Asttiro 1:1-22
1 Hinddeppe Toophphiya* gakkanawu 127n moottata* haarida Ahashuresa* wode,
2 Shushanan* yuushoy gimbbettido sohuwan* Kawoy Ahashuresi ba kawotaa araatan uttido wode,
3 I ba haaruwa heezzantto layttan, ba daannatunne ba ashkkaratu ubbawu gibiraa giigissiis; Parssenne Meedoona olanchchati, xoqqa maataawatinne moottaa* daannati A sinttan deꞌoosona,
4 qassi I ba naanida kawotettaa duretaa, ba gitatettaanne ba bonchchuwa 180 gallassawu eta bessiis.
5 He gallassati wuri simmin, gitaappe guuttaa gakkanawu Shushanan* yuushoy gimbbettido sohuwan* shiiqida ubba asawu kawo garuwa ataakiltte sohuwa dirssaa giddon laappun gallassawu kawoy gibiraa giigissiis.
6 Muruta kiriyappenne ochchaa teera milatiya suufiyappe dooqettida wodoruwan qashettida, liinuwappe, muruta puuttuwappenne salo milatiya maayuwappe merettida magalashotun he sohoy alleeqettiis; hegeeti bira migidotun kaqettidi ibinabarade tuussatun qashettidosona, qassi profiri* giyo shuchchay, bootta ibinabaradee, inqqoynne karetta ibinabaradee hiixettidosan wottido worqqaappenne biraappe merettida arssati yan deꞌoosona.
7 Woynee worqqa wanccatun* shiiqiis; ubba wanccatikka issoy issuwappe dummatoosona, qassi kawuwa wolqqaadan keehi daro kawo woynee shiiqiis.
8 Ushshay giigidoy oonanne giddennaadan* yootiya higgiya maaraadaana; ayssi giikko, ubbaykka bana loꞌꞌidaagaadan oottana bessiyogaa kawoy ba garuwan deꞌiya sunttatussi yooti wottiis.
9 Kawuwa Ahashuresa kawo keettan* Kawiya Asxxinakka macca asawu gibiraa giigissaasu.
10 Laappuntta gallassan, kawuwa wozanay woyniya ushshan ufayttido wode, Kawuwa Ahashuresa sinttan haggaaziya, kawo garuwan oottiya laappun sunttati, hegeetikka Mehumani, Biztti, Harbboni, Bigiti, Abagiti, Zetarinne Karkkasi,
11 asaanne daannata Kawee Asxxini puulaa bessanawu, kawoti huuphiyan wottiyobaa* A wottin kawuwa sintti O ehaanaadan etawu yootiis; ayssi giikko, A keehi puulanchcha.
12 Shin Kawiya Asxxina yaanaadan kawo garuwa sunttatu baggaara kawoy azazin, A zaara zaarada ixxiis gaasu. Yaatin, kawoy keehi yiillotiis, qassi I hanqquwa eexxi kiyiis.
13 Hegaappe simmin, kawoy kasebaara* gayttidaagan ciimma akeekay deꞌiyo eranchcha asata haasayissiis (ayssi giikko, kawoy higgiyanne higge allaalleta luxidi eriya ubbaara ba allaalleta zorettees,
14 qassi I keehi ammanettiyogeeti Karshshena, Shetara, Adimata, Tarssesa, Meresa, Marssenanne Memukana; eti kawuwa sintti ubbatoo yiya, qassi kawotettan xoqqa maatay deꞌiyo Parssenne Meedoona laappun daannata).
15 Kawoy hagaadan oychchiis: “Kawo garuwa sunttatu baggaara Kawuwa Ahashuresi azazidobawu Kawiya Asxxina azazettabeenna gishshawu, higgiya maaran O waatana koshshii?”
16 Yaatin, Memukani kawuwa sinttaaninne daannatu sinttan hagaadan giis: “Kawiya Asxxina kawuwa xalla gidennan, daannata ubbaanne Kawoy Ahashuresi haariyo moottatu* ubban deꞌiya dere ubbaa naaqqaasu.
17 Ayssi giikko, kawiya oottidobaa macca asa ubbay erana, qassi eti bantta azinaa azinaa karidi hagaadan gaana: ‘Kawoy Ahashuresi Kawiyo Asxxino ba sintti ehaanaadan yootiis, shin A yeennan ixxaasu.’
18 He gallassi, kawiya oottidobaa eriya Parssenne Meedoona daannatu machchoti ibaa bantta azinaara azinaara haasayana, hegaa gaasuwan toosheenne yiilloy ubbasan darana.
19 Hegee kawuwawu loꞌꞌo milatikko, Asxxina Kawuwa Ahashuresa sintti harantto mule yeennaadan kawoy awaajjisso, qassi hegee shaarettenna Parssenne Meedoona higgetu giddon xaafetto; qassi kawoy I kawotettaa maataa ippe kehiya hara maccaaseessi immo.
20 Kawuwa awaajjuwa aaho gidida A haaruwan ubbasan deꞌiya asay siyiyo wode, machchoti ubbay bantta azinaa azinaa gitaappe guuttaa gakkanawu bonchchana.”
21 Ha qofay kawuwanne daannata ufayssiis, qassi kawoy Memukani giidobaa oottiis.
22 Hegaa gishshawu, azini ubbi ba son goda* gidanaadaaninne ba asaa qaalaa haasayanaadan, I ba haaruwan deꞌiya moottatu* ubbaassi, ubba moottawu* eta xuufiyan,* qassi ubba asawu eta qaalan xaafidi dabddaabbiya kiittiis.
Footnotes
^ Woykko “Kusha.”
^ Woykko “awuraajjata.”
^ Gita Daariyosa (Dariyosa Hestasppisa) naꞌaa Zerkkisesa Koyruwa gidiyabadan qofettees.
^ Woykko “Susa.”
^ Woykko “kawo garuwan; qatuwan.”
^ Woykko “awuraajjaa.”
^ Woykko “Susan.”
^ Woykko “kawo garuwan; qatuwan.”
^ Darotoo, bootta caccaray deꞌiyo, dulkka zoꞌonne keehi alꞌꞌo gidida mino shuchchaa qommo.
^ Woykko “miishshatun; burccukkotun.”
^ Woykko “zawaa wottennaadan.”
^ Woykko “kawo garuwan.”
^ Woykko “huuphiyan xaaxiyobaa.”
^ Woykko “oosettiyo maaraara.” Mise, “wodetuura.”
^ Woykko “awuraajjatu.”
^ Woykko “huuphe.”
^ Mise, “kawuwa awuraajjatu.”
^ Woykko “awuraajjawu.”
^ Woykko “xaafuwa wogan.”
