Evangeli Ya Luka 9:1-62

  • Vhafunziwa vha 12 vha vhudzwa nḓila ine vha tea u huwelela ngayo (1-6)

  • Herode ha ḓivhi uri Yesu ndi nnyi (7-9)

  • Yesu u ṋea zwiḽiwa vha 5 000 (10-17)

  • Petro u amba uri Yesu ndi Kristo (18-20)

  • Hu porofitiwa nga ha lufu lwa Yesu (21, 22)

  • Zwine u vha mufunziwa wa ngoho zwa amba zwone (23-27)

  • Yesu u a shanduka (28-36)

  • Hu fhodzwa mutukana a re na dimoni (37-43a)

  • Hu dovha ha porofitiwa nga ha lufu lwa Yesu (43b-45)

  • Vhafunziwa vha ṱaṱa khani nga ha uri muhulwane khavho ndi nnyi (46-48)

  • A sa lwi na riṋe u ima na riṋe (49, 50)

  • Vha muḓanani wa Samaria a vha ṱanganedzi Yesu (51-56)

  • Nḓila ya u tevhela Yesu (57-62)

9  Yesu a kuvhanganya vhafunziwa vhawe vha 12 a vha ṋea maanḓa a u pandela madimoni oṱhe+ na a u fhodza malwadze.+ 2  A vha ruma uri vha ye u huwelela nga ha Muvhuso wa Mudzimu na u fhodza, 3  a amba navho a ri: “Ni tshi fara lwendo ni songo ṱuwa na tshithu, ni songo ṱuwa na lubaḓa kana mukhwama wa zwiḽiwa kana vhurotho kana tshelede;* kana zwiṅwe zwiambaro.*+ 4  Nnḓu ine na dzhena khayo, ni dzule khayo u swika ni tshi ṱuwa.+ 5  Hoṱhe hune na si ṱanganedzwe, ni fhufhure buse ḽi re milenzheni musi ni tshi ṱuwa kha wonoyo muḓi uri zwi vhe vhuṱanzi khavho.”+ 6  Vha ya miḓanani vha tshi khou huwelela mafhungo maḓifha na u fhodza.+ 7  Herode* muvhusi wa tshiṱiriki a pfa nga ha zwithu zwoṱhe zwe zwa vha zwi tshi khou itea, a hanganea zwihulu ngauri vhaṅwe vho vha vha tshi khou ri Yohane o vuswa vhafuni,+ 8  fhedzi vhaṅwe vho vha vha tshi ri Elia o vuwa, vhaṅwe vha tshi ri ho vuwa muṅwe wa vhaporofita vha kale.+ 9  Herode a ri: “Yohane ndo mu tumula ṱhoho.+ Zwino ndi nnyi uyu ane nda pfa hu tshi ambiwa nga hae?” Herode o vha a tshi ṱoḓa u vhona onoyo muthu.+ 10  Musi vhaapostola vha tshi vhuya, vha vhudza Yesu zwoṱhe zwe vha zwi ita.+ A ya muḓini une wa pfi Betsaida e na vhaapostola fhedzi.+ 11  Fhedzi gogo ḽa zwi ḓivha, ḽa mu tevhela. A ḽi ṱanganedza nga vhulenda, a amba naḽo nga ha Muvhuso wa Mudzimu, a fhodza vha lwalaho.+ 12  Musi ḽi tshi vho kovhela, vhaapostola vha 12 vha ḓa vha amba nae vha ri: “Vha litshe vha ṱuwe, uri vha kone u ya miḓanani na mivhunduni vha ṱoḓe vhudzulo na zwiḽiwa, ngauri ri kule na miḓi.”+ 13  A amba navho a ri: “Inwi vha ṋeeni zwiḽiwa.”+ Vhone vha ri: “Ri tou vha na ḽofo ṱhanu na khovhe mbili. Kani ri ye u rengela vhenevha vhathu vhoṱhe zwiḽiwa?” 14  Ho vha hu na vhanna vha ṱoḓaho u vha 5 000. A amba na vhafunziwa vhawe a ri: “Vha dzudzeni nga zwigwada, ni ite uri tshigwada tshiṅwe na tshiṅwe tshi vhe na vhathu vha ṱoḓaho u vha 50.” 15  Vha ita zwenezwo, vha dzudza vhathu vhoṱhe fhasi. 16  A dzhia dziḽa ḽofo ṱhanu na khovhe mbili, a lavhelesa ṱaḓulu, a zwi fhaṱutshedza. A zwi ṅwatekanya, a zwi ṋea vhafunziwa vhawe uri vha ṋee gogo. 17  Vhoṱhe vha ḽa vha fura, vha kuvhanganya matshakatshaka o salaho, a ḓadza mimanngi ya 12.