Asttiro 9:1-32

  • Ayhudati xoonido gita xoonuwa (1-19)

  • Purima baalay doommiis (20-32)

9  Adaare giyo 12tta aginawu 13tto gallassi kawuwa azazoynne A higgee polettana deꞌiyo, Ayhudatu morkketi eta xoonanawu qoppido gallassi yohoy aadhdhi wodhdhiis, qassi Ayhudati banttana ixxiyageeta xoonidosona. 2  Ayhudati banttana qohanawu koyiyageetuura olettanawu,* Kawoy Ahashuresi haariyo moottatu* ubban, bantta katamatun issippe shiiqidosona, qassi dere ubbay etawu yashshan maashido gishshawu ooninne eta xoonana danddayibeenna. 3  Qassi moottatu daannati, satirappeti,* haariyageetinne kawuwa allaalliya polissiyageeti ubbay Marddekiyosawu yayyido gishshawu Ayhudata kaafidosona. 4  Marddekiyosi kawo keettan keehi erettida asa gidiis, qassi I hayttatidoogee moottatu* ubban erettiis; ayssi giikko, Marddekiyosi kaseegaappe aaruwan erettida asa gidi gidi biis. 5  Ayhudati bantta morkketa ubbaa bisuwan busakkidosona, woridosonanne dippi oottidosona; eti banttana ixxiyageetu bolli bantta koyido aybanne oottidosona. 6  Ayhudati Shushanan* yuushoy gimbbettido sohuwan* 500 asaa woridosonanne muleera xayssidosona. 7  Qassi eti Parshshanddata, Dalifona, Asppata, 8  Porata, Adaliya, Aridata, 9  Parmmashtta, Arisaya, Aridayanne Wayzata, 10  Ayhudatu morkkiya, Hammadata naꞌaa Hamana tammu attuma naata woridosona. Shin eta wori simmidi aybanne bonqqidi ekkibookkona. 11  He gallassi, Shushanan* yuushoy gimbbettido sohuwan* hayqqida asaa qooday kawuwawu odettiis. 12  Kawee Asttiriyyo kawoy hagaadan giis: “Ayhudati Shushanan* yuushoy gimbbettido sohuwan* 500 asaanne Hamana tammu attuma naata woridosonanne muleera xayssidosona. Yaatin, hara moottatun eti worido asay ay keena gidanddee? Haꞌꞌi neeni oychchiyobay aybee? Hegee neeyyo imettana. Qassi neeni koyiyo harabay aybee? Hegee hanana.” 13  Asttira hagaadan gaada zaaraasu: “Hegee kawuwa ufayssiyaba gidikko, Shushanan* deꞌiya Ayhudati hachchi higgiyadan wonttokka oottanawu eenotay imetto; qassi Hamana tammu attuma naati mittan kaqettona.” 14  Yaaniyo gishshawu, hegee polettana mala kawoy azaziis. Shushanan* higgee awaajjettiis, qassi Hamana tammu attuma naati kaqettidosona. 15  Shushanan* deꞌiya Ayhudati Adaare aginawu 14tta gallassan zaarettidi issippe shiiqidosona, qassi eti Shushanan 300 asaa woridosona, shin aybanne bonqqidi ekkibookkona. 16  Kawuwa moottatun deꞌiya hara Ayhudatikka issippe shiiqidi bantta shemppuwawu olettidosona.* Eti banttana ixxiyageetuppe 75,000ta woriyogan bantta morkketa xayssidosona; shin eti aybanne bonqqidi ekkibookkona. 17  Hegee hanidoy Adaare aginawu 13tto gallassaana, qassi 14tto gallassan eti shemppidosona; eti he gallassan gibiraa giigissidi ufayttidosona. 18  Shushanan* deꞌiya Ayhudati 13tto gallassaaninne 14tto gallassan issippe shiiqidosona, qassi 15tto gallassan shemppidosona; eti he gallassan gibiraa giigissidi ufayttidosona. 19  Shin hara katamatun deꞌiya Ayhudati Adaare aginawu 14tto gallassan gibiraa giigissidi miiddinne uyiiddi keehi ufayttidosonanne issoy issuwawu qumaa yeddidosona. 