Oseas 9:1-17
9 “Dai ka mag-ugma, O Israel,+Dai ka maggaya-gaya kapareho kan mga banwaan.
Huli ta paagi sa prostitusyon* ruminayo ka sa saimong Diyos.+
Nagustuhan mo an bayad para sa sarong hostes na nareresibi mo sa lambang ginikan nin tipasi.+
2 Pero dai sinda papakakanon kan ginikan saka kan pugaan nin ubas,Pati bagong arak kukulangon siya.+
3 Dai sinda magdadanay na nakaistar sa daga ni Jehova;+Imbes, mabalik an Efraim sa Ehipto,Asin makakan sinda nin maati sa Asiria.+
4 Dai na sinda mabubo nin mga dulot na arak para ki Jehova;+Dai makakapaugma sa saiya an mga atang ninda.+
Garo tinapay sa pagmundo an mga iyan;An gabos na nagkakakan kaiyan magigin maati.
Huli ta para sana sa sainda* an tinapay ninda;Dai iyan makakalaog sa harong ni Jehova.
5 Ano an gigibuhon nindo sa aldaw nin pagtiripon,*Sa aldaw kan kapiyestahan ni Jehova?
6 Huli ta uya! kakaipuhanon nindang dumulag dahil sa kalaglagan.+
Titipunon sinda kan Ehipto,+ asin ilulubong sinda kan Memfis.+
Magigin sadiri kan mga matunok na awot* an mahahalagang gamit ninda na gibo sa plata,Asin maturubo an mga matunok na palungpong sa saindang mga tolda.
7 Maabot an mga aldaw nin pakikipagkuwenta,+Maabot an mga aldaw nin paniningil,Asin maaaraman iyan kan Israel.
Magigin mangmang an saindang propeta, asin an lalaking pinasabngan magigin bua-bua;Dahil dakulon an kasalan mo, grabe an pagkaungis sa saimo.”
8 Nasa kaibanan kaidto kan sakuyang Diyos+ an bantay+ kan Efraim.
Pero ngunyan an gabos na dalan kan saiyang mga propeta+ garo mga silo nin paradakop nin gamgam;May pagkaungis sa harong kan saiyang Diyos.
9 Nagpangana sinda sa mga gibong maresulta sa pagkalaglag, arog kan mga aldaw kan Gibeah.+
Gigirumdumon niya an saindang pagkakasala asin papadusahan sinda dahil sa saindang mga kasalan.+
10 “Nanumpungan ko an Israel na garo mga ubas sa kaawagan.+
Nahiling ko an saindong mga apuon na garo inot na mga bungang igos nin puon nin higera.
Pero nagpasiring sinda ki Baal nin Peor;+Idinusay ninda an saindang sadiri sa makasusupog na bagay,*+Asin nagin makababaldi sinda kapareho kan bagay na saindang namumutan.
11 An kamurawayan kan Efraim luminupad na garo gamgam;Mayo nin pangangaki, nin pagbados, asin nin pangingidam.+
12 Maski pa makapadakula sinda nin mga aki,Uubuson ko sinda sagkod na dai na nin matada;+Iyo, hirak man sa sainda pag tinalikdan ko sinda!+
13 Para sa sako, an Efraim, na nakatanom sa pasabsaban, garo Tiro;+Ngunyan, dapat na darahon kan Efraim an mga aki niya pasiring sa paragadan.”
14 Itao mo sa sainda, O Jehova, an maninigo sa sainda;Matris na nakukuanan asin mga suso na daing gatas.*
15 “An gabos nindang karatan yaon kaidto sa Gilgal,+ kaya naungis ako duman sa sainda.
Papalayason ko sinda sa sakuyang harong dahil sa maraot na mga ginigibo ninda.+
Dai ko na sinda mamumutan;+Matagas an payo kan gabos nindang pamayo.*
16 Papabagsakon an Efraim.+
Maaalang an saindang gamot, asin dai sinda mamumunga.
Maski pa mangaki sinda, gagadanon ko an pinakamamahal nindang mga aki.”
17 Isisikwal sinda kan sakuyang Diyos,Dahil dai sinda nagdangog sa saiya,+Asin magigi sindang mga dulag sa mga nasyon.+