+ 18  Ḽiṅwe ḓuvha musi Yesu a tshi khou rabela e eṱhe, vhafunziwa vha ḓa khae, a vha vhudzisa a ri: “Vhathu vha ri ndi nṋe nnyi?”+ 19  Vhone vha ri: “Vhaṅwe vha ri ndi iwe Yohane Mulovhedzi, vhaṅwe vha ri ndi iwe Elia, ngeno vhaṅwe vha tshi ri u muṅwe wa vhaporofita vha kale vho vuswaho.”+ 20  Ene a ri: “Inwi ni ri ndi nṋe nnyi?” Petro a ri: “Ndi iwe Kristo o rumiwaho nga Mudzimu.”+ 21  A amba navho uri vha si vhudze muthu,+ 22  fhedzi a ri: “Murwa muthu u tea u tambudzwa nga maanḓa na u landulwa nga vhahulwane na nga vhahulwane vha vhotshifhe na nga vhamaṅwalo, u ḓo vhulawa,+ a vuswa nga ḓuvha ḽa vhuraru.”+ 23  A amba na vhoṱhe a ri: “Arali muthu a tshi ṱoḓa u ntevhela, nga a ḓihangwe,+ a hwale danda* ḽawe a dzule a tshi ntevhela.+ 24  Ngauri ane a ṱoḓa u tsireledza vhutshilo hawe u ḓo fa, ane a fa a tshi itela nṋe u ḓo tshila.+ 25  Ngauri muthu u ḓo vhuyelwa ngani arali a wana zwithu zwoṱhe shangoni, fhedzi a xelelwa ngazwo kana a fa?+ 26  Ngauri ane a shona nṋe na zwine nda zwi amba, Murwa muthu u ḓo mu shona musi a tshi ḓa e vhugalani hawe, ha Khotsi awe na ha vharuṅwa vhakhethwa.+ 27  Ngoho ndi a ni vhudza uri, hu na vhaṅwe vho imaho henefha vhane vha sa ḓo fa vha songo thoma vha vhona Muvhuso wa Mudzimu.”+ 28  Musi ho no fhela maḓuvha a ṱoḓaho u vha malo o amba eneo mafhungo, a gonya thavhani na Petro, Yohane na Yakobo u itela u rabela.+ 29  Musi a tshi khou rabela, tshifhaṱuwo tshawe tsha shanduka, zwiambaro zwawe zwa tshena sa tshedza. 30  Vha vhona vhanna vhavhili vha tshi khou amba na Yesu; vhenevho vhanna ho vha hu Mushe na Elia. 31  Vhenevho vho vhonala vhe vhugalani vha tshi khou amba nae nga ha u ṱuwa hawe na uri zwenezwo zwo vha zwi tshi fanela u itea Yerusalema.+ 32  Petro na vhe a vha e navho vho vha vho farwa nga khofhe, fhedzi musi vha tshi vuwa, vha vhona Yesu e vhugalani hawe+ na vhanna vhavhili vhe a vha o ima navho. 33  Musi vhenevho vhanna vha tshi vho ṱuwa, Petro a amba na Yesu a ri: “Mufunzi, ndi zwavhuḓi ri fhano. Kha ri athe madennde mararu, ḽiṅwe ḽi ḓo vha ḽau, ḽiṅwe ḽa vha ḽa Mushe, ḽiṅwe ḽa vha ḽa Elia.” O vha a sa ḓivhi zwine a khou zwi amba. 34  Musi a tshi kha ḓi amba zwenezwo zwithu, ha ḓa gole, ḽa vha tibedza. Musi ḽi tshi khou vha tibedza, vha tshuwa. 35  Ha pfala ipfi+ ḽi tshi bva kha gole, ḽa ri: “Hoyu ndi Murwa wanga, we nda mu nanga.+ Ni mu thetshelese.”+ 36  Musi hu tshi pfala ipfi, vha vhona Yesu e eṱhe. Fhedzi vha fhumula, vha si vhudze muthu nga tshenetsho tshifhinga nga ha zwe vha zwi vhona.+ 37  Nga ḓuvha ḽi tevhelaho, musi vha tshi khou bva thavhani, vha ṱanganedzwa nga vhathu vhanzhi.+ 38  Muṅwe we a vha e vhukati ha vhathu, a vhidzelela a ri: “Mufunzi, ndi khou humbela uri u ḓe u vhone murwa wanga muthihi fhedzi.+ 39  Dimoni ḽi tshi mu dzhena ḽi ita uri a ṱavhe mukosi nga u ṱavhanya, ḽa ita uri a rahe-rahe, a bvise bulo nga mulomo, ḽa mu vhaisa ḽa kona u bva khae. 40  Ndo humbela vhafunziwa vhau uri vha ḽi pandele, fhedzi vha kundelwa.” 