20  Marddekiyosi hanida he ubbabaa xaafidi, Kawoy Ahashuresi haariyo moottatu* ubban mataaninne haahuwan deꞌiya Ayhudatu ubbawu dabddaabbiya kiittiis. 21  Eti Adaare aginawu 14tto gallassaanne 15tto gallassaa layttan layttan aggennan bonchchanaadan I eta azaziis, 22  ayssi giikko, he gallassatun Ayhudati bantta morkketuppe shemppidosona, qassi he aginan eta azzanoy ufayssawu, eti kayyottiyo gallassaykka miiddinne uyiiddi ufayttiyo gallassawu laamettiis. Eti hegeeta gibiraa giigissidi ufayttiyo, qassi issoy issuwawu qumaanne hiyyeesatuyyo imotaa kiittiyo gallassadan bonchchana koshshees. 23  Qassi Ayhudati bonchchiyogaa doommido ha baalaa aggennan bonchchanawunne Marddekiyosi etawu xaafidobaa oottanawu maayettidosona. 24  Ayssi giikko, Ayhudatu ubbaa morkkee, Agaga yara gidiya Hammadata naꞌay Hamani Ayhudata xayssanawu maqqiis, qassi I eta shabbirssanawunne xayssanawu Pura, hegeekka saamaa yeggiis. 25  Shin kawoy Asttira A sintti yiido wode, “Ayhudatu bolli I maqqido iita maqqoy A huuphiyawu simmo” giya azazuwa xaafidi immiis; qassi eti anne A attuma naata mittan kaqqidosona. 26  Eti he baalaa Pura* giya qaalaappe ekkidi, Purima giidoy hegaassa. Hegaa gishshawu, ha dabddaabbiyan xaafettida ubbabaappe, ha allaalliyara gayttidaagan eti beꞌidobaappe, qassi eta bolli gakkidabaappe denddidaagan, 27  eti, eta zerettatinne etaara walahettiya ubbay layttan layttan, keerettida wodiyan he naaꞌꞌu gallassata aggennan bonchchanawunne he gallassata xeelliyagan xaafettidabaa polanawu Ayhudati maacidosona. 28  He gallassata yeleta ubbay yaran yaran, moottan moottaaninne kataman kataman hassayananne bonchchana koshshees; qassi ha Purima baalay Ayhudatu giddoppe xayana bessenna, eta zerettatikka hegeeta hassayiyogaa aggana koshshenna. 29  Hegaappe guyyiyan, Ayhudati he gallassata bonchchanaadan, Abihayla naꞌiya Kawiya Asttiranne Ayhuda asa gidiya Marddekiyosi bantta kumetta maatan Purima xeelliyagan naaꞌꞌantto dabddaabbiya xaafidosona. 30  I sarotettaanne tumatettaa qaalay xaafettido dabddaabbeta Ahashuresa haaruwan, 127n moottatun deꞌiya Ayhudatu ubbawu kiittiis, 31  yaatidoy, Ayhuda asa gidiya Marddekiyosinne Kawiya Asttira eta azazidoogaadan, qassi etinne eta zerettati hegaara gayttidaagan polanawu maacidoogaadan,* xoomiyogaaninne wozanappe woossiyogan Purima gallassata keerettida wodetun bonchchanaadaana. 32  Asttirakka eti Purima baalaa bonchchanaadan azazaasu, qassi hegee maxaafan xaafettiis.

Footnotes

^ Mise, “kushiya wottanawu.”
^ Woykko “awuraajjatu.”
^ Ha bonchcho sunttaa birshshettay “haaruwa naagiyageeta;” hegee ha sohuwan, Parsse Haaruwan moottata haariyageeta qonccissees.
^ Woykko “awuraajjatu.”
^ Woykko “Susan.”
^ Woykko “kawo garuwan; qatuwan.”
^ Woykko “Susan.”
^ Woykko “kawo garuwan; qatuwan.”
^ Woykko “Susan.”
^ Woykko “kawo garuwan; qatuwan.”
^ Woykko “Susan.”
^ Woykko “Susan.”
^ Woykko “Susan.”
^ Woykko “bantta deꞌuwawu exatidosona.”
^ Woykko “Susan.”
^ Woykko “awuraajjatu.”
^ “Pura” giyogee “Saamaa.” Cora qoodan “Purima;” hegee Ayhudatu wodiya qoodan 12tta aginan bonchchettiya Ayhudatu baalaa suntta gidiis. Guj. B15 xeella.
^ Woykko “bantta shemppuwa giddidoogaadan.”