KATHERINE i gruap long Yunaeted Stet mo hem i baptaes taem i gat 16 yia. Hem i wok strong long wok blong prij, be smol man nomo oli lesin. Katherine i talem se: “Mi stap ridim stori blong sam man we oli prea blong God i sanem wan man blong i go givhan long olgeta blong oli save God. Mi wantem tumas blong faenem wan man olsem, be nogat.”

Katherine i prij plante yia long ples blong hem. Biaen hem i gat tingting blong muv i go long wan narafala ples, we ol man bambae oli glad moa blong lesin long gud nius. Be hem i stap tingbaot se sipos hem i go, maet bambae i had tumas long hem. Wan taem, hem i aot long famle blong hem blong tu wik, be evri dei hem i harem nogud from hem i stap tingbaot ol famle blong hem tumas. Nating se i olsem, hem i save se wok ya blong givhan long ol man we oli wantem save Jehova, bambae i mekem hem i glad, ale hem gat strong tingting blong go. Hem i tingbaot ol defdefren ples we hem i save muv i go long hem, biaen hem i raetem wan leta long branj ofis long Guam blong kasem moa save long ples we hem i wantem go long hem. Long Julae 2007, taem Katherine i gat 26 yia, hem i muv i go long wan aelan long Pasifik, hemia Saipan, we i stap 10,000 kilometa longwe long famle blong hem. ?Biaen wanem samting i kamaot?

Smoltaem afta we Katherine i joen long niufala kongregesen blong hem, hem i faenem wan woman long wok blong prij we i glad blong stadi Baebol. Nem blong hem Doris, hem i gat 40 yia. Taem tufala i finisim japta wan kasem tri blong buk ya Baebol Tijim, Katherine i stap tingbaot se: “Doris i stadi gud mo mi harem se mi no naf blong givhan gud long hem.” Biaen hem i talem se: “Mi neva gat wan Baebol stadi we i gohed gud olsem, taswe mi ting se Doris i nidim wan narafala tija we i gat sem yia long hem, mo i gat gudhan blong tijim hem.” Ale Katherine i prea long Jehova, blong hem i save faenem wan sista we i naf blong mekem stadi blong Doris. Mo hem i tingbaot se hem i mas talemaot samting ya long Doris.

Katherine i talem se: “Taem mi stap rere blong talemaot jenis ya long Doris, Doris i talem se, hem i wantem talem wan samting long mi. Taem mi lesin gud long hem, mi kasem save se hem i fesem sem problem olsem mi. Ale mi tokbaot long hem samting we Jehova i mekem blong givhan long mi blong winim problem ya. Hem i talem tangkiu tumas long mi.” Biaen, Doris i talem long mi se: “Jehova i sanem yu blong yu kam givhan long mi. Long dei ya we yu kam long haos blong mi fastaem, mi mi ridim Baebol plante aoa. Mi stap krae  long God mo mi askem long hem blong i sanem wan man i kam givhan long mi, blong mi kasemsave long Baebol. Be i no longtaem yu noknok long doa. !Jehova i ansa long prea blong mi!” Samting we Doris i talem i tajem hat blong Katherine, nao hem i krae. Katherine i talem se: “Ol samting we Doris i talem, hem i ansa blong prea blong mi. Jehova i soemaot se mi mi naf blong mekem stadi blong hem.”

Long yia 2010, Doris i baptaes. Mo naoia hem i gat sam Baebol stadi. Katherine i talem se: “Longtaem finis mi wantem givhan long wan man blong i kam man blong Jehova. !Naoia mi mi glad tumas we drim blong mi i kamtru!” Naoia Katherine i spesel paenia long wan narafala aelan hemia Kosrae.

Long Maekronesia i gat bigfala nid. Taswe i gat bitim wan handred brata mo sista blong ol defren kantri (we yia blong olgeta i stat long 19 kasem 79) oli go long ples ya blong givhan. Erica i wan long olgeta. Hem i go long Guam long yia 2006 taem hem i gat 19 yia. Hem i talemaot tingting we olgeta evriwan oli gat, i se: “Taem yumi mekem wok blong paenia long ol ples we ol man oli tosta from trutok, yumi harem gud tumas. Mi mi glad we Jehova i givhan long mi blong mekem wok ya. !Hemia wan laef we i beswan!” Naoia Erica i glad tumas blong mekem wok blong spesel paenia long Ebeye, long Masal Aelan. Taem yumi go long narafala kantri blong prij, i tru se yumi glad. Be bambae yumi fesem sam problem tu. Bambae yumi tokbaot tri problem, mo bambae yumi luk olsem wanem olgeta we oli go long Maekronesia oli winim ol problem ya.

Fasin blong laef. Long yia 2007, Simon i muv i go long Palau. Long taem ya, hem i gat 22 yia. Taem hem i kasem aelan ya, hem i faenemaot se mane we hem i save kasem, i smol moa long mane we hem i stap kasem long kantri blong hem, Inglan. Hem i talem se: “Mi mas lanem blong mi no pem enikaen samting nomo we mi wantem. Mi mas jusum kakae we bambae mi pem, mo mi traem faenem hemia we i no sas. Taem wan samting i nogud, mi go long sekenhan blong pem jenis blong hem, mo mi traem faenem wan man blong i fiksimap.” ?Niufala laef ya i givhan long hem olsem wanem? Hem i gohed i se: “Mi mi lanem blong luksave samting we mi rili nidim long laef. Mo mi lanem blong laef wetem smol samting nomo. Plante taem Jehova i lukaot gud long mi. Long ol seven yia we mi stap long Palau, oltaem mi gat kakae mo ples blong slip.” Yes, oltaem Jehova i lukaot gud long olgeta we oli mekem laef blong olgeta i no fasfas, from oli putum wok blong hem long fasples.—Mat. 6:32, 33.

