Evangeli Ya Luka 12:1-59

  • Mbiliso ya Vhafarisei (1-3)

  • Ofhani Mudzimu, hu si vhathu (4-7)

  • U tenda uri ni na vhuthihi na Kristo (8-12)

  • Tshifanyiso tshi ambaho nga ha munna o pfumaho wa tsilu (13-21)

  • Litshani u vhilaela (22-34)

    • Sambi ḽiṱuku (32)

  • U dzula wo fhaṱuwa (35-40)

  • Mulanda a fhulufhedzeaho na a sa fhulufhedzei (41-48)

  • Ndo ḓa u fhandekanya vhathu, hu si u ḓisa mulalo (49-53)

  • Ndi zwa ndeme u ṱalukanya zwine zwa khou itea (54-56)

  • U lugisa mafhungo (57-59)

12  Musi ho kuvhangana vhathu vha zwigidi zwinzhi, vha tshi khou kwanyeledzana, Yesu a vhudza vhafunziwa vhawe a ri: “Ni thanyele mbiliso ya Vhafarisei, ine ya vha vhufhura havho.+ 2  Ngauri a hu na tsho dzumbiwaho tshine tsha sa ḓo dzumbululwa, a hu na tshiphiri tshine tsha sa ḓo bvela khagala.+ 3  Zwine na zwi amba swiswini zwi ḓo pfala tshedzani, na zwine na zwi hevhedza tshiphirini zwi ḓo huwelelwa kha ṱhanga. 4  Ndi a ni vhudza khonani dzanga+ ndi ri, ni songo ofha vhane vha nga ni vhulaya, vha fhedza vha si vhe na tshine vha nga tshi ita.+ 5  Ndi ḓo ni sumbedza ane na fanela u mu ofha: Ofhani Ane a vhulaya, a dovha a vha na maanḓa a u posa Gehena.*+ Ngoho ndi a ni vhudza, ofhani Onoyo.+ 6  Naa zwiṋoni zwiṱuku* zwiṱanu a zwi rengwi nga mapeni mavhili?* Naho zwo ralo, a hu na na tshithihi tshazwo tshine Mudzimu a tshi hangwa.+ 7  Na mavhudzi oṱhe a re ṱhohoni dzaṋu o vhaliwa.+ Ni songo ofha; ni vha ndeme vhukuma u fhira zwiṋoni zwiṱuku zwinzhi.+ 8  “Ndi a ni vhudza ndi ri, vhoṱhe vhane vha ntenda phanḓa ha vhathu,+ na Murwa muthu u ḓo vha tenda phanḓa ha vharuṅwa vha Mudzimu.+ 9  Fhedzi ane a nndandula phanḓa ha vhathu u ḓo landulwa phanḓa ha vharuṅwa vha Mudzimu.+ 10  Ane a amba luvhi nga ha Murwa muthu, u ḓo hangwelwa, fhedzi ane a sema muya mukhethwa ha nga hangwelwi.+ 11  Musi vha tshi ni fara uri vha ni ise sinagogoni na phanḓa ha vhaḓinḓa na vhavhusi, ni songo vhilaela uri ni ḓo ḓiimelela hani kana ni ḓo amba mini,+ 12  ngauri muya mukhethwa u ḓo ni funza zwine na fanela u zwi amba nga tshenetsho tshifhinga.”+ 13  Muṅwe we a vha e vhukati ha vhathu a amba na Yesu a ri: “Mufunzi, vhudza mukomana wanga uri a nkovhele ifa.” 14  Yesu a ri: “Ndo vhewa nga nnyi uri ndi vhe muhaṱuli na mukovhekanyi wa ifa ḽaṋu?” 15  A dovha a ri: “Ni dzule no fhaṱuwa, ni ḓilinde uri ni si vhe na tseḓa,*+ ngauri naho muthu e na zwinzhi, ha tshili nga zwine a vha nazwo.”+ 16  A vha vhudza tshiṅwe tshifanyiso a ri: “Muṅwe munna wa mupfumi o vha o kaṋa zwinzhi tsimuni yawe. 17  A elekanya a ri, ‘Zwino ndi ḓo ita mini ngauri a thi na fhethu hune nda ḓo kuvhanganyela hone zwe nda kaṋa?’ 18  A ri, ‘Ndi ḓo ita hezwi:+ Ndi ḓo thutha maḓulu anga nda fhaṱa mahulwane, nda vhea goroi yanga na zwithu zwanga zwoṱhe zwavhuḓi henefho, 19  ndi hone ndi tshi ḓo ri: “Ndi na zwithu zwinzhi zwavhuḓi zwe nda zwi vhulungela miṅwaha minzhi i ḓaho; kha ndi awele, ndi ḽe, ndi nwe, ndi ḓiphiṋe.”’ 