Evangeli Ya Luka 24:1-53
24 Nga matsheloni-tsheloni nga ḓuvha ḽa u thoma ḽa vhege, vhafumakadzi vha ya vhiḓani vho fara mishonga ye vha i lugiselela.+
2 Fhedzi vha wana tombo ḽo phiguluselwa kule na vhiḓa,+
3 vha tshi dzhena vhiḓani, vha wana tshitumbu tsha Murena Yesu tshi siho.+
4 Musi vha tshee vho mangadzwa nga zwenezwo, ha bvelela vhanna vhavhili vho ambara zwiambaro zwi penyaho.
5 Vhenevho vhafumakadzi vha ofha vha kwatama. Vhenevho vhanna vha ri: “Ndi ngani ni tshi khou ṱoḓa a tshilaho vhukati ha vhafu?+
6 Haho fhano, o vuswa. Humbulani zwe a ni vhudza ni ngei Galilea,
7 a tshi amba uri Murwa muthu u fanela u kumedzelwa kha vhaitazwivhi, a ombelwe kha danda, a vuswe nga murahu ha maḓuvha mararu.”+
8 Vha humbula zwe a zwi amba,+
9 vha ṱuwa henefho vhiḓani vha vhudza vhaapostola vha 11 na vhaṅwe vhoṱhe zwenezwo zwithu zwoṱhe.+
10 Vhe vha vhudza vhaapostola nga ha zwe zwa itea ho vha hu Maria Magdalena, Yohana, Maria mme a Yakobo na vhaṅwe vhafumakadzi vha re navho.
11 Fhedzi vhaapostola vha si tende zwe vha vhudzwa nga vhenevha vhafumakadzi ngauri khavho zwo vha zwi sa pfali.
12 Petro a gidimela vhiḓani, a ṱolela, a vhona ho sala malabi a ḽinene fhedzi. A ṱuwa a tshi khou ḓivhudzisa nga ha zwe zwa itea.
13 Nga ḽeneḽo ḓuvha, vhanna vhavhili vho vha vho fara lwendo lwa u ya muḓanani une wa pfi Emausi, we wa vha u khilomithara dzi ṱoḓaho u vha 11 u bva Yerusalema,
14 vho vha vha tshi khou amba nga ha zwe zwa itea.
15 Musi vha tshi khou amba na u haseledza, Yesu a sendela a tshimbila navho,
16 fhedzi vha si mu ḓivhe.+
17 A amba navho a ri: “Ni khou amba nga ha mini?” Vha ima vho ṱungufhala.
18 Kleopasi a mu fhindula a ri: “Naa u tou vha mutsinda ane a si ḓivhe* zwe zwa itea maḓuvhani o fhiraho ngei Yerusalema?”
19 Yesu a ri: “Ho itea mini?” Vhone vha ri: “Naa a u ḓivhi zwe zwa itea kha Yesu wa Nazaretha?+ O sumbedza uri u muporofita a re na maanḓa phanḓa ha Mudzimu na vhathu, nga zwe a zwi ita na u zwi amba.+
20 Vhahulwane vha vhotshifhe na vhavhusi vhashu vho mu kumedzela uri a haṱulelwe lufu,+ vha mu ombela kha danda.
21 Fhedzi ro vha ro humbula uri hoyu munna ndi ene ane a ḓo vhofholola Isiraele.+ Zwiṅwe hafhu, heḽi ndi ḓuvha ḽa vhuraru u bva tshee zwa itea.
22 Naho zwo ralo, vhaṅwe vhafumakadzi vhane vha vha vhaṅwe nga riṋe vho ri mangadza, ngauri vho ya vhiḓani nga matsheloni-tsheloni+
23 fhedzi vha si wane tshitumbu tshawe, vha amba uri vho vhona vharuṅwa, vhe vha amba uri u khou tshila.
24 Vhaṅwe vhashu vho ya vhiḓani,+ vha wana zwe vhafumakadzi vha zwi amba zwi zwone, fhedzi ene vha si mu vhone.”
25 A amba navho a ri: “Inwi vha si na ṱhalukanyo na vhane vha lenga u tenda! Ndi ngani ni sa tendi zwo ambiwaho nga vhaporofita?
26 Naa Kristo o vha a songo fanela u tambudzwa nga yeneyi nḓila+ uri a kone u dzhena vhugalani hawe?”+
27 A vha ṱalutshedza zwithu zwoṱhe zwi re Maṅwaloni zwi ambaho nga hae, u thoma maṅwaloni a Mushe na a Vhaporofita vhoṱhe.+
28 Vha tshi swika tsini na muḓanani we vha vha vha tshi khou ya khawo, a ita u nga u kha ḓi fhirela phanḓa.
29 Fhedzi vha mu kombetshedza uri a songo fhirela phanḓa, vha ri: “Dzula na riṋe ngauri ḓuvha ḽo no kovhela.” Musi a tshi pfa zwenezwo, a dzhena a dzula navho.
30 Musi o dzula navho ṱafulani, a dzhia vhurotho a vhu fhaṱutshedza, a vhu ṅwatekanya, a vha ṋea hone.+
31 Musi vha tshi vhona zwenezwo, maṱo avho a bonyolowa vha mu ḓivha, fhedzi ene vha si tsha mu vhona.+
32 Vha amba nga tshavho vha ri: “Naa ho ngo ri kwama mbilu* musi a tshi khou amba na riṋe nḓilani, a tshi khou ri ṱalutshedza Maṅwalo?”
33 Vha takuwa nga tshenetsho tshifhinga vha vhuyelela Yerusalema, vha wana vhaapostola vha 11 na vho kuvhanganaho navho,
34 vha tshi ri: “Ngangoho Murena o vuswa, o vhonwa nga Simoni!”+
35 Vhaḽa vhafunziwa vhavhili vha ṱalutshedza zwe zwa itea nḓilani na uri vho mu ḓivha musi a tshi ṅwatekanya vhurotho.+
36 Musi vha tshi kha ḓi amba, Yesu a ima vhukati havho a ri: “Mulalo nga u vhe na inwi.”+
37 Fhedzi vha ofha, vha tshi humbula uri vha khou vhona tshivhumbiwa tsha muya.
38 A vha vhudzisa a ri: “Ni khou ofha mini, ndi ngani ni tshi khou timatima?
39 Vhonani zwanḓa zwanga na milenzhe yanga, uri ni vhone uri ndi nṋe; mpfareni ni pfe, ngauri tshivhumbiwa tsha muya a tshi na ṋama na marambo samusi ni tshi khou zwi vhona uri nṋe ndi nazwo.”
40 Musi a tshi khou amba zwenezwo, a vha sumbedza zwanḓa zwawe na milenzhe.
41 Musi vha sa khou tenda nga nṱhani ha dakalo na nga u mangala, a vha vhudzisa a ri: “Naa ni na zwiḽiwa?”
42 Vha mu ṋea khovhe yo gotshiwaho,
43 a i dzhia a i ḽa vha tshi zwi vhona.
44 A amba navho a ri: “Zwenezwi ndi zwe nda ni vhudza musi ndi tshi kha ḓi vha na inwi+ uri zwithu zwoṱhe zwo ṅwaliwaho nga ha nṋe kha Mulayo wa Mushe na kha maṅwalo a Vhaporofita na kha Dziphisalema zwi tea u itea.”+
45 A ita uri vha kone u pfesesa nga vhuḓalo zwine Maṅwalo a amba zwone,+
46 a amba navho a ri: “Ndi zwone zwe ha ṅwaliwa ha pfi Kristo u ḓo tambudzwa, a vuswa vhafuni nga ḓuvha ḽa vhuraru,+
47 kha tshaka dzoṱhe hu ḓo ḓivhadzwa+ u rembuluwa na u hangwelwa dzinani ḽawe,+ u thoma Yerusalema.+
48 Ni ḓo vha ṱhanzi dza enea mafhungo.+
49 Ndi ḓo ni rumela zwe Khotsi anga a fhulufhedzisa. Ni dzule muḓini u swika ni tshi ṋewa maanḓa a bvaho ṱaḓulu.”+
50 Fhedzi a tshimbila navho u swika Bethania, a imisa zwanḓa a rabela a vha fhaṱutshedza.
51 Musi a tshi khou vha fhaṱutshedza, a ṱuwa vhukati havho a takulelwa ṱaḓulu.+
52 Vha mu losha* vha humela Yerusalema vho takala zwihulu.+
53 Vho vha vha tshi dzula vhe thembeleni vha tshi khou renda Mudzimu.+
