Nagtatagad gud ba hi Jehova ha aton, o waray hiya pagpaid ha pag-antos han tawo ha tuna? Makalilipay an baton han Biblia hito nga pakiana. Oo, an Dios nagtatagad gud ha mga tawo, ngan karuyag niya nga makabiling kita hin kalipay. Kada adlaw, gintutugotan niya an mga tawo nga makapahimulos han iya hura nga kaopayan, bisan adton pinakadiri-mapinasalamaton. Tagdon naton an ginsiring ni apostol Pablo.—Basaha an Buhat 14:16, 17.

Mahitungod ha mga diri nagsisingba ha Dios ha Listra, hi Pablo nagsiring: “Ha naglabay nga mga henerasyon iya [Dios] gintugotan an ngatanan nga nasud nga magbuhat han ira karuyag, bisan kon pirme hiya nagpapakita hin pamatuod han mag-opay nga iya ginbubuhat pinaagi ha paghatag ha iyo hin uran tikang ha langit ngan hin mga panahon han abunda nga pamunga, gintatagan kamo hin damu nga pagkaon ngan ginpupuno an iyo kasingkasing hin kalipay.” Ano an iginpapasabot hini ha mga taga-Listra?

Masayon la hisabtan han mga taga-Listra ito nga mga pulong. Pag-uma an ira panginabuhi, ngan matambok ngan hura ha tubig an ira lugar. Kondi, sugad han iginpahinumdom ha ira ni Pablo, an Dios an Burabod han uran ngan han panahon han abunda nga pamunga. Salit ha kada pag-aani hin hura, ngan pagpahimulos hin marasa nga pagkaon, nagpapahimulos hira han kaopayan han Dios.

An mga pulong ni Pablo ha mga taga-Listra nagtututdo ha aton hin pipira nga importante nga leksyon mahitungod kan Jehova nga Dios.

Gintatagan kita ni Jehova hin kagawasan ha pagdesisyon. Tigamni nga gintugotan ni Jehova an ngatanan nga nasud nga Hentil nga “magbuhat han ira karuyag.” Usa nga reperensya han mga parahubad han Biblia nasiring nga ini nga mga pulong mahimo mangahulogan, “ha pagbuhat kon ano an ira ginhuhunahuna nga gimaopayi.” Diri ginpipirit ni Jehova an bisan hin-o nga singbahon hiya. Gintagan kita niya hin kagawasan ha pagdesisyon—an abilidad ha pagpili kon ano an aton hihimoon ha aton kinabuhi.—Deuteronomio 30:19.

Karuyag ni Jehova nga makilala naton hiya. Waray niya pabay-i nga diri hiya ‘magpakita hin pamatuod,’ siring ni Pablo. An gin-unabi na nga reperensya nasiring nga ini nga mga pulong mahimo ihubad nga “matin-aw nga iya iginpakita ha mga tawo kon ano nga klase hiya hin Dios.” An iya mga linarang marig-on nga nagpapamatuod han iya “diri-nakikita nga mga kalidad,” upod na an iya pagkamaopay, kinaadman, gahum, ngan gugma. (Roma 1:20) Dugang pa, iginpakilala ni Jehova an iya kalugaringon ha Biblia. (2 Timoteo 3:16, 17) Diri ba matin-aw nga karuyag niya nga kumilala kita ha iya?

Karuyag ni Jehova nga magin malipayon kita. Ginpupuno niya an aton “kasingkasing” hin ‘damu nga pagkaon ngan kalipay,’ siring ni Pablo. Bisan an makasasala nga diri nakilala kan Jehova mahimo malipay ha pagkaon ngan matagbaw ha kinabuhi. Kondi karuyag han Dios nga magkaada kita kalipay nga tinuod ngan nagpapadayon. Posible la ito kon mahibabaroan naton an kamatuoran mahitungod ha iya ngan iaaplikar ito ha aton kinabuhi.—Salmo 144:15; Mateo 5:3.

Kita ngatanan nagpapahimulos han pagkamaopay ni Jehova ha kada adlaw. Salit, kay ano nga diri mag-aram hin dugang pa kon paonan-o mo maipapakita an imo pagpasalamat ha Dios nga nagpupuno han imo kasingkasing hin ‘damu nga pagkaon ngan kalipay’?