Go long ol haf insaed long hem

Ol Miusik Blong Presem God Long 100 Yia

Ol Miusik Blong Presem God Long 100 Yia

“Mi wantem se yu go long Kolombia Studio long New York, yu singsing wan him blong yumi, mo bambae oli rikodem. Be yu no talem long wan man.”

William Mockridge

Klosap long en blong 1913, Charles Taze Russell i givim narakaen wok ya long William Mockridge. * Oli rikodem singsing ya we samfala oli talem nem blong hem se “The Sweet By-and-By” (“Bambae Laef i Swit”). Biaen nomo, William i jes save se bambae oli yusum singsing ya long stat blong sinema ya “Photo-Drama of Creation,” Hem i wan sinema blong ol Baebol tok mo miusik we oli rikodem, mo oli joenem wetem ol muvi we i no gat toktok mo ol pija we oli pentem long glas. Fastaem we oli soemaot “Photo-Drama,” hemia long New York City long Jenuware 1914.

Rikoding blong William i wan long 50 rikoding long gramafon we oli yusum taem oli soemaot “Photo-Drama” long Inglis. Bighaf blong ol miusik, ol narafala man oli wokem, be sam rikoding, olsem hemia blong William, ol Baebol Studen oli mekem mo singim. Oli yusum ol tok blong wan singbuk blong olgeta, Hymns of the Millennial Dawn.

Tingting Gud Long Ol Toktok

Plante yia, ol Witnes oli yusum ol singsing we ol narafala oli wokem. Be samtaem oli jenisim ol tok blong mekem i laenap wetem save we oli gat long Baebol.

Wan eksampol, hemia wan singsing long “Photo-Drama,” nem blong hem, “King Blong Yumi i Maj i Go,” we oli wokem folem sing ya “Battle Hymn of the Republic,” be oli jenisim smol. Fastok blong singsing ya hemia: “Ae blong mi i luk we Masta i kam.” Be ol Baebol Studen oli jenisim i kam: “Ae blong mi i luk we Masta i stap.” Jenis ya i soemaot bilif blong olgeta se rul blong Jisas Kraes i no minim nomo se hem i kam, be i minim tu se hem i stap blong wan longfala taem.—Matiu 24:3.

Long singbuk we oli wokem long 1966, Singing and Accompanying Yourselves With Music in Your Hearts, oli traem karemaot ol miusik we i kamaot long wol mo ol narafala skul. Long sem yia, ol Witnes oli mekem wan grup blong plei miusik, mo oli rikodem ol 119 singsing long buk ya. Ol kongregesen oli yusum ol singsing ya long ol miting blong olgeta, mo sam Witnes oli laekem blong lesin long olgeta long haos tu.

Long 2009, ol Witnes blong Jehova oli wokem niufala singbuk ya, Yumi Singsing Long Jehova. Oli rikodem wan grup we oli singim ol singsing ya long plante defdefren lanwis. Long 2013, ol Witnes oli stat blong wokem ol video blong miusik blong ol pikinini, wan long olgeta, Yu Save Prea Enitaem Nomo. Evri manis, plante milian man oli daonlodem ol singsing long jw.org.

Plante man oli talem se oli laekem ol miusik ya. Wan woman, nem blong hem Julie, i tokbaot buk ya Yumi Singsing Long Jehova, i se: “!Ol niufala singsing ya oli naes tumas! Taem mi stap mi wan, mi plei olgeta we oli tokbaot filing we mi mi gat long taem ya. From samting ya, mi haremsave se mi stap fren moa wetem Jehova, mo mi strong moa blong givim bes blong mi long hem.”

Wan mama we nem blong hem Heather, i tokbaot video ya Yu Save Prea Enitaem Nomo, mo samting we video ya i mekem long tufala pikinini blong hem we tufala i gat 7 yia mo 9 yia. Hem i talem se: “Video ya i givhan long tufala, blong tufala i prea enitaem we tufala i wantem toktok long Jehova, i no long stat blong dei nomo mo taem tufala i stap wetem mitufala.”

^ par. 3 Charles Taze Russell (we i laef long 1852–1916) i lidim ol Baebol Studen, hemia nem blong ol Witnes blong Jehova bifo.