Asttiro 7:1-10
7 Yaaniyo gishshawu, kawoynne Hamani Kawiya Asttira giigissido gibirawu biidosona.
2 Naaꞌꞌantto gallassi, woyniya gibiraa wode* kawoy Asttiro haranttuwakka hagaadan giis: “Kawee Asttiree, neeni oychchiyobay aybee? Hegee neeyyo imettana! Qassi neeni koyiyobay aybee? Haray atto, ta kawotettaappe baggaa gidiyakkokka* hegee neeyyo imettana!”
3 Kawiya Asttira hagaadan gaada zaaraasu: “Kawuwawu, neeni tanan ufayttidaba gidikko, qassi hegee nena ufayssiyaba gidikko, ta shemppuwa* ashshanaadan nena oychchays, qassi ta asaa ashshanaadankka nena woossays.
4 Ayssi giikko, taaninne ta asay muleera xayanaadan, hayqqanaadaaninne dippi gaanaadan bayzettida. Nuuni bayzettidoy attumanne macca aylledaana gidiyakko taani sirphphi gaana. Shin, ha bashshay kawuwakka qohiyo gishshawu, hegaa coꞌꞌu giidi xeellana bessenna.”
5 Yaatin, Kawoy Ahashuresi Kawee Asttirissi, “Hegee oonee, qassi hegaa malabaa oottanawu xalidaagee awan deꞌii?” yaagiis.
6 Asttira, “Nu morkkee, ha iita bitaniya Hamana” yaagaasu.
Hamani hegaa siyido wode, kawuwa sinttaaninne kawee sinttan baqibaqiis.
7 Kawoy woyniya gibiraappe hanqquwan denddidi, kawo garuwa ataakiltte sohuwa biis; shin Hamani kawoy A qaxxayanawu murttidoogaa akeekidi, ba shemppuwa* ashshanaadan Kawiyo Asttiro woossanawu denddi eqqiis.
8 Kawo garuwa ataakiltte sohuwappe woyniya gibiraa sohuwa kawoy simmi yiidi, Asttira deꞌiyo arssan Hamani gufannidaagaa beꞌiis. Kawoy dagammidi, “Hagee ta son kaweera wolqqan zinꞌꞌana haniiyye?” yaagiis. Kawoy hegaa haasayidosaara, ashkkarati Hamana somꞌꞌuwa kammidosona.
9 Kawo garuwa sunttatuppe issoy, Harbboni hagaadan giis: “Qassi Hamani, kawuwa shemppuwa ashshidabaa yootida Marddekiyosa kaqqanawu mittaa giigissiis. He mittay Hamana keettaa matan eqqiis, qassi A geesay 50 wara.”* Yaatin kawoy, “Hegaa bolli A kaqqite” yaagiis.
10 Hegaa gishshawu, Hamani Marddekiyosawu giigissido mittan eti A kaqqidosona, yaatin kawuwa hanqqoy zarbbiis.