20  Fhedzi Mudzimu a amba nae a ri, ‘Iwe tsilu, vhusiku vhuno u ḓo vhulawa. Zwithu zwoṱhe zwe wa zwi kuvhanganya zwi ḓo sala na nnyi?’+ 21  Ndi zwine zwa ḓo itea kha ane a kuvhanganya lupfumo, fhedzi a songo pfuma phanḓa ha Mudzimu.”+ 22  A amba na vhafunziwa vhawe a ri: “Litshani u vhilaela nga ha vhutshilo haṋu uri ni ḓo ḽa mini kana ni ḓo ambara mini.+ 23  Ngauri vhutshilo ndi ha ndeme u fhira zwiḽiwa, na muvhili ndi wa ndeme u fhira zwiambaro. 24  Lavhelesani mafunguvhu. Ha zwali kana u kaṋa; ha na ḓulu. Naho zwo ralo, Mudzimu u a a ṋea zwiḽiwa.+ Naa a ni vha ndeme u fhira zwiṋoni?+ 25  Naa u vhilaela zwi nga ita uri ni tshile tshifhinga tshilapfu? 26  Arali ni sa koni u ita zwenezwo zwithu zwiṱuku-ṱuku, ndi ngani ni tshi vhilaedziswa nga zwiṅwe zwithu?+ 27  Lavhelesani nḓila ine maluvha a aluwa ngayo; ha shumi kana u luka tshithu, fhedzi ndi a ni vhudza ndi ri, naho Salomo o vha o pfuma vhukuma, o vha a sa ambari u fana na ḽiṅwe ḽa eneo maluvha.+ 28  Arali Mudzimu a tshi ambadza zwimela zwa ḓaka zwine zwa vha hone ṋamusi, matshelo zwa poswa muliloni, naa inwi ha nga ni ambadzi u fhira zwenezwo zwimela? Ndi ngani ni na lutendo luṱuku? 29  Ngauralo, litshani u vhilaela nga ha zwine na ḓo ḽa na zwine na ḓo nwa. Ni songo vhilaela lwo kalulaho,+ 30  ngauri zwenezwi zwoṱhe ndi zwithu zwine vhathu vha dzitshaka vha zwi ṱoḓesa, fhedzi Khotsi aṋu u a zwi ḓivha uri ni ṱoḓa zwenezwi zwithu.+ 31  Naho zwo ralo, dzulani ni tshi ṱoḓa Muvhuso wawe, zwenezwi zwithu ni ḓo engedzwa ngazwo.+ 32  “Ni songo ofha, inwi sambi ḽiṱuku,+ ngauri zwine Khotsi aṋu a zwi takalela ndi u ni ṋea Muvhuso.+ 33  Rengisani thundu dzaṋu, ni ṋee vhashai tshelede.+ Ni ite zwipatshi zwa tshelede zwi sa ṱahali, lupfumo lu sa fheli lwa ngei ṱaḓulu,+ hune mbava i si sendele tsini nalwo, na hune lwa si ḽiwe nga muṱwa.* 34  Ngauri hune lupfumo lwaṋu lwa vha hone, ndi hune mbilu yaṋu ya ḓo vha hone. 35  “Ambarani ni ḓilugise,+ ni funge mbone dzaṋu,+ 36  ni fane na vhanna vho lindelaho muṋe wavho a tshi vhuya+ munyanyani wa mbingano,+ uri musi a tshi swika, a tshi khokhonya, vha mu vulele nga u ṱavhanya. 37  Hu takala vhalanda vhane musi muṋe wavho a tshi vhuya a wana vho fhaṱuwa! Ngoho ndi a ni vhudza ndi ri, muṋe wavho u ḓo ḓilugisa, a vha dzudza fhasi a vha ṋea zwiḽiwa. 38  Vha ḓo takala musi muṋe wavho a tshi vha wana vho fhaṱuwa arali a swika vhusiku* kana vhukati ha vhusiku.* 39  Fhedzi tshine na fanela u tshi ḓivha ndi hetshi: Arali muṋe wa muḓi o vha a tshi ḓivha tshifhinga tshine mbava ya ḓo ḓa ngatsho, o vha a sa ḓo tendela nnḓu yawe i tshi kwashiwa.+ 40  Na inwi ni dzule no ḓilugisa, ngauri Murwa muthu u ḓo ḓa nga tshifhinga tshine ni si tshi ḓivhe.”