Nagtuok ka na ba tungod hin duro nga kasakit?— a Posible nga kita ngatanan nakaeksperyensya na hito. Kondi usahay, diri la an aton lawas an puydi masakitan. Bangin may magyakan hin maraot o diri tinuod mahitungod ha aton. Masakit ito, diri ba?— An Dios gihap nasasakitan kon may nagyayakan hin maraot mahitungod ha iya. Pag-istoryahan naton ini ngan kon paonan-o naton mapapalipay an Dios, imbes nga pasakitan hiya.

Mababasa ha Biblia nga an pipira han mga tawo nga nagsiring nga hinigugma nira an Dios, an ‘nagpasubo ha iya.’ Oo, ira “ginpasina” an Dios! Syempre, diri mapapasakitan an iya lawas. Hiya an makagarahum-ha-ngatanan. Kondi, mahimo naton pasakitan an iya pagbati kon diri naton hiya ginsusunod. Pag-istoryahan naton an mahitungod hito.

Nasakitan gud hi Jehova han ginbuhat han duha nga tawo nga iya siyahan nga ginlarang dinhi ha tuna. Iginbutang hira han Dios ha Paraiso nga gintatawag nga “tanaman han Eden.” Hin-o inin duha nga tawo?— Oo, hi Adan, ngan ha urhi, hi Eva. Kitaon naton kon ano an ira ginbuhat nga nasakit man nira hi Jehova.

Han ibutang hira ni Jehova ha hardin han Eden, ginsidngan niya hira nga kultibaron ito. Ginsidngan gihap niya hira nga mahimo hira magkaanak ngan mabuhi hin dayon ha hardin. Kondi antes hira magkaanak, may-ada maraot nga nahitabo. Maaram ka ba kon ano ito?— Gin-impluwensyahan hin anghel hi Eva, katapos hi Adan, nga magtalapas kan Jehova. Kitaon naton kon ano an nahitabo.

Ginpahinabo hini nga anghel nga magin sugad hin nagyayakan an halas, o serpyente. Nagsiring ito nga  magigin pariho hi Eva ha Dios, ngan naruyagan ito ni Eva. Salit ginsunod niya an siring han halas. Maaram ka ba kon ano adto?

—Kumaon hi Eva han bunga han puno nga diri iginpapakaon ni Jehova kan Adan. Ngani, antes larangon han Dios hi Eva, iya ginsidngan hi Adan: “Ha tagsa nga kahoy han tanaman makakahimo ikaw pagkaon hin waray makauulang, kondi han kahoy han kinaadman han kaopayan ngan han karaotan, diri ka makakakaon: kay ha adlaw nga ikaw kumaon hito, ikaw gud mamamatay.”

Maaram hi Eva hito nga sugo. Kondi padayon nga ginkinita niya an puno, ngan nakita niya nga ito ‘maopay kaunon, ngan makalilipay ha mga mata.’ Salit ‘binuro hiya han bunga hito ngan kinaon.’ Katapos, gintagan niya hi Adan, ngan “kinaon” ito. Kay ano nga nabuhat man adto ni Adan?— Tungod kay mas hinigugma niya hi Eva kay ha kan Jehova. Mas ginpili niya nga lipayon hi Eva imbes nga an Dios. Pero an pagsunod kan Jehova mas importante kontra ha pagsunod ha bisan hin-o!

Nahinunumdoman mo ba nga ginpahinabo han anghel nga baga hin nagyayakan an halas? Puropariho ito ha usa nga tawo nga nagpapahinabo ha usa nga puppet nga makayakan. Kan kanay daw la tingog an aada ha luyo han halas?— Ito an tingog han “orihinal nga halas, an gintatawag nga Yawa ngan Satanas.”

Maaram ka ba kon paonan-o mo mapapalipay hi Jehova?— Mapapalipay mo hiya kon pirme ka mangangalimbasog ha pagsunod ha iya. Pero nasiring hi Satanas nga mahimo niya ipabuhat ha ngatanan an iya karuyag. Salit nag-aaghat ha aton hi Jehova: “Anak ko, pagmakinaadmananon, ngan himoa an akon kasingkasing nga malipayon, nga ako makabaton ha iya nga nagsasaway ha akon.” ‘Ginsasaway’ o ginpapakaraot ni Satanas hi Jehova. Hiya nasiring nga maiimpluwensyahan niya an ngatanan nga bumaya ha pag-alagad kan Jehova. Salit lipaya hi Jehova pinaagi ha pagsunod ngan pag-alagad ha iya! Pangangalimbasogan mo ba nga buhaton ito?—