Evangeli Ya Luka 10:1-42
10 Nga murahu ha zwenezwo, Murena a nanga vhaṅwe vha 70, a vha ruma nga vhavhili nga vhavhili+ uri vha mu range phanḓa vha ye miḓini yoṱhe na hoṱhe he a vha a tshi ṱoḓa u ya hone.
2 A amba na vhafunziwa vhawe a ri: “Khaṋo ndi khulu, fhedzi vhakaṋi a si vhanzhi. Humbelani Muṋe wa khaṋo uri a rumele vhakaṋi khaṋoni yawe.+
3 Ni ṱhogomele! Ndi khou ni ruma sa nngu dzi yaho vhukati ha maṱarelwa.*+
4 Ni songo ṱuwa na tshelede kana mbuvha kana thovho,*+ ni songo fhedza tshifhinga ni tshi khou lumelisa muthu nḓilani.
5 Nḓuni dzoṱhe dzine na ḓo dzhena khadzo, ni thome nga uri: ‘Ngavhe ino nnḓu i tshi vha na mulalo.’+
6 Arali hu na ane a funa mulalo henefho, mulalo waṋu u ḓo vha khae. Fhedzi arali a siho, mulalo u ḓo vhuyelela kha inwi.
7 Ni dzule kha nnḓu+ ya ane a funa mulalo, ni ḽe ni nwe zwine vha ḓo ni ṋea zwone,+ ngauri mushumi u fanela u ṋewa malamba awe.+ Ni songo fhirela kha iṅwe nnḓu.
8 “Zwiṅwe hafhu, muḓi une na dzhena khawo vha ni ṱanganedza, ni ḽe zwine vha ni ṋea zwone,
9 ni fhodze vhalwadze vha re henefho, ni vha vhudze uri: ‘Muvhuso wa Mudzimu u tsini.’+
10 Muḓi une na dzhena khawo vha si ni ṱanganedze, ni bvele nnḓa dzinḓilani ni ri:
11 ‘Ri khou fhufhura na buse ḽi bvaho muḓini waṋu ḽi re kha milenzhe yashu.+ Fhedzi ni dzule ni tshi humbula uri, Muvhuso wa Mudzimu u tsini.’
12 Ndi a ni vhudza uri, zwine zwa ḓo wela wonoyo muḓi zwi ḓo fhira zwe zwa wela muḓi wa Sodoma.+
13 “Khombo kha iwe Xoratsima! Khombo kha iwe Betsaida! Ngauri arali mishumo ya maanḓa yo itwaho kha inwi i vhe yo itwa ngei Tiro na Sidoni, vho vha vha tshi ḓo vha vho rembuluwa kale vha ambara madzanganda vha dzula miḽorani.+
14 Zwine zwa ḓo ni wela nga ḓuvha ḽa khaṱhulo zwi ḓo fhira zwe zwa wela Tiro na Sidoni.
15 Na iwe Kapernaume, naa u ḓo hudzwa wa swika ṱaḓulu? U ḓo tsela fhasi Vhiḓani!*
16 “Ane a ni thetshelesa, u thetshelesa na nṋe.+ Ane a ni nyadza, u nyadza na nṋe. Zwiṅwe hafhu, ane a nnyadza, u nyadza na O nthumaho.”+
17 Vha 70 vha vhuya vho takala, vha ri: “Murena, na madimoni a a ri pfa musi ri tshi a pandela dzinani ḽau.”+
18 A tshi pfa zwenezwo, a ri: “Ndo zwi vhona Saṱhane a tshi wa+ ṱaḓulu nga luvhilo lu ngaho lwa lupenyo.
19 Ndo ni ṋea maanḓa a u kandekanya ṋowa na phame, na a u kunda maanḓa oṱhe a swina,+ a hu na tshine tsha nga ni huvhadza.
20 Naho zwo ralo, ni songo takala ngauri ni khou pandela madimoni, fhedzi takalani ngauri madzina aṋu o ṅwaliwa ngei ṱaḓulu.”+
21 Nga tshenetsho tshifhinga, muya mukhethwa wa ita uri a takale, a ri: “Ndi a u renda Khotsi phanḓa ha vhathu vhoṱhe, Iwe Murena wa ḽiṱaḓulu na ḽifhasi, ngauri hezwi zwithu wo zwi dzumbela vhaṱali na vha ṱhalukanyo,+ wa zwi dzumbululela vhana. Ngauri yeneyo ndi nḓila ine iwe Khotsi wa i takalela.+
22 Khotsi anga o nṋea zwithu zwoṱhe, a hu na ane a ḓivha Murwa nga nnḓa ha Khotsi, a hu na ane a ḓivha Khotsi nga nnḓa ha Murwa,+ na onoyo ane Murwa a takalela u mu dzumbululela.”+
23 A amba na vhafunziwa vhawe hu si na vhaṅwe vhathu, a ri: “Hu takala vhane vha vhona zwine inwi na zwi vhona.+
24 Ndi a ni vhudza uri, vhaporofita vhanzhi na mahosi vho tama u vhona zwithu zwine na zwi vhona,+ fhedzi vha si zwi vhone, vho ṱoḓa u pfa zwine na zwi pfa, fhedzi vha si zwi pfe.”
25 Ha ḓa muḓivhi wa Mulayo a mu linga, a ri: “Mufunzi, ndi fanela u ita mini uri ndi wane vhutshilo vhu sa fheli?”+
26 Yesu a ri: “Ho ṅwaliwa mini Mulayoni? Mulayo u u pfesesa hani?”
27 Ene a ri: “‘U tea u funa Yehova* Mudzimu wau nga mbilu yau yoṱhe, na nga zwoṱhe zwine wa vha zwone, na nga nungo dzau dzoṱhe, na nga ṱhalukanyo yau yoṱhe,’+ na uri ‘u fune muhura wau vhunga u tshi ḓifuna.’”+
28 Yesu a ri: “Wo fhindula zwone; dzula u tshi ita zwenezwo, ndi hone u tshi ḓo tshila.”+
29 A tshi ṱoḓa u ḓiita o lugaho,+ onoyo munna a vhudzisa Yesu a ri: “Muhura wanga ndi nnyi?”
30 Yesu a ri: “Muṅwe munna o vha a tshi khou bva Yerusalema a tshi khou tsela Yeriko, a ṱangana na mavemu, a mu bvula zwiambaro, a mu rwa, a mu sia o dzidzivhala.
31 Tshifhe a ḓiwana a tshi khou tshimbila nga yeneyo nḓila, musi a tshi mu vhona, a fhira nga thungo.
32 Ha ḓa na Mulevi, a tshi khou tshimbila nga yeneyo nḓila, musi a tshi mu vhona, a fhira nga thungo.
33 Fhedzi muṅwe Musamaria+ we a vha a tshi khou tshimbila kha yeneyo nḓila a swika he onoyo munna a vha e hone, a mu pfela vhuṱungu musi a tshi mu vhona.
34 A ya khae a mu ṱanzwa nga waini a mu ḓodza mapfura a kona u banditsha mbonzhe dzawe. A mu ṋamedza mbongola yawe, a mu isa nḓuni ya vhaeni a mu ṱhogomela henefho.
35 Nga ḓuvha ḽi tevhelaho a bvisa dinari* mbili, a dzi ṋea muṋe wa nnḓu ya vhaeni a ri: ‘U mu ṱhogomele, arali wa shumisa dinari dzi fhiraho dzenedzi, ndi ḓo u lifhela ndi tshi vhuya.’
36 Onoyo munna we a ṱangana na mavemu u ḓo ri muhura+ wawe ndi ufhio kha vhenevha vhararu?”
37 Ene a ri: “Ndi we a mu pfela vhuṱungu.”+ Yesu a ri: “Tshimbila u ite zwenezwo.”+
38 Musi vha tshi khou tshimbila, vha dzhena kha muṅwe muḓana. Muṅwe mufumakadzi ane a pfi Marita+ a mu ṱanganedza nḓuni yawe.
39 O vha e na murathu ane a pfi Maria, we a vha o dzula milenzheni ya Murena a tshi khou thetshelesa zwine a khou amba.
40 Marita ene o vha o farekanea nga mishumo minzhi. A ḓa a amba na Yesu a ri: “Murena, naa a u ambi tshithu? Maria o nndaṱedza, mu vhudze uri a ḓe a nthuse.”
41 Murena a ri: “Marita, Marita, u khou vhilaedziswa na u thithiswa nga zwithu zwinzhi.
42 Hu ṱoḓea zwi si gathi kana tshithihi fhedzi. Maria o nanga zwithu zwavhuḓi,+ ha nga dzhielwi zwone.”
Ṱhaluso dzi re magumoni a siaṱari
^ Kana “mmbwa dza ḓaka.”
^ Kana “phashane, navhula.”
^ Kana “Hades.” Sedzani Mutevhe Wa Ṱhalutshedzo Ya Maipfi.
^ Sedzani Ṱhume. B14.
