Asttiro 6:1-14
-
Kawoy Marddekiyosa bonchchiis (1-14)
6 He gallassi qamman kawoy xiskkana danddayibeenna.* Yaaniyo gishshawu, I he wodiya haydaa maxaafaa ehanaadan yootiis, qassi hegee kawuwassi nabbabettiis.
2 Kawuwa Ahashuresa woranawu* maqettida, penggiya naagiya kawo garuwa sunttata naaꞌꞌata, Bigitananne Teresha xeelliyagan Marddekiyosi yootidobay xaafettidaagee hegan beettiis.
3 Kawoy, “Yaatidoogawu Marddekiyosayyo ayba bonchchoy woy woytoy imettidee?” yaagidi oychchiis. Yaatin kawuwa sinttan haggaaziyageeti, “Ayyo aybinne oosettibeenna” yaagidosona.
4 Hegaappe simmin kawoy, “Dabaaban deꞌiyagee oonee?” yaagiis. He wode, Hamani Marddekiyosa kaqqanawu giigissido mittan I kaqettanaadan kawuwawu yootanawu kawo keettaa* kare dabaabaa geliis.
5 Kawuwa ashkkarati awu, “Dabaaban eqqidaagee Hamana” yaagidosona. Yaatin kawoy, “Haa gela giite” yaagiis.
6 Hamani gelin kawoy A, “Kawoy bonchchanawu koyiyo urawu aybi oosettana koshshii?” yaagiis. Hamani ba wozanan, “Taappe aaruwan kawoy bonchchanawu koyiyo uri ooni deꞌii?” yaagidi qoppiis.
7 Yaaniyo gishshawu, Hamani kawuwawu hagaadan giis: “Kawoy bonchchanawu koyiyo urawu,
8 kawoy maayiyo kawotaa maayuwanne kawoy toggiyo paraa huuphiyan kallachchaa wotissidi ehona.
9 Yaatidi, xoqqa maatay deꞌiyo kawuwa daannatuppe issoy kaalli xeellin, kawoy bonchchanawu koyiyo ura eti he maayuwa mayzzananne katamaa dabaaban paraa A togissana bessees. Eti A sinttan bantta qaalaa xoqqu oottidi, ‘Hagee kawoy bonchchanawu koyiyo urawu oosettiyabaa!’ yaagona.”
10 Kawoy sohuwara Hamanawu hagaadan giis: “Eesota! Maayuwanne paraa ekka, yaatada kawuwa penggen uttiya Ayhuda asa gidiya Marddekiyosawu ne giidoogaadan ootta. Ne giidobaappe aybanne ashshoppa.”
11 Yaaniyo gishshawu, Hamani maayuwanne paraa ekkiis, yaatidi Marddekiyosa mayzziisinne katamaa dabaaban paraa A togissiis, qassi A sinttan ba qaalaa xoqqu oottidi, “Hagee kawoy bonchchanawu koyiyo urawu oosettiyabaa!” yaagiis.
12 Hegaappe guyyiyan, Marddekiyosi kawuwa pengge simmiis, shin Hamani gullottidi azzaniiddi eesotidi ba soo biis.
13 Hamani bana gakkida ubbabaa ba keettaayee Zereshissinne ba laggetussi ubbawu yootido wode, hayyo eriya A asatinne A keettaayyiya Zeresha awu hagaadan giidosona: “Maatan neeppe dariichchida Marddekiyosi Ayhuda yara* gidikko, neeni A xoonana danddayakka; neeni A sinttan kunddanaagee qoncce.”
14 Eti aara haasayiiddi deꞌishin, kawo garuwa sunttati yiidi, Asttira giigissido gibirawu Hamana eesuwan efiidosona.