41  Yesu a ri: “Inwi vha murafho u si na lutendo na wo tshinyalaho,+ ndi ḓo dzula na inwi u swika lini? Ndi ḓo ni konḓelela u swika lini? Ḓisa murwa wau ngeno.”+ 42  Musi mutukana a tshi khou ya kha Yesu, dimoni ḽa mu wisela fhasi, ḽa ita uri a rahe-rahe. Fhedzi Yesu a kaidza ḽeneḽo dimoni, a fhodza onoyo mutukana, a mu ṋea khotsi awe. 43  Vhathu vhoṱhe vha mangadzwa nga maanḓa mahulwane a Mudzimu. Musi vha tshee vho mangadzwa nga zwoṱhe zwe a vha a tshi khou zwi ita, a amba na vhafunziwa vhawe a ri: 44  “Thetshelesani nga vhuronwane, ni dzule ni tshi humbula uri Murwa muthu u ḓo kumedzelwa zwanḓani zwa vhathu.”+ 45  Fhedzi a vho ngo pfesesa zwe a vha a tshi khou zwi amba. Ngauri vho vha vha songo dzumbululelwa zwone, vha ofha na u mu vhudzisa nga zwe a vha a tshi khou zwi amba. 46  Ha vha na khani vhukati havho ya uri ndi nnyi muhulwane khavho.+ 47  Nge Yesu a vha a tshi ḓivha zwi re mbiluni dzavho, a dzhia ṅwana a mu imisa tsini hawe, 48  a amba navho a ri: “Ane a ṱanganedza hoyu ṅwana a tshi itela dzina ḽanga u ṱanganedza na nṋe, ane a nṱanganedza u ṱanganedza na We a nthuma.+ Ane a ḓiṱukufhadza vhukati haṋu noṱhe ndi ene muhulwane.”+ 49  Yohane a ri: “Mufunzi, ro vhona muṅwe munna a tshi khou pandela madimoni a tshi shumisa dzina ḽau, ra lingedza u mu thivhela ngauri a si muṅwe washu.”+ 50  Yesu a ri: “Ni songo lingedza u mu thivhela, ngauri a sa lwi na inwi u ima na inwi.” 51  Musi maḓuvha a uri a gonye ṱaḓulu a tshi vho sendela,+ a ḓiimisela u ya Yerusalema. 52  A ruma vhaḓinḓa uri vha mu range phanḓa. Vha ya muḓanani wa Vhasamaria uri vha mu lugiselele hone. 53  Fhedzi vha si mu ṱanganedze+ ngauri o vha o ḓiimisela u ya Yerusalema. 54  Musi vhafunziwa vhawe Yakobo na Yohane+ vha tshi vhona zwenezwi, vha ri: “Murena, naa u ṱoḓa ri tshi vhidza mulilo u bvaho ṱaḓulu uri u vha fhelise?”+ 55  A rembuluwa a vha kaidza. 56  Vha ya kha muṅwe muḓana. 57  Musi vhe nḓilani, muṅwe muthu a ri: “Ndi ḓo u tevhela hoṱhe hune wa ya.” 58  Yesu a ri: “Phunguwe dzi na milindi, na zwiṋoni zwi na zwiṱaha, fhedzi Murwa muthu ha na nnḓu.”*+ 59  A amba na muṅwe a ri: “Ntevhele.” Onoyo munna a ri: “Murena, ntendele ndi thome ndi ye u vhulunga khotsi anga.”+ 60  Yesu a ri: “Litsha vhafu+ vha vhulunge vhafu vhavho, hone iwe tshimbila u ḓivhadze nga ha Muvhuso wa Mudzimu fhethu hoṱhe.”+ 61  Muṅwe a ri: “Ndi ḓo u tevhela Murena, fhedzi ntendele ndi thome u onesana na vha nnḓu yanga.” 62  Yesu a ri: “Ane a vhea tshanḓa tshawe kha dzembe, a lavhelesa zwi re murahu,+ ho ngo fanelwa nga Muvhuso wa Mudzimu.”+

Ṱhaluso dzi re magumoni a siaṱari

^ Thevhedz., “siḽiva.”
^ Thevhedz., “zwiambaro zwivhili.”
^ Ndi Herode Antipa. Sedzani Mutevhe Wa Ṱhalutshedzo Ya Maipfi.
^ Thevhedz., “ha na fhethu hune a eḓela hone.”

Copyrights for this publication