuod ba nga mga Kristohanon. Siya mitubag: “Oo, Kristohanon gayod tungod kay si Jesus mao ang among sulondan. Dagaya ang kahakog sa kalibotan, ug among gihatagag dakong pagtagad si Jesu-Kristo ingong ang dalan, ang kamatuoran, ug ang kinabuhi. Kami nagtuo nga siya mao ang Anak sa Diyos, dili bahin sa usa ka Trinidad, busa ang among pagsabot sa Bibliya lahi nianang sa iladong relihiyon.”

Sa dihang ang maong interbiyo gisibya sa BBC nga telebisyon, ang tigbalita nagtapos sa programa pinaagi sa pag-ingon: “Mas daghan kog nakat-onan kon nganong ang mga Saksi ni Jehova manuktok sa atong mga pultahan. Ug sa akong hunahuna wala pa ako makakita sukad ug 25,000 ka tawo nga maayo kaayog pamiste ug maayo kaayog gawi nga nagtigom sa usa ka dapit sa samang higayon.” Maayo gayod nga pamatuod gikan sa tagagawas nga nakapaniid sa pagkamaalamon sa pagsunod sa dili mag-usab-usab nga mga sukdanan sa Diyos!

Bisan tuod ang uban dili makauyon sa ideya sa pagkinabuhi sumala sa mga sukdanan nga wala nila ihatag, gidasig ka namo sa pagsusi sa imong Bibliya ug pagkat-on kon unsa ang mga sukdanan sa Diyos. Apan ayaw pagkatagbaw sa taphaw lamang nga pagsusi. Sunda ang tambag ni apostol Pablo: “Hunong na sa pagpaumol sumala niining sistemaha sa mga butang, kondili mag-usab kamo pinaagi sa pagbag-o sa inyong hunahuna, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.” (Roma 12:2) Adto sa Kingdom Hall diha sa imong komunidad, ug sinatia ang mga Saksi didto. Imong makita nga sila maoy ordinaryong mga tawo nga nagasalig sa mga saad sa Bibliya ug nagpasundayag sa ilang pagsalig sa Diyos pinaagi sa pagpaningkamot sa pagkinabuhi sumala sa iyang mga sukdanan.

Ang pagsunod sa dili mag-usab-usab ug kasaligan nga mga sukdanan sa Diyos diha sa imong personal nga kinabuhi seguradong maghatag kanimog mga panalangin. Patalinghogi ang pagdapit sa Diyos: “Oh kon ikaw mamati lamang unta gayod sa akong mga sugo! Niana ang imong kalinaw mahimong sama gayod sa usa ka suba, ug ang imong pagkamatarong sama sa mga balod sa dagat.”—Isaias 48:18.

[Mga hulagway sa panid 5]

Karon, dunay pagbudhi diha sa komersiyo, politika, relihiyon, ug sa mga relasyon sa pamilya