+ 41  Petro a ri: “Murena, itshi tshifanyiso u khou tshi vhudza riṋe fhedzi kana vhathu vhoṱhe?” 42  Murena a ri: “Mulanda* a fhulufhedzeaho na wa vhuṱali ndi nnyi, we muṋe wawe a mu vhea uri a ṱhogomele vhaḓinḓa vhawe uri a dzule a tshi vha ṋea zwiḽiwa zwo eḓanaho nga tshifhinga tsho teaho?+ 43  Onoyo mulanda u ḓo takala arali muṋe wawe a mu wana a tshi khou ita zwenezwo! 44  Ngoho ndi a ni vhudza ndi ri, u ḓo mu vhea uri a lange zwithu zwawe zwoṱhe. 45  Arali onoyo mulanda a elekanya a ri, ‘Muṋe wanga u khou lenga,’ a rwa vhaṅwe vhashumeli, a ḽa, a nwa, a kambiwa,+ 46  muṋe wawe u ḓo ḓa nga ḓuvha ḽine a si ḽi ḓivhe na nga tshifhinga tshine a si tshi ḓivhe, a mu pfisa vhuṱungu vhuhulu na u mu dzudza na vha sa fhulufhedzei. 47  Onoyo mulanda u ḓo rwiwa vhukuma ngauri o vha a tshi ḓivha zwine muṋe wawe a zwi funa, fhedzi a si ḓilugise kana u ita zwe muṋe wawe a mu vhudza.*+ 48  Fhedzi we a ita zwithu zwo khakheaho ngauri o vha a sa ḓivhi zwine muṋe wawe a zwi funa, u ḓo rwiwa zwiṱuku. O ṋewaho zwinzhi, u ḓo vhilwa zwinzhi, na we a vhewa uri a ṱhogomele zwithu zwinzhi, hu ḓo ṱoḓiwa zwinzhi vhukuma khae.+ 49  “Ndo ḓa u funga mulilo kha ḽifhasi. Ndi kha ḓi ṱoḓa mini ngauri ndo no ḓi u funga? 50  Fhedzi ndi kha ḓi fanela u lovhedzwa nga iṅwe ndovhedzo, ndi ḓo tsikeledzea u swikela zwi tshi itea!+ 51  Naa ni vhona u nga ndo ḓisa mulalo kha ḽifhasi? Hai, ndo ḓa u fhandekanya vhathu.+ 52  Ngauri u bva zwino, vhaṱanu vha re nḓuni nthihi vha ḓo fhandekana, vhararu vha lwa na vhavhili, vhavhili vha lwa na vhararu. 53  Vhathu vha ḓo fhandekana, khotsi u ḓo lwa na murwa wawe, murwa a lwa na khotsi awe, mme a lwa na ṅwananyana wawe, ṅwananyana a lwa na mme awe, mazwale a lwa na mazwale wawe.”+ 54  A amba na gogo a ri: “Musi ni tshi vhona hu na gole vhukovhela, ni ri, ‘Hu ḓo na mvula,’ ngangoho ya na. 55  Musi ni tshi vhona muya u tshi vhudzula u tshi bva tshipembe, ni ri, ‘Hu ḓo fhisa,’ ngangoho ha fhisa. 56  Inwi vha re na muhoyo, ni a kona u ṱalukanya mutsho, fhedzi ndi ngani ni sa koni u ṱalukanya zwine zwa khou itea zwino?+ 57  Ndi ngani ni sa ḓivhi zwine na fanela u zwi ita? 58  Musi ni tshi ya kha muvhusi ni na ane a ni vhona mulandu, ni pfumedzane nae ni nḓilani uri a si ni ise kha muhaṱuli, muhaṱuli a si ni ise kha muḓinḓa wa khothe, muḓinḓa wa khothe a si ni ise dzhele.+ 59  Ndi a ni vhudza ndi ri, a ni nga bvi ni sa athu u lifha tshelede yoṱhe.”*

Ṱhaluso dzi re magumoni a siaṱari

^ Kana “ṱhongola.”
^ Thevhedz., “asarioni mbili.” Sedzani Ṱhume. B14.
^ Kana “vhupangwa.”
^ Kana “mutshenzhe.”
^ Hu ṱoḓaho u vha nga 9 nga madekwana u swika vhukati ha vhusiku.
^ U bva vhukati ha vhusiku u swika hu ṱoḓaho u vha nga 3 ya maḓautsha.
^ Kana “Mulangi wa nnḓu.”
^ Kana “u ita u tendelana na zwine muṋe wawe a zwi funa.”
^ Thevhedz., “lepitoni ya u fhedzisela.” Sedzani Ṱhume. B14.

Copyrights for this publication