Asttiro 4:1-17
4 Marddekiyosi hanida ubbabaa erido wode ba maayuwa pooshshiis, qassi waaruwa* maayiisinne ba bolli bidinttaa laaliis. Yaatidi, waassiiddinne seelettidi yeekkiiddi katamaa giddo biis.
2 Waaruwa maayidi ooninne kawuwa penggiyara gelana danddayenna gishshawu, I kawuwa pengge gakkana xallawu biis.
3 Kawuwa azazoynne A awaajjoy gakkido mootta* ubban, Ayhudati keehi kayyottidosona, xoomidosona, yeekkidosonanne zilaalidosona. Daroti waaruwa bollinne bidinttaa bolli zinꞌꞌidosona.
4 Asttiri macca ashkkaratinne I mureessati yiidi hanidabaa iyyo yootido wode, kawiya keehi unꞌꞌettaasu. Yaatada, Marddekiyosi waaruwa kessidi maayana mala ayyo maayuwa kiittaasu, shin I ekkennan ixxiis.
5 He wode Asttira iyyo haggaazanaadan kawoy sunttido kawuwa mureessatuppe issuwa gidida Hataka xeesada, hanidabay aybakko Marddekiyosappe siyanaadan azazaasu.
6 Yaaniyo gishshawu, Hataki kawuwa penggiyappe sintta baggan katamaa dabaaban deꞌiya Marddekiyosakko biis.
7 Marddekiyosi hanida ubbabaanne Ayhudati xayana mala Hamani kawuwa buquraa wottiyosawu immanaassi qaalaa gelido miishshay ay keenakko ayyo yootiis.
8 Qassi eta muleera xayssanawu Shushanan* awaajjettidabay xaafettido dabddaabbiya I ayyo immiis. Hataki hegaa Asttiro bessana, hegaabaa iyyo qonccissana, qassi A kawuwakko gelada ba asawu loꞌꞌotettaa bessana mala woossanaadan iyyo yootana koshshees.
9 Hataki guyye simmidi, Marddekiyosi giidobaa Asttirissi yootiis.
10 Asttira Hataki hagaadan giidi Marddekiyosawu yootanaadan azazaasu:
11 “Attumi woy macci ooninne xeesettennan kawo keettaa giddo dabaabaa gelikko, A bolli gakkana issibay deꞌiyogaa kawuwa ashkkarati ubbaynne kawuwa moottatun* deꞌiya asay ubbay erees: higgee yootiyogaadan, I hayqqana bessees; I paxa attana danddayiyoy, kawoy ba worqqa xamꞌꞌaa akko zaariyo wode xallaana. Qassi taani kawuwakko xeesettennaasappe 30 gallassa gidiis.”
12 Asttira giidobay Marddekiyosawu odettido wode,
13 I Asttiriyyo zaaridi hagaadan kiittiis: “Neeni kawo keettan deꞌiyo gishshawu, hara Ayhudati ubbay hayqqiyo wode attana danddayays gaada qoppoppa.
14 Ayssi giikko, neeni ha saatiyan coꞌꞌu giikko, hara uri Ayhudata maaddananne ashshana, shin neeninne ne aawaa keettay xayana. Qassi neeni kawiyo gididoy hagaa mala wodiyassakkonne ooni erii?”
15 Yaatin Asttira Marddekiyosawu hagaadan gaada zaaraasu:
16 “Ba, Shushanan* deꞌiya Ayhudata ubbaa shiishsha, qassi ta gishshawu xoomite. Qamminne gallassi, heezzu gallassawu mooppite woy uyoppite. Taanikka ta macca ashkkaratuura xoomana. Higgee diggiyaba gidikkonne, taani kawuwakko gelana, qassi taani hayqqana bessikko, hayqqaagana.”
17 Yaatin, Marddekiyosi biidi, Asttira azazido ubbabaa oottiis.
