Oseas 1:1-11
1 Ini an tataramon ni Jehova na uminabot ki Oseas* na aki ni Beeri kan panahon ni Uzias,+ Jotam,+ Ahaz,+ asin Hezekias,+ na mga hadi kan Juda,+ asin kan panahon ni Jeroboam+ na aki ni Joas,+ na hadi kan Israel.
2 Kan punan na ipaabot ni Jehova an saiyang tataramon paagi ki Oseas, sinabi ni Jehova ki Oseas: “Mag-agom ka nin sarong babayi na magigin parapakisambay,* asin magkaigwa ka nin mga aki na bunga kan saiyang pagsambay,* dahil paagi sa pagsambay* biyong tinalikdan kan nasyon an pagsunod ki Jehova.”+
3 Kaya inagom niya si Gomer na aki ni Diblaim. Nagbados ini, asin nagkaaki sinda nin lalaki.
4 Dangan sinabi saiya ni Jehova: “Pangaranan mo siyang Jezreel,* dahil dikit na sanang panahon papanimbagon ko na an pamilya* ni Jehu+ dahil sa pagpabulos nin dugo kan Jezreel, asin tatapuson ko an kahadian kan nasyon* nin Israel.+
5 Sa aldaw na iyan, babarion ko an pana kan Israel sa Kababan* nin Jezreel.”
6 Nagbados giraray si Gomer asin nangaki nin babayi. Asin sinabi nin Diyos ki Oseas: “Pangaranan mo siyang Lo-ruhama,* dahil dai ko na kakahirakan+ an nasyon nin Israel; papalayason ko nanggad sinda.+
7 Pero kakahirakan ko an nasyon* nin Juda,+ asin ako, si Jehova na saindang Diyos,+ an magliligtas sa sainda; ililigtas ko sinda bakong paagi sa pana o espada o giyera o mga kabayo o mga parakabayo.”+
8 Pagkatapos na mabutas sa pagsuso si Lo-ruhama, nagbados giraray si Gomer dangan nangaki nin lalaki.
9 Tapos sinabi nin Diyos: “Pangaranan mo siyang Lo-ami,* dahil bako ko kamong banwaan asin dai ako magigin saindo.
10 “Asin an bilang kan banwaan* nin Israel magigin arog kan mga baybay sa dagat, na dai matatakad o mabibilang.+ Asin sa lugar kun sain sinabihan sinda, ‘Bako ko kamong banwaan,’+ duman sasabihon sa sainda, ‘An mga aki kan buhay na Diyos.’+
11 Asin titiripunon an mga kabilang sa banwaan nin Juda asin nin Israel para magkasararo,+ tapos mapili sinda nin sarong pamayo asin mahali sinda sa kadagaan. Magigin dakulang aldaw iyan nin Jezreel.+
Mga Nota
^ Pinahalipot na porma kan Hosaias, na nangangahulugan “Ilinigtas ni Jah; Si Jah Nagligtas.”
^ O “magibo nin prostitusyon; magigin imoral.”
^ O “prostitusyon; imoralidad.”
^ O “prostitusyon; imoralidad.”
^ Sa literal, “harong.”
^ Sa literal, “harong.”
^ Nangangahulugan na “An Diyos Masabwag nin Banhi.”
^ O “Hababang Kapatagan.”
^ Nangangahulugan na “Dai Kinahirakan.”
^ Sa literal, “harong.”
^ Nangangahulugan na “Bako Kong Banwaan.”
^ Sa literal, “mga aking lalaki.”
