KAY ANO NGA GINTUTUGOTAN NIYA INI?

Michelle: Nanhahatag kami hin tract dinhi ha iyo lugar, ngan karuyag ko tagan ka hini sugad nga imo personal nga kopya. May ulohan ini nga Karuyag Mo ba Hibaroan an Kamatuoran?

Sophia: Mahitungod ba ini ha relihiyon?

Michelle: Oo. Ha kobre hito, may unom nga pakiana. Hain hini nga mga pakiana an—

Sophia: Anay Miss, ha iba na la. Nagkakarag ka la han imo oras.

Michelle: Kay ano nga nasiring mo ito?

Sophia: Ha tinuod la, baga hin diri na ako natoo ha Dios.

Michelle: Salamat han imo pagin prangka. Maiha ka na ba nga nagruruhaduha mahitungod ha Dios?

Sophia: Diri. Han bata pa ako, nasingba ako. Pero maiha na ako nga inundang.

Michelle: Ngay-an? Anay, ako hi Michelle.

Sophia: Ako liwat hi Sophia.

Michelle: Nalilipay ako makilala ka, Sophia.

Sophia: Ako man.

Michelle: Ha pagkatinuod, waray ako kumanhi basi ipirit an akon gintotoohan ha imo, Sophia. Pero puydi ko ba hibaroan kon kay ano nga ginruruhaduhaan mo an pag-eksister han Dios?

Sophia: Aw, naaksidente man gud an akon nanay mga 17 ka tuig na ha naglabay.

Michelle: Nasusubo ako nga hibatian ito. Kumusta man hiya yana?

Sophia: Naparalisar hiya tikang hadto.

Michelle: Nasusubo ako nga hibatian ito. Sigurado nga nasasakitan ka gud ha mga panhitabo.

Sophia: Oo. Salit nahuhunahuna ko, Kon naeksister gud man an Dios, kay ano nga gintutugotan niya ini nga mahitabo? Kay ano nga gintutugotan niya nga mag-antos kita hin sugad hini?

SAYOP BA AN MAGPAKIANA KON KAY ANO?

Michelle: Hinsasabtan ko an imo inaabat. Kon nag-aantos kita, normal la nga magpakiana kon kay ano. Ha pagkamatuod, nagpakiana liwat hin sugad an pipira nga nagsisingba ha Dios ha panahon han Biblia.

Sophia: Ngay-an?

Michelle: Oo. Puydi ko ba ipakita ha imo an usa nga ehemplo tikang ha Biblia?

Sophia: Sige.

Michelle: Alayon tigamni kon ano an iginpakiana ha Dios han matinumanon nga propeta nga hi Habakuk, ha Habakuk 1:2, 3. Ito nasiring: “O Jehova, ngada san-o an akon pagsangpit, ngan ikaw diri mamamati? Ako nagsangpit ha imo mahitungod han pagpungka, ngan ikaw diri magluluwas. Kay ano nga imo ako ginpapakita han karat-an?” Pariho ba ini nga mga pakiana ha imo mga iginpapakiana?

Sophia: Oo.

Michelle: Han igbangon ni Habakuk ito nga mga pakiana, waray masina an Dios ha iya, waray man liwat an Dios sumiring nga nagkikinahanglan la hiya hin dugang nga pagtoo.

Sophia: Ngay-an?

NANGANGALAS HI JEHOVA HA PAG-ANTOS

Michelle: Nasiring an Biblia nga nakikita han Dios an aton pag-antos ngan napaid hiya ha aton.

Sophia: Ano an karuyag mo ipasabot?

Michelle: Kitaon naton an usa nga ehemplo dinhi ha Eksodo 3:7. Puydi makialayon ha imo pagbasa hito?

Sophia: Puydi man. Ito nasiring: “Ngan hi Jehova siniring: Ha pagkamatuod akon hinkit-an an mga kakurian han akon katawohan nga aadto ha Ehipto,  ngan hinbatian ko an ira tuok tungod han ira mga kapatas, kay ako maaram han ira mga kabidoan.”

Michelle: Salamat. Sumala han teksto, nakikita ba han Dios kon nag-aantos an iya katawohan?

Sophia: Aw, baga hin nakikita niya.

Michelle: Ngan diri la kay basta niya nakikita an nahitatabo. Alayon kitaa utro an kataposan nga bahin han bersikulo. An Dios nasiring: “Ako maaram han ira mga kabidoan.” Naghuhulagway ba ito hin waray kalooy ngan diri napaid nga Dios?

Sophia: Diri gud.

Michelle: Pero syempre, magkaiba an basta paghibaro la han kakurian kay ha pagin apektado hito, diri ba?

Sophia: Aw, oo gad.

Michelle: Uyon hito, basahon naton an usa pa nga panhitabo han pag-antos han katawohan han Dios. Mababasa ito ha Isaias 63:9. An siyahan nga bahin hito nga bersikulo nasiring: “Ha ngatanan nira nga kasakit hiya ginsakit.” Masisiring ba naton nga apektado an Dios ha pag-antos han iya katawohan?

Sophia: Oo, baga hin apektado hiya.

Michelle: Husto. Ngani, napaid gud an Dios ha aton ngan nadiri gud hiya nga makita kita nga nag-aantos. Kon nasasakitan kita, nasasakitan liwat hiya.

KAY ANO NGA NAGHUHULAT HIYA?

Michelle: Antes ako lumakat, may-ada pa ako karuyag isumat ha imo.

Sophia: Aw, sige.

Michelle: An Biblia naghihisgot mahitungod han gahum han Dios, ngan nahunahuna ko an Jeremias 10:12. Puydi mo ba ito basahon?

Sophia: Sige. Ito nasiring: “Iya ginhimo an tuna pinaagi han iya gahum, hiya an nagtukod han kalibotan pinaagi han iya kinaadman, ngan pinaagi han iya sarabotan iya ginbitad an mga langit.”

Michelle: Salamat. Tagdon naton hin madaliay ini nga teksto. Nagkinahanglan ba an Dios hin daku nga gahum ha paglarang hinin haluag nga uniberso ngan han ngatanan dida hito?

Sophia: Sigurado.

Michelle: Salit kon an Dios may gahum ha paglarang han ngatanan ha aton palibot, diri ba naglalaom kita nga may-ada liwat hiya gahum ha pagkontrol han iya mga ginlarang?

Sophia: Oo.

Michelle: Hunahunaa utro an imo nanay. Kay ano nga nasasakitan ka nga makita hiya nga nag-aantos?

Sophia: Tungod kay hinigugma ko hiya. Nanay ko gud hiya.

Michelle: Husto. Kon may-ada ka gahum ha pagtambal ha iya yana, bubuhaton mo ba?

Sophia: Syempre.

Michelle: Hunahunaa kon ano an karuyag sidngon hito. An Biblia nasiring nga nakikita han Dios an aton pag-antos, nasasakitan hiya kon nasasakitan kita, ngan may-ada hiya daku nga gahum. Nahuhunahuna mo ba kon mationan-o kadaku hin pagpugong an ginkikinahanglan han Dios basi diri hiya manginlabot, ngan tapuson dayon an aton pag-antos?

Sophia: Yana ko pa gud la nahunahuna ito.

Michelle: May-ada daw la hiya maopay nga hinungdan nga diri anay manginlabot ha pagtapos han aton mga problema? a

Sophia: Ha akon paghunahuna, may-ada.

Michelle: Baga hin nagriring an imo telepono, salit mabalik na la ako ha iba nga higayon basi ipadayon an aton paghisgot mahitungod hini.

Sophia: Sige. Damu nga salamat. b