Asttiro 3:1-15
3 Hegaappe simmin, Kawoy Ahashuresi, Agaga yara gidiya, Hammadata naꞌaa Hamana gitayiis, qassi aara deꞌiya hara daannatu ubbaagaappe aadhdhiya maataa* immidi A xoqqu xoqqu oottiis.
2 Qassi, kawo penggen deꞌiya kawuwa ashkkarati ubbay Hamanawu ziggoosonanne gufannoosona; ayssi giikko, kawoy aara gayttidaagan hegaadan azaziis. Shin Marddekiyosi ziggennan woy gufannennan ixxiis.
3 Yaaniyo gishshawu, kawo penggen deꞌiya kawuwa ashkkarati Marddekiyosa, “Neeni kawuwa azazuwa shenehoo giyoy aybissee?” yaagidosona.
4 Eti ubba gallassi hegaabaa A oychchoosona, shin I eti giyobaa siyennan ixxiis. Yaatin eti Marddekiyosi haniyobay coꞌꞌu giidi xeellana bessiyabakkonne eranawu Hamanawu yootidosona; ayssi giikko, I Ayhuda gidiyogaa etawu yooti wottiis.
5 Marddekiyosi awu ziggennaaninne gufannennan ixxidoogaa Hamani beꞌidi hanqquwa eexxi kiyiis.
6 Shin Marddekiyosa xallaa woriyogee* ayyo laafaba milatiis; ayssi giikko, Marddekiyosa asaabaa eti ayyo yooti wottidosona. Yaaniyo gishshawu, Hamani Marddekiyosa asaa ubbaa, hegeekka Ahashuresa haaruwan deꞌiya Ayhudata ubbaa muleera xayssanawu keehi koyiyogaa doommiis.
7 Koyro aginan, hegeekka Niisaana* aginan, Kawuwa Ahashuresa haaruwawu 12tta layttan, eti gallassaanne aginaa shaakki eranawu Hamana sinttan Pura (hegeekka saamaa) yeggidosona; yaatin hegee Adaare* giyo 12tta aginan wodhdhiis.
8 Yaanin Hamani Kawuwa Ahashuresawu hagaadan giis: “Ne haariyo moottatu* ubban piskki giidi deretu giddon ubbasan deꞌiya, eta higgee hara ubba deretuugaappe dummatiyo issi dere asay deꞌees; eti kawuwa higgetussi azazettokkona, qassi eta coꞌꞌu giidi xeelliyogee kawuwassi loꞌꞌo gidenna.
9 Hegee kawuwa ufayssiyaba gidikko, eti xayana mala azazoy xaafetto. Kawuwa buquraa wottiyosan wottanaadan taani 10,000 bira taalanttiya* sunttatuyyo immana.”*
10 He wode kawoy ba maatafaa wottiyo migiduwa ba biradhdhiyappe kessidi, Ayhudatu morkkiyawu, Agaga yaraa Hammadata naꞌaa Hamanawu immiis.
11 Kawoy Hamana, “Nena loꞌꞌidabaa oottana mala biraynne asay neeyyo imettiis” yaagiis.
12 Yaatin, koyro aginawu 13tta gallassan kawuwa xaafeti xeegettidosona. Eti Hamani azazidobaa ubbaa kawuwa satirappetuyyo,* moottata* haariyageetuyyonne dumma dumma deriya daannatuyyo ubba moottawu* eta xuufiyan,* qassi ubba asawu eta qaalan xaafidosona. Hegee Kawuwa Ahashuresa sunttan xaafettiisinne kawoy maatafaa wottiyo migiduwan attamettiis.
13 Yelaga cima geennan, qassi naatanne macca asaakka ashshennan Ayhudata ubbaa mexi issi gallassan, Adaare giyo 12tta aginawu 13tto gallassan muleera xayssanaadan, woranaadan, dippi oottanaadaaninne eta aquwa bonqqanaadan azaziya dabddaabbeti kiitettiyageetu baggaara kawuwa moottatu* ubbawu kiitettidosona.
14 Asay he gallassawu giigettanaadan, he dabddaabbetun deꞌiyabay ubba moottan* higge gidananne dere ubbawu awaajjettana.
15 Kiitettiyageeti kawoy azazin eesuwan biidosona; qassi higgee Shushanan* yuushoy gimbbettido sohuwankka* awaajjettiis. Hegaappe simmin, kawoynne Hamani woyniya uyanawu uttidosona, shin Shushana* katamay shabbirettiis.
Footnotes
^ Mise, “A araataa bollaara wottidi.”
^ Mise, “bolli kushiya wottiyogee.”
^ Woykko “awuraajjatu.”
^ Woykko geella, “Ha oosuwa oottiyageetussi, taani 10,000 taalanttiya kawo buquraa wottiyosawu immana.”
^ Ha bonchcho sunttaa birshshettay “haaruwa naagiyageeta;” hegee ha sohuwan, Parsse Haaruwan moottata haariyageeta qonccissees.
^ Woykko “xaafuwa wogan.”
^ Woykko “awuraajjawu.”
^ Woykko “awuraajjata.”
^ Woykko “awuraajjatu.”
^ Woykko “awuraajjan.”
^ Woykko “Susan.”
^ Woykko “kawo garuwankka; qatuwankka.”
^ Woykko “Susan.”
