Asttiro 5:1-14
5 Heezzantto gallassi, Asttira ba kawotaa maayuwa maayada, kawo keettawu baazzan, kawo keettaa* giddo dabaaban eqqaasu. Kawo keettan, geliyosawu baazzan kawoy ba kawotaa araatan uttiis.
2 Kawiya Asttira dabaaban eqqidoogaa kawoy beꞌidosaara iini ufayttiis, qassi kawoy ba kushiyan oyqqido worqqa xamꞌꞌaa Asttirikko zaariis. Yaatin Asttira shiiqada xamꞌꞌaa xeeraa bochchaasu.
3 Kawoy O hagaadan giidi oychchiis: “Kawee Asttiree, nena aybee metiday? Neeni koyiyobay aybee? Haray atto, ta kawotettaappe baggaa gidiyakkokka* hegee neeyyo imettana!”
4 Asttira hagaadan gaada zaaraasu: “Hegee kawuwa ufayssiyaba gidikko, kawoy taani ayyo giigissido gibirawu hachchi Hamanaara yo.”
5 Yaaniyo gishshawu, kawoy ba asawu, “Asttira oychchidoogaadan, eesuwan yaana mala Hamanawu yootite” yaagiis. Yaatin, kawoynne Hamani Asttira giigissido gibirawu biidosona.
6 Woyniya gibiraa wode* kawoy Asttiro hagaadan giis: “Neeni oychchiyobay aybee? Hegee neeyyo imettana! Qassi neeni koyiyobay aybee? Haray atto, ta kawotettaappe baggaa gidiyakkokka* hegee neeyyo imettana!”
7 Asttira hagaadan zaaraasu: “Taani oychchiyobaynne koyiyobay hagaa:
8 Kawoy tanan ufayttidaba gidikko, qassi taani oychchidobaa immiyogeenne taani koyiyobaa oottiyogee kawuwa ufayssiyaba gidikko, taani etawu wontto giigissana gibirawu kawoynne Hamani yona; qassi taani kawoy oychchidoogaadan wontto oottana.”
9 He gallassi, Hamani poocammiiddinne wozanan ufayttiiddi kiyiis. Shin Hamani kawuwa penggen Marddekiyosa beꞌido wode, I denddi eqqibeennaagaanne awu aybanne yayyibeennaagaa akeekidi, Hamani Marddekiyosa bolli hanqquwa eexxi kiyiis.
10 Gidoppe attin, Hamani hanqquwa mittidi ba soo biis. Yaatidi, ba laggetanne ba keettayiyo Zeresho xeegissiis.
11 Hamani ba gita duretettaabaa, ba attuma naatu coratettaabaa, kawoy A ay keena gitayidaakko, qassi daannatuppenne kawuwa ashkkaratuppe A ay keena xoqqu xoqqu oottidaakko otoruwan yootiis.
12 Hamani gujjidi hagaadan giis: “Ay hegaa xallee! Kawiya Asttira ba giigissido gibirawu kawuwara yaanaadan taappe haraa oonanne shoobbabeykku. Qassi, iiranne kawuwara maanaadan wonttokka shoobettaas.
13 Shin, ha Ayhuda Marddekiyosi kawuwa penggen uttidaagaa beꞌiyo wode, he ubbabaykka tana ufayssenna.”
14 Yaatin, A keettaayyiya Zereshanne A laggeti ubbay awu hagaadan giidosona: “Geesay 50 wara* gidiyo mittaa esissa. Qassi maallado Marddekiyosi hegaa bolli kaqettanaadan kawuwassi yoota. Yaatada, gibiran ufayttanawu kawuwara ba.” Ha qofay Hamana ufayssido gishshawu, I mittaa esissiis.
