Evangeli Ya Luka 16:1-31
16 A amba na vhafunziwa a ri: “Munna wa mupfumi o vha e na mulanda* we a pomokwa uri ha fari zwavhuḓi thundu dza muṋe wawe.
2 A vhidza onoyo mulanda a ri, ‘Ndo pfa mafhungo a si avhuḓi nga ha iwe. Ḓisa muvhigo u sumbedzaho nḓila ye wa shumisa ngayo tshelede, ngauri a u tsha ḓo vha mulanda wanga.’
3 Mulanda a elekanya a ri, ‘Ndi ḓo ita mini ngauri muṋe wanga u khou mpandela? A thi koni u lima, ndi shona na u tou humbela.
4 Ndi a ḓivha zwine nda ḓo zwi ita uri vhathu vha nṱanganedze nḓuni dzavho musi ndi tshi pandelwa.’
5 A vhidza vhoṱhe vha kolodaho muṋe wawe, a amba na wa u thoma a ri, ‘Muṋe wanga u mu koloda mini?’
6 Ene a ri, ‘Ndi mu koloda zwikumbu* zwa ḓana zwa mapfura a muṱwari.’ Mulanda a ri, ‘Dzhia thendelano yau u dzule fhasi, u ṱavhanye u ṅwale uri u koloda zwa 50.’
7 A amba na muṅwe a ri, ‘Iwe u koloda mini?’ Ene a ri, ‘Ndi mu koloda magokoko a ḓana* a goroi.’ Mulanda a ri, ‘Dzhia thendelano yau u ṅwale uri u koloda a 80.’
8 Muṋe a khoḓa mulanda wawe naho o vha a songo luga, ngauri o shumisa vhuṱali. Vhathu vha ḽino shango* vho ṱalifha u fhira vhashumeli vha Mudzimu.*+
9 “Ndi dovha nda ri: Itani khonani nga lupfumo lune na vha nalwo lwa ḽino shango+ uri musi lu tshi fhela, vha ni ṱanganedze vhudzuloni ha lini na lini.+
10 Ane a fhulufhedzea kha zwiṱuku u fhulufhedzea na kha zwinzhi, a sa fhulufhedzei kha zwiṱuku ha fhulufhedzei na kha zwinzhi.
11 Arali ni sa shumisi lupfumo lune na vha nalwo lwa ḽino shango nga u fhulufhedzea, ndi nnyi ane a nga ni kumedza lupfumo lwa vhukuma?
12 Arali ni songo fhulufhedzea kha lupfumo lwa muṅwe muthu, ndi nnyi ane a ḓo ni ṋea lupfumo lwaṋu?+
13 A hu na ane a nga shumela vhaṋe vhavhili, ngauri u ḓo vhenga muṅwe a funa muṅwe kana a nambatela muṅwe a nyadza muṅwe. Ni nga si kone u shumela Mudzimu na Lupfumo.”+
14 Vhafarisei vhane vha funa tshelede, vho vha vho thetshelesa zwe a vha a tshi khou zwi amba, vha mu goḓa.+
15 Yesu a amba navho a ri: “Inwi ni ḓiita vho lugaho phanḓa ha vhathu,+ fhedzi Mudzimu u a ḓivha zwi re mbiluni dzaṋu.+ Ngauri zwine vhathu vha zwi dzhiela nṱha, zwi a nengisa phanḓa ha Mudzimu.+
16 “Mulayo na Vhaporofita zwo vha hone u swika kha Yohane. U bva misini yeneyo, Muvhuso wa Mudzimu u khou ḓivhadziwa sa mafhungo maḓifha, vhathu vhoṱhe vha khou ṱoḓa u dzhena khawo.+
17 Naho ḽiṱaḓulu na ḽifhasi zwa lovha, fhedzi zwoṱhe zwi re kha Mulayo zwi ḓo itea.+
18 “Ane a ṱala mufumakadzi wawe a vhinga muṅwe u ita vhupombwe, na a vhingaho mufumakadzi