Yu tingbaot famle blong yu tumas. Erica we yumi tokbaot finis i talem se: “Mi mi laekem famle blong mi tumas, mo mi fraet se sipos mi tingbaot olgeta oltaem, bambae mi no moa gohed blong prij.” ?Hem i mekem wanem blong rerem tingting blong hem? Hem i talem se: “Bifo we mi aot long olgeta, mi ridim wan Wajtaoa we i tokbaot olsem wanem blong winim filing ya blong tingbaot tumas ol famle blong yumi. Mi laekem tumas toktok blong wan mama we i talem long gel blong hem se: ‘Jehova i save lukaot gud long yu moa i bitim mi.’ Toktok ya i leftemap tingting blong mi bigwan, mo i rerem hat blong mi from problem ya.” Yumi save tingbaot  Hannah mo man blong hem Patrick we tufala i stap long Majuro long Masal Aelan. Hannah i traem blong tingbaot moa ol brata mo sista long kongregesen blong hem. Long rod ya, hem i no tingbaot ol famle blong hem tumas. Hannah i talem se: “Oltaem mi stap talem tangkiu long Jehova from kampani blong ol brata mo sista long fulwol, from we olgeta tu oli famle blong mi. Sipos oli no lavem mi, mo oli no givhan long mi, bambae mi no save go prij long ol ples we i gat nid.”

I had blong faenem ol fren. Simon i talem se: “Taem yu go long wan narafala kantri, evri samting i defren. Samtaem mi harem nogud from we mi no save talem wan fani samting, mo samtaem ol narafala oli no kasem save gud long samting we mi talem.” Erica i talem se: “Fastaem, mi harem se mi stap mi wan nomo. Be mi tingbaot se mi mi kam long ples ya blong mekem wok blong Jehova, i no blong mekem samting we mi nomo mi wantem. Ale hemia i givhan long mi blong mi glad.” Hem i gohed i se: “Taem ol yia oli pas, mi stat blong gat ol gudfala fren, mo hemia nao samting we mi laekem tumas.” Simon i traehad blong lanem lanwis blong ol man Palau, blong hem i save ‘talemaot olgeta tingting blong hem’ long ol brata mo sista blong ples ya. (2 Kor. 6:13) Taem ol brata oli luk we Simon i traehad blong lanem lanwis blong olgeta, hemia i pulum olgeta blong oli laekem hem. I tru se taem ol niufala brata mo ol lokol brata oli wok wanples, olgeta evriwan oli glad tumas from we oli joen gud olsem ol gudfala fren long kongregesen. ?Olgeta we oli glad nomo blong mekem wok long narafala kantri, oli kasem wanem narafala blesing?

Aposol Pol i talem se: “Man we i planem plante, hem bambae i kasem plante.” (2 Kor. 9:6) Advaes we Pol i talem i stret long olgeta we oli mekem moa long wok blong prij. Olgeta we oli stap long Maekronesia, oli “kasem plante” blesing. ?Wanem ol blesing ya?

Long Maekronesia, i gat plante janis blong statem ol Baebol stadi, mo blong luk olsem wanem ol man oli lanem trutok, mo oli folem long laef blong olgeta. Patrick mo Hannah, tufala i stap prij long Angaur. Hemia wan smol aelan we i gat 320 man nomo long hem. Tufala i prij long aelan ya tu manis finis, nao tufala i faenem wan mama we i glad blong Stadi long Baebol. Mama ya hem wan i stap lukaot long pikinini blong hem. Taem hem i stadi, hem i luksave se hemia trutok, nao kwiktaem nomo hem i jenisim laef blong hem. Hannah i talem se: “Evri taem afta we mi mo man blong mi i finis long stadi, mo mitufala i stap rere blong aot long ol baskel, mitufala i lukluk mitufala mo mitufala i talem se: ‘Jehova, tangkiu tumas.’” Hannah i gohed i se: “Mi save se Jehova i wantem pulum woman ya i kam long hem. Be from we mitufala i glad blong muv i go long ples we i gat nid, Jehova i mekem se mitufala i save faenem woman ya, mo mitufala i givhan long hem blong i save hem. Hemia wan samting we i mekem mitufala i harem gud tumas long ful laef blong mitufala.” Erica i talem se: “!Taem yu givhan long wan man blong i save Jehova, yu glad tumas!”

Long plante ples, i nidim moa man blong talemaot gud nius. ?Olsem wanem? ?Yu tu yu save joen wetem ol brata mo sista we oli go long ples we i nidim moa man blong prij? I gud yu prea long Jehova blong i givhan long yu blong yu mekem moa long wok blong prij. Mo yu save go storian wetem ol elda long kongregesen, ol eria elda, no maet wetem olgeta we oli gat janis blong mekem wok long ples we i gat nid. Taem yu mekem plan blong go long wan narafala ples, i gud yu raetem wan leta long branj ofis we i lukaot long ples ya. Olsem nao, bambae oli givim sam moa save long yu. * Maet yu tu yu save joen wetem plante taosen brata mo sista we oli glad nomo blong mekem wok, mo oli glad long ‘plante gudfala frut we oli kasem’ long wok ya.