Marcos 2:1-28
2 Bisan pa hito, paglabay hin pipira ka adlaw binalik hi Jesus ha Capernaum, ngan nahibantog nga inuli na hiya ha balay.
2 Tungod hito, damu hinduro an kinadto salit waray na lugar bisan ha may purtahan, ngan nagtikang hiya pagsangyaw ha ira.
3 Ngan may gindara hira ha iya nga paralisado nga ginbabayawan hin upat nga lalaki.
4 Pero waray hira makahirani kan Jesus tungod han damu nga tawo, salit ginbuhoan nira an atop ha igbaw ni Jesus ngan dida iginturos an tiheras nga hinihigdaan han paralisado.
5 Han nakita ni Jesus an ira pagtoo, nagsiring hiya ha paralisado: “Anak, ginpasaylo na an imo mga sala.”
6 Hito nga panahon may mga eskriba didto nga nangangalingkod, ngan ha ira kasingkasing ini an ira pangatadongan:
7 “Kay ano nga sugad hini magyakan ini nga tawo? Nagpapasipara hiya. Hin-o an makakapasaylo han mga sala labot la han Dios?”
8 Pero tungod kay nasabtan dayon ni Jesus nga nangangatadongan hira ha ira kalugaringon, nagsiring hiya: “Kay ano nga nangangatadongan kamo hin sugad hito ha iyo kasingkasing?
9 Ano an mas masayon, an pagsiring ha paralisado, ‘Ginpasaylo na an imo mga sala,’ o an pagsiring, ‘Buhát, dad-a an imo tiheras ngan lakat’?
10 Pero basi mahibaro kamo nga an Anak han tawo may awtoridad dinhi ha tuna ha pagpasaylo han mga sala, . . . ” ginsidngan niya an paralisado:
11 “Buhát, dad-a an imo tiheras ngan uli ha iyo balay.”
12 Salit binuhát hiya ngan gindara dayon an iya tiheras ngan naglakat tipagawas ha atubangan nira ngatanan. Tungod hito nahipausa gud hira, ngan gindayaw nira an Dios, nasiring: “Waray pa gud kami makakita hin sugad hini.”
13 Ha lain nga higayon, kinadto hi Jesus ha baybayon, ngan damu nga tawo an kinadto ha iya, ngan nagtikang hiya pagtutdo ha ira.
14 Pag-agi niya ha opisina para han pagbuhis, nakita niya an anak ni Alfeo nga hi Levi nga nalingkod didto, ngan iya ginsidngan: “Sunod ha akon.” Binuhát hi Levi ngan sinunod ha iya.
15 Han nalingkod na hi Jesus ha may lamesa ha balay ni Levi, nalingkod kaupod niya ngan han iya mga disipulo an damu nga parasukot hin buhis ngan magpakasasala, kay damu ha ira an nagin sumurunod niya.
16 Pero pakakita han mga eskriba han mga Pariseo* nga kaupod niya ha pangaon an magpakasasala ngan an mga parasukot hin buhis, nagsiring hira ha iya mga disipulo: “Nakaon ngay-an hiya upod han mga parasukot hin buhis ngan magpakasasala?”
17 Han hinbatian ini ni Jesus, nagsiring hiya ha ira: “An magkusog diri nanginginahanglan hin doktor, kondi an mga may sakit. Kinanhi ako diri para ha magtadong, kondi para ha magpakasasala.”
18 Hito nga panahon nagpupuasa an mga disipulo ni Juan ngan an mga Pariseo. Salit dinaop hira ha iya ngan nagsiring: “Kay ano nga kami nga mga disipulo ni Juan ngan an mga sumurunod han mga Pariseo nagpupuasa, pero an imo mga disipulo diri nagpupuasa?”
19 Binaton hi Jesus: “Samtang kaupod han karaslon nga lalaki an iya kasangkayan, diri hira angay magpuasa, diri ba? Mentras kaupod nira an karaslon nga lalaki, diri hira sadang magpuasa.
20 Pero maabot an panahon nga an karaslon nga lalaki kukuhaon ha ira, ngan hito nga adlaw magpupuasa hira.
21 Waray nagtatangkop hin bag-o nga tela ha daan nga pantungbaw nga panapton. Kon ito an iya buhaton, pagkuro han bag-o nga tela madugang la kagisi an daan.
22 Waray liwat nagsusulod hin bag-o nga bino ha daan nga anit nga surudlan. Kon ito an iya buhaton, mabuburit ito ngan makakarag an bino pati an anit nga surudlan. Lugod, an bag-o nga bino iginsusulod ha bag-o nga anit nga surudlan.”
23 Ha adlaw han Sabbath, han naglalakat hiya ha kaumhan han trigo, an iya mga disipulo nangutos hin mga uhay samtang naglalakat.
24 Salit an mga Pariseo nagsiring ha iya: “Kitaa! Kay ano nga nagbubuhat hira han igindidiri ha adlaw han Sabbath?”
25 Binaton hi Jesus: “Waray gud ba niyo mabasa an ginbuhat ni David han naubos an iya pagkaon ngan gin-gutom hiya pati an iya kaupod nga kalalakin-an?
26 Diri ba sumala ha sumat ni Abiatar nga punoan nga saserdote, sinulod hi David ha balay han Dios ngan ginkaon an halad nga mga tinapay nga diri uyon ha balaud nga kaunon han bisan hin-o gawas la han mga saserdote, ngan gintagan liwat niya an iya kaupod nga kalalakin-an?”
27 Ngan nagsiring pa hiya: “An Sabbath ginhimo para ha kaopayan han tawo, pero an tawo waray himoa para ha Sabbath;
28 salit an Anak han tawo amo gud an Ginoo han Sabbath.”
Mga footnote
^ Kitaa an “Pariseo” ha Glossary.
