!God i Spolem Ful Wol Blong Man!

Tingbaot wol we yu stap long hem naoia. Hem i gat plante taon, plante defren kalja, wok mo save long saed blong sayens, mo populesen blong hem i kasem plante bilian man. Maet yumi sapraes bigwan from we i luk olsem se hem i save stap longtaem. ?Yu ting se samtaem bambae wol ya i save lus olgeta? Maet i had blong bilif we samting ya i save hapen. Be wan buk we yumi save trastem, i stori se bifo long taem blong yumi, i gat wan wol blong ol man we hem i lus olgeta.

YUMI no tokbaot wan wol blong man we i wael mo i no gat save. Nogat. Ol man ya we oli lus, oli gat plante waes mo save, oli bildim ol bigfala taon, oli save wokem ol naes samting, mo oli gat save long saed blong sayens. Nating se i olsem, Baebol i talem se wan taem nomo, long namba seventin dei blong namba tu manis, 352 yia bifo we Ebraham i bon, wan bigfala wota i kam spolemgud olgeta man blong wol ya. *

 ?Stori ya i tru? ?Samting ya i rili hapen? ?I tru se bifo long taem blong yumi, i gat wan wol blong man we i gat plante save mo waes long defdefren samting, mo biaen hem i lus wantaem? ?Sipos wol ya i rili stap bifo, from wanem hem i finis? ?Wanem i bin hapen? ?Mo yumi save lanem wanem from samting we i hapen long wol ya?

?I Rili Gat Wan Wol Blong Bifo We i Lus?

Sipos i tru se wan bigbigfala trabol olsemia i bin hapen, bambae ol man oli no save fogetem. From samting ya nao, tede plante defren nesen oli gat sam kastom stori no sam lafet we oli mekem man i tingbaot trabol ya. Eksampol, tingbaot stret dei ya we Baebol i talem se hem i stat blong bigfala trabol ya. Sipos yu skelem olfala kalenda wetem kalenda blong yumi, namba tu manis blong olfala kalenda i stat long medel blong manis Oktoba, go kasem medel blong manis Novemba. Hemia i mekem se namba seventin dei ya i stap raonabaot long Novemba 1 long kalenda blong yumi. Taswe, yumi no sapraes we long plante kantri, oli mekem lafet blong ol dedman long dei ya.

Mo tu, ol kastom blong ol man long fulwol oli pruvum se i rili gat wan Bigfala Wota we i ron. Long klosap evri kantri we populesen blong hem i stat longtaem bifo, i gat ol kastom stori we i talem se bubu blong olgeta i laef taem bigfala wota i kavremap fulwol. Ol Pigmi blong Afrika, ol Inka blong Saot Amerika, ol Selt blong Yurop​—olgeta evriwan oli gat semfala kastom stori, we i joen wetem hemia blong ol man Alaska, India, Jaena, Lituenia, Maekronesia, Meksiko, Niu Silan, sam haf blong Not Amerika, mo Ostrelia tu. Be i gat plante narafala kantri tu we oli gat ol kastom stori olsem.

I tru se long ol handred yia we oli pas, ol man oli ademap ol smosmol samting long kastom stori blong olgeta. Be long olgeta kastom stori ya, yu save faenem sem tingting, we i soem se olgeta stori ya oli kamaot long wan stamba stori nomo. Olgeta kastom stori ya oli talem se God i kros tumas from raf fasin blong ol man. Hem i mekem wan bigfala wota i ron. Olgeta man long wol oli lus. Smol man nomo oli laef from we oli holem stret fasin. Olgeta ya oli bildim wan sip, blong ol man wetem ol anamol oli save sef long sip ya. Biaen, oli sanemaot sam pijin blong faenem wan graon we i drae. Ale, bigfala sip ya i kam soa antap long wan bigfala hil. Olgeta we oli laef tru long bigfala wota ya oli mekem wan sakrefaes taem oli kamaot long sip ya.

?Samting ya i pruvum wanem? I gat risen from wanem ol stori ya oli klosap sem mak evriwan. From we ol kastom stori ya oli tokbaot sem samting, oli pruvum se Baebol i tru taem hem i talem se olgeta man long wol oli kamaot long ol man ya we oli laef tru long taem blong bigfala wota. Taswe, yumi no nid blong lukluk i go long ol kastom stori blong save wanem i bin hapen. Stori ya i stapgud yet long Hibru haf blong Baebol.​—Jenesis, japta 6 kasem 8.

 Tabu spirit i pulum man blong raetemdaon histri long Baebol, stat long taem we God i wokem ol faswan laef samting. Be i gat pruf we Baebol i no wan buk blong histri nomo. Ol profet tok blong Baebol oli neva giaman mo waes blong Baebol hem i dip. Hemia i pruvum se Baebol nao hem i rod we God i jusum blong toktok wetem ol man. Baebol i defren olgeta long ol kastom stori. Taem Baebol i talemaot ol stori we oli kamaot bifo, hem i givim ol nem, mo ol stret dei, wetem ol laen blong ol man, mo ol prapa ples. Hem i eksplenem gud fasin blong laef blong ol man bifo we Bigfala Wota i ron, mo i soemaot from wanem, wantaem nomo, ol man long taem ya oli lus olgeta.

?Wanem i hapen long ol man we oli laef bifo we Bigfala Wota i ron? Haf we i kam biaen bambae i ansa long kwestin ya. Hemia wan impoten kwestin long olgeta we oli stap tingting se fiuja blong wol ya i olsem wanem.

[Futnot]

[Bokis blong pija long pej 4]

(Lukluk niuspepa)

Kastom Stori Blong Bigfala Wota Long Olgeta Ples Blong Wol

Kantri Namba 1 2 3 4 5 6 7 8 9 10

Gris 7 ◆ ◆ ◆ ◆ ◆ ◆ ◆

Rom 6 ◆ ◆ ◆ ◆ ◆ ◆

Lituenia 6 ◆ ◆ ◆ ◆ ◆ ◆

Asiria 9 ◆ ◆ ◆ ◆ ◆ ◆ ◆ ◆ ◆

Tansania 7 ◆ ◆ ◆ ◆ ◆ ◆ ◆

India - Hindu 6 ◆ ◆ ◆ ◆ ◆ ◆

Niu Silan - Maori 5 ◆ ◆ ◆ ◆ ◆

Maekronesia 7 ◆ ◆ ◆ ◆ ◆ ◆ ◆

Washington U.S.A. - Yakima 7 ◆ ◆ ◆ ◆ ◆ ◆ ◆

Mississippi U.S.A. - Choctaw 7 ◆ ◆ ◆ ◆ ◆ ◆ ◆

Meksiko - Michoacan 5 ◆ ◆ ◆ ◆ ◆

Saot Amerika - Quechua 4 ◆ ◆ ◆ ◆

Bolivia - Chiriguano 5 ◆ ◆ ◆ ◆ ◆

Guyana - Arawak 6 ◆ ◆ ◆ ◆ ◆ ◆

1: God i kros from raf fasin blong man

2: Bigfala Wota i spolemgud wol

3: God i givim oda blong samting ya

4: God i givim woning

5: Smol man nomo i stap laef

6: Oli sef long wan sip

7: Ol anamol oli sef

8: Oli sanemaot wan pijin no wan narafala anamol

9: Biaen oli go soa antap long wan bigfala hil

10: Oli mekem wan sakrefaes taem oli aot long sip