Asttiro 8:1-17
8 He gallassi, Kawoy Ahashuresi Ayhudatu morkkiya Hamana aquwa ubbaa Kawee Asttirissi immiis; qassi Marddekiyosi ba dabbo gidiyogaa Asttira erissa wottido gishshawu I kawuwa sintti yiis.
2 Yaatin, kawoy Hamanappe wotti ekkido ba maatafaa wottiyo migiduwa kessidi Marddekiyosawu immiis. Qassi Asttira Hamana aquwa ubbaa bolli aawatanaadan Marddekiyosa sunttaasu.
3 Hegaa bollikka, Asttira kawuwa haranttuwa haasayissaasu. A kawuwa tohuwan kunddada yeekkaydda, Agaga yara gidiya Hamani oottido qohiyabaanne Ayhudatu bolli I maqqidobaa digganaadan woossaasu.
4 Kawoy worqqa xamꞌꞌaa Asttirikko zaariis, yaatin Asttira denddada kawuwa sinttan eqqaasu.
5 A hagaadan gaasu: “Hegee kawuwa ufayssiyabanne I tana nashshidaba gidikko, qassi hegee kawuwawu bessiyaba milatidi beettikkonne I tanan ufayttiyaba gidikko, Agaga yaray, Hammadata naꞌay, iitabaa maqqida Hamani kawuwa moottatu* ubban deꞌiya Ayhudata xayssanawu xaafissidobay shaarettana mala, azazoy xaafetto.
6 Ayssi giikko, ta asaa bolli gakkana bashshaa taani waana eqqa xeellana danddayiyanaa, qassi ta dabboti xayishin beꞌaydda waana genccana danddayiyanaa?”
7 Hegaa gishshawu, Kawoy Ahashuresi Kawee Asttirissinne Ayhuda asa gidiya Marddekiyosawu hagaadan giis: “Hekko! Hamani Ayhudata qohanawu maqqido* gishshawu, A aquwa ubbaa taani Asttiriyyo immaasinne mittan A kaqissaas.
8 Kawuwa sunttan xaafettidanne kawoy maatafaa wottiyo migiduwan attamettida azazoy shaarettana danddayenna gishshawu, Ayhudatuura gayttidaagan intteyyo loꞌꞌo milatida aybanne kawuwa sunttan haꞌꞌi xaafidi, kawoy maatafaa wottiyo migiduwan hegaa attamana danddayeeta.”
9 Yaaniyo gishshawu, he wode heezzantta aginan, hegeekka Siwana* aginan, 23tto gallassan kawuwa xaafeti xeegettidosona. Qassi eti Marddekiyosi azazidobaa ubbaa Ayhudatuyyo, hegaadankka satirappetuyyo,* haariyageetuyyo, Hinddeppe Toophphiya gakkanawu deꞌiya moottatu* daannatuyyo, hegeekka 127n moottatuyyo,* ubba moottawu* eta xuufiyaninne* ubba asawu eta qaalan, qassi Ayhudatuyyo eta xuufiyaninne* eta qaalan xaafidosona.
10 I hegaa Kawuwa Ahashuresa sunttan xaafidi, kawoy maatafaa wottiyo migiduwan attamiisinne azazoy xaafettido dabddaabbeta paraa toggidi kiitettiyageetu bolli kiittiis; eti, kawuwa oosuwawu goꞌettiyo kiitaa efiyo eesotiya parata toggidosona.
11 Dumma dumma katamatun deꞌiya Ayhudati ubbay issippe shiiqidi bantta shemppuwawu* olettanaadan, qassi eta qohana danddayiya ay deriya woy ay moottaa* olanchchata awugeetanne gidin, macca asaanne naatakka ashshennan, muleera xayssanaadan, woranaadaaninne dippi oottanaadan, qassi eta aquwa bonqqanaadan kawoy eeno giidobay he dabddaabbetun deꞌees.
12 Hegee, Adaare* giyo 12tta aginawu 13tto gallassan, Kawoy Ahashuresi haariyo moottatu* ubban issi gallassan polettanaadan maacettiis.
13 He dabddaabbiyan xaafettidabay* moottatu* ubban higge gidiis. He gallassi Ayhudati bantta morkketu bolli haluwa kiyanawu giigettana mala, hegee dere ubbawu awaajjettiis.
14 Kiitaa efiyo, kawuwa oosuwawu goꞌettiyo parata toggiya kiitettiyageeti, kawoy azazin dirbbiiddinne eesotiiddi kiyidosona. Higgee Shushanan* yuushoy gimbbettido sohuwankka* awaajjettiis.
15 Marddekiyosi salo milatiyanne bootta kawotaa maayuwa maayidi, bonchcho worqqa kallachchaa huuphiyan wottidi, qassi muruta carqqiyappenne ochcha teera milatiya suufiyappe giigida afalaa bollaara maayidi kawuwa sinttappe kiyiis. Qassi Shushana* katamaa asay ufayssan poocammiis.
16 Ayhudati woppaa* demmidosona, ufayttidosonanne poocammidosona, qassi asan bonchchettidosona.
17 Kawuwa azazoynne A higgee gakkido moottatu* ubbaaninne katamatu ubban Ayhudati gibiraa giigissidi miiddinne uyiiddi keehi ufayttidosonanne poocammidosona. Biittan deꞌiya deretuppe daroti Ayhudatuyyo yashshan maashido gishshawu banttana Ayhuda giidosona.*
Footnotes
^ Woykko “awuraajjatu.”
^ Mise, “ba kushiya miccido.”
^ Ha bonchcho sunttaa birshshettay “haaruwa naagiyageeta;” hegee ha sohuwan, Parsse Haaruwan moottata haariyageeta qonccissees.
^ Woykko “awuraajjatu.”
^ Woykko “awuraajjatuyyo.”
^ Woykko “awuraajjawu.”
^ Woykko “xaafuwa wogaaninne.”
^ Woykko “xaafuwa wogaaninne.”
^ Woykko “awuraajjaa.”
^ Woykko “deꞌuwawu.”
^ Woykko “awuraajjatu.”
^ Woykko “duuqetti xaafettidabay.”
^ Woykko “awuraajjatu.”
^ Woykko “Susan.”
^ Woykko “kawo garuwankka; qatuwankka.”
^ Woykko “Susa.”
^ Mise, “pooꞌuwa.”
^ Woykko “awuraajjatu.”
^ Woykko “Ayhuda gididosona.”
