Ukutendeka 16:1-16
-
Hagari na Ishmaele (1-16)
16 Nomba Sarai, umukashi wa kwa Abramu, talekwata abana,+ lelo ali no mubomfi umwina Egupti ne shina lyakwe ni Hagari.+
2 E ico Sarai aebele Abramu ati: “Moneni! Yehova alilenga nilakwata abana. Shi sendameni no mubomfi wandi. Nalimo kuti amfyalilako abana.”+ Awe Abramu akutike kuli Sarai.
3 E ico Sarai abuulile Hagari umubomfi wakwe umwina Egupti, amupeele kuli Abramu umulume wakwe ku kuba umukashi wakwe. Pali iyi nshita ninshi Abramu alikala mu calo ca Kanaani pa myaka 10.
4 E ico asendeme na Hagari, kabili alimite. Ilyo aishibe ukuti alimite, atampile ukusuula nakulu.
5 Ici calengele Sarai ebe Abramu ati: “Niwe walenga ukuti ncule ifi. Nine nakupeele umubomfi wandi,* nomba ena ilyo aishibe ukuti alimite, atendeke ukunsuula. Yehova napingule pa kuti tumone uuli ne cilubo pali ine na iwe.”
6 E ico Abramu aebele Sarai ati: “Mona! Umubomfi obe ali mu minwe yobe. Umucite ico ulefwaya we mwine.” Awe Sarai alicushishe Hagari ica kuti alimubutwike.
7 Pa numa malaika wa kwa Yehova amusangile pa kamfukumfuku ka menshi mu matololo, akabela mu musebo waya ku Shuri.+
8 Kabili amwipwishe ati: “Hagari, we mubomfi wa kwa Sarai, ni kwi wafuma kabili ni kwi uleya?” Na o ayaswike ati: “Ndefulumuka mama Sarai.”
9 Lyena malaika wa kwa Yehova amwebele ukuti: “Bwelelamo kuli nokokulu kabili ulemunakila.”
10 Malaika wa kwa Yehova amwebele no kuti: “Nkafusha abana* bobe icine cine, ica kuti tabakapendwe.”+
11 Na kabili malaika wa kwa Yehova amwebele ati: “Mona nawimita, ukafyala umwana umwaume kabili ukamwinike ati Ishmaele,* pantu Yehova namona ifyo ulecula.
12 Akaba uwa maka kwati ni mpunda ya mpanga.* Ukuboko kwakwe kukalalwisha umuntu onse, no kuboko kwa muntu onse kukalamulwisha, kabili akekala ku lubali lumbi ulwa bamunyina bonse.”*
13 Lyena alumbenye Yehova uwalelanda nankwe, atile: “Nimwe Lesa uumona,”+ ne co alandile ifi ni co umwine atile: “Bushe ca cine uyu namona kuno e ulya wine uumona ine?”
14 E mulandu wine cilya icishima cainikilwe ati Beere-lahai-roi.* Cabela pa kati ka Kadeshe na Berede.
15 Pa numa Hagari afyele umwana umwaume, kabili Abramu amwinike ati Ishmaele.+
16 Abramu ali ne myaka 86 ilyo Hagari afyele Ishmaele.
Amafutunoti
^ Mu ciHebere, “napeele umubomfi wandi ukuti umufukatile.”
^ Mu ciHebere, “ulubuto.”
^ Ilyalola mu kuti “Lesa alomfwa.”
^ Bamo bamona ukuti impunda ya mpanga pali ici cikomo ni colwa. Nomba ifwile te colwa.
^ Nelyo kuti yapilibula no kuti, “kabili takaleumfwana na bamunyina bakwe bonse.”
^ Ilyalola mu kuti “Icishima ca Wa Mweo Uumona Ine.”
