Ba Alona bekala mu calo umwaba inkondo. Batila: “Nga naumfwa inyenjele yalila, ndatendeka ukupemashika kabili ndabutukila ku cifulo uko tuya nga ca kuti amabomba yatendeka ukupuulika. Nangu ca kuti tulabutukila kuli ici icifulo, ndatwalilila fye ukusakamikwa. Nomba nga nshili kuli ici icifulo, ndacilamo ukusakamikwa. Bushiku bumo ilyo naleenda mu musebo, natendeke ukulila kabili nalefilwa no kupeema bwino. Palipitile inshita iikalamba pa kuti ntendeke ukumfwako bwino. Na lyo line, inyenjele yalitendeke ukulila na kabili.”

Ba Alona

Pa fintu ifyabipa ificitika ifilenga tulesakamikwa, paliba ne nkondo. Kuti mwasakamikwa sana nga mwasanga ukuti imwe nelyo lupwa wenu nalwala ubulwele ubwabipisha. Abantu bambi nabo balasakamikwa pa fikacitika ku ntanshi. Balasakamikwa ukuti abana babo nelyo abeshikulu bakekala mu calo umwaba inkondo, ulukakaala, umo umwela na menshi fyakowela, umo imiceele yalukaaluka kabili umwaba na masanso yambi. Finshi tulingile ukucita pa kuti twilasakamikwa sana pa fintu fya musango uyu?

Apo twalishiba ukuti ifyabipa filacitika, Baibolo itila: “Uwacenjela nga amona ububi alabelama.” (Amapinda 27:12) Nga filya fine tuicingilila ku fingatuletela amasanso, tulingile ukuicingilila na ku fingonaula amatontonkanyo yesu. Tatulingile ukulatamba amafilimu umuba ulukakaala nelyo ukukutika  ku malyashi ayakutiinya, pantu ifi kuti fyalenga twalasakamikwa kumo na bana besu. Na lyo line, ukukanatamba ifintu ifyabipa takupilibula ukuti ninshi abantu tabacita ulukakaala. Lesa tatubumbile ukuti tuletontonkanya pa fyabipa, lelo afwaya tuletontonkanya “pali fyonse ifya cine, . . . ifyalungama, . . . ifyasanguluka, . . . ifyatemwikwa.” Nga tulecita ifi, “Lesa wa mutende” akatupeela umutende wa mu muntontonkanya na mu mutima.—Abena Filipi 4:8, 9.

IFYO UKUPEPA KWAWAMINA

Nga twalikwata icitetekelo, tatwakulasakamikwa sana. Baibolo itila tufwile ukuba “abalola mu kupepa.” (1 Petro 4:7) Kuti twalomba Lesa ukuti atwafwe no kutupeela amaka na mano pa kuti twingashipikisha amafya ayali yonse, kabili tulingile ukucetekela ukuti “alatumfwa pali conse ico twalomba.”—1 Yohane 5:15.

Ba Alona na bena mwabo ba Avi

Baibolo itila “kateka wa pano calo” te Lesa, lelo ni Satana, kabili ilanda no kuti “icalo conse calaala mu maka ya mubifi.” (Yohane 12:31; 1 Yohane 5:19) Kanshi Yesu tabomfeshe amashiwi yamampalanya ilyo atwebele ukulapepa ati: “Tupokololeni ku mubifi.” (Mateo 6:13) Ba Alona batile: “Inyenjele nga yatendeka ukulila na kabili, ndapepa kuli Yehova pa kuti angafwe ukucefyako ukusakamikwa. Abena mwandi nabo balanjita pa kuti twapepela pamo. Ala mwandini ipepo lilaafwa sana!” E co Baibolo ilandila ukuti: “Yehova aba mupepi na bonse abalilila kuli ena, kuli bonse abalilila kuli ena mu cishinka.”—Amalumbo 145:18.

IFYO IFINTU FIKABA KU NTANSHI

Mu Lyashi lya pa Lupili, Yesu aebele abasambi bakwe ukulapepa ati: “Ubufumu bwenu bwise.” (Mateo 6:10) Ubufumu bwa kwa Lesa bukafumyapo fyonse ifilenga abantu ukusakamikwa. Lesa akabomfya Yesu, “Cilolo wa Mutende,” ku kulenga “inkondo ukupwa ukufika ku mpela sha pano isonde.” (Esaya 9:6; Amalumbo 46:9) Lesa “akapingula pa kati ka bantu na bantu abengi, . . . Uluko talwakemishe uluko lunankwe ulupanga, nangu ukusambilila inkondo na kabili. . . . Tapakabe no wa kubatiinya.” (Mika 4:3, 4) Abantu “bakakuula amayanda no kwikalamo; bakalima na mabala ya myangashi no kulya ifisabo fya yako.” (Esaya 65:21) Mu calo cipya “takuli umwikashi uukatila: ‘Nindwala.’”—Esaya 33:24.

Muno nshiku, nangu ca kuti abantu balaicingilila ku masanso, balafilwa ukuicingilila ku “fintu fyabula ukwenekela” kabili ifyabipa filabacitikila pa mulandu wa kuti balaba pa cifulo apacitika ubusanso. (Lukala Milandu 9:11) Pa myaka iingi, abantu abengi balafwa pa mulandu wa nkondo, ulukakaala na malwele. Bushe abantu abasuma abafwa kuli ifi fintu bakabuuka?

Abantu abengi abafwa abo Lesa umwine aishiba, bakabuuka. Pali ino nshita, abantu abafwa abo Lesa ebukisha, balaala fye utulo ukufikila ubushiku ilyo “bonse ababa mu nshiishi bakebukishiwa . . . no kufumamo.” (Yohane 5:28, 29) Baibolo ilanda ukuti kukaba ukubuuka. Itila: “Ili isubilo tukwete lyaba nge nanga ya mweo, ilyashininkishiwa kabili ilyakosa.” (AbaHebere 6:19) Lesa “alipeela no bushininkisho ku bantu bonse pa kumubuusha [Yesu] ku bafwa.”—Imilimo 17:31.

Muno nshiku, abantu abacita ifyo Lesa afwaya nabo balasakamikwa. Ukupepa kuli Lesa e lyo no kucetekela amalayo ya kwa Lesa ayalembwa mu Baibolo kwalyafwa ba Paul, ba Janet na ba Alona ukukanalasakamikwa sana. Nga fintu ayafwa aba bamunyinefwe, “shi Lesa uumupeela isubilo alenge ukuti mube ne nsansa nga nshi kabili mube no mutende pa mulandu wa citetekelo cenu.”—Abena Roma 15:13.