Asttiro 2:1-23
2 Hegaappe guyyiyan, Kawuwa Ahashuresa hanqqoy zarbbido wode, I Asxxina oottidobaanne I bolli kuuyettidabaa hassayiis.
2 Hegaappe simmin, kawuwa sinttan haggaaziyageeti hagaadan giidosona: “Yelaga gidida puulanchcha geelaꞌoti kawuwassi koyettona.
3 Qassi puulanchcha gidida yelaga geelaꞌota ubbaa issippe Shushanan* yuushoy gimbbettidosaa,* macca asatu keettaa* ehaanaadan kawoy ba haaruwan deꞌiya moottatu ubban kaalettiyageeta suntto. Macca asata naagiya kawuwa mureessay* Hegayi eta kaalli xeello, qassi puulattanawu* koshshiyabati etawu imettona.
4 Kawuwa keehi ufayssida yelagiya Asxxini sohuwan kawiyo gidana.” He qofay kawuwa ufayssido gishshawu I hegaadan oottiis.
5 Biniyama yara gidiya Qiisa naꞌaa, Shimeya naꞌaa, Yaꞌira naꞌaa Marddekiyosa giyo issi Ayhuda bitanee Shushanan* yuushoy gimbbettido sohuwan* deꞌees.
6 I Baabiloone Kawoy Nebukadanaxori omooddidi efiido Yihudaa Kawuwa Yekonayara* Yerusalaameppe wolqqan efiido asaa giddon deꞌees.
7 I ba aawaa ishaa naꞌiyo Hadaso,* hegeekka, Asttiro dichchidaagaa;* ayssi giikko, iyyo aawikka aayakka baawa. He yelagiya meran puulanchcha, qottankka yallisa;* qassi I aawaynne aayyiya hayqqin Marddekiyosi O ba naꞌadan dichchiis.
8 Kawuwa azazoynne A higgee awaajjettido wode, qassi Hegayi kaalli xeellanaadan yelaga macca asay daroy Shushanan* yuushoy gimbbettidosan* shiiqido wode, macca asata naagiya Hegayi kaalli xeellanaadan Asttirokka kawo keetti* efiidosona.
9 I ha yelagen ufayttiisinne O nashshiis,* yaaniyo gishshawu, puulattanawu koshshiyabatinne* dumma qumay iyyo giiganaadan sohuwara azaziis; qassi doorettida laappun macca asata kawo keettaappe iyyo mooddiis.* Qassi onne I yelaga ashkkarata macca asatu keettan* keehi loꞌꞌo sohuwawu yuushshiis.
10 Asttira ba asaabaa woy ba dabbotubaa aybanne yootabeykku; ayssi giikko, A ooyyonne yootennaadan Marddekiyosi azazi wottiis.
11 Marddekiyosi Asttiri payyatettaabaanne A waana deꞌiyakko eranawu, macca asatu keettaa dabaabaappe sintta baggaara ubba gallassi yaa haa hemettees.
12 Issi issi yelagiya macca asawu giigida, puulattanaassi 12 aginawu oottiyobay wuri simmin, ba kayay gakkiyo wode Kawuwa Ahashuresakko gelawusu; ayssi giikko, eti banttana puulayanawu* koshshiyabata oottidi poliyoy hagaadaana: usuppun aginawu karbbiya zaytiyan, qassi usuppun aginawu balasaaniya zaytiyaninne tisttettiyo dumma dummabatun puulattoosona.*
13 Hegaappe simmin, yelagiya kawuwakko gelanawu giiga uttawusu, qassi A macca asatu keettaappe* kawo keetti biyo wode, A oychchido aybikka iyyo imettees.
14 A omarssi gelawusu, yaatada, kaadumatata naagiya kawuwa mureessay Shaꞌashagazi kaalli xeelliyo macca asatu naaꞌꞌantto keettaa* maallado simmawusu. Kawoy iini keehi ufayttennabanne I sunttan O xeegennaba gidikko, A harantto kawuwakko buukku.
15 Marddekiyosi ba naꞌadan dichchido, A aawaa ishaa Abihayla naꞌiya Asttira kawuwakko geliyo kayay gakkido wode, macca asata naagiya kawuwa mureessay Hagayi yootidobaappe harabaa aybanne oychchabeykku. (He wode, Asttira bana beꞌida asa ubban nashettaasu.)
16 Kawuwa Ahashuresi haarido laappuntta layttan, tammantta aginan, hegeekka Tebeta* aginan, Asttiro kawuwakko kawo keetti efiidosona.
17 Kawoy hara macca asatu ubbaappe aaruwan Asttiro siiqiis, qassi I hara ay geelaꞌotuppekka aaruwan O nashshiisinne iini ufayttiis.* Yaaniyo gishshawu I, kawoti huuphiyan wottiyobaa* O wotissidi Asxxini sohuwan O kawoyiis.
18 Qassi kawoy ba daannatunne ba ashkkaratu ubbawu, Asttiri gishshawu gita gibiraa giigissiis. Yaatidi, moottatun* deꞌiyageetussi maarotaa* awaajjiisinne kawuwa wolqqaadan daro imotaa immiis.
19 Geelaꞌoti* naaꞌꞌanttuwa shiiqido wode Marddekiyosi kawuwa penggen uttiis.*
20 Asttira Marddekiyosi azazidoogaadan ba dabbotubaanne ba asaabaa aybanne yootabeykku. Asttira Marddekiyosi O dichchiyo wodeegaadan, I yootidobaa oottiyogaa aggabeykku.
21 He wode, Marddekiyosi kawuwa penggen uttidaashin, penggiya naagiya kawo garuwa sunttati naaꞌꞌati Bigitaninne Tereshi keehi hanqqettidi Kawuwa Ahashuresa woranawu* maqettidosona.
22 Shin Marddekiyosi hegaabaa eridi sohuwara Kawee Asttirissi yootiis. Yaatin Asttira Marddekiyosa sunttan* kawuwassi yootaasu.
23 Yaatiyo gishshawu, he allaallee pilggettiisinne tuma gidiyogee erettiis, yaatin he naaꞌꞌu asati mittan kaqettidosona; ha ubbabay, he wodiya haydaa maxaafan kawuwa sinttan xaafettiis.
Footnotes
^ Woykko “Susan.”
^ Woykko “gorppettanawu.”
^ Woykko “kawo garuwan oottiya aawatettay deꞌiyo.” Qonccissuwa xeella.
^ Woykko “macca asay deꞌiyosaa.”
^ Woykko “kawo garuwa; qatuwa.”
^ Woykko “Susan.”
^ Woykko “kawo garuwan; qatuwan.”
^ 2Ka 24:8n Yihoꞌakina geetettiis.
^ Hadas giyogee bonccoy ciliciliyonne sawiya bootta ciishshaa ciiyiya mittaa suntta.
^ Woykko “koshshiyaban maaddidaagaa.”
^ Woykko “lasassa.”
^ Woykko “Susan.”
^ Woykko “kawo garuwan; qatuwan.”
^ Woykko “garuwa.”
^ Woykko “macca asay deꞌiyosan.”
^ Woykko “I bollay gorppettanaadaaninne.”
^ Woykko “immiis.”
^ Woykko “tasenna siiquwa bessiis.”
^ Woykko “gorppettanawu.”
^ Woykko “gorppettoosona.”
^ Woykko “macca asay deꞌiyosaappe.”
^ Woykko “macca asay deꞌiyo naaꞌꞌanttosaa.”
^ Woykko “tasenna siiquwa bessiis.
^ Woykko “xaaxiyobaa.
^ Woykko “awuraajjatun.”
^ Hegee qaraxaa maariyogaa, wotaaddaratu oosuwa maariyogaa, qashettidaageeta birshshiyogaa, woy he ubbaa malaatees.
^ Woykko “yelaga macca asati.”
^ Hegee kawo garuwa suntta gidiyogaa bessees.
^ Mise, “bolli kushiya wottanawu.”
^ Woykko “gishshaa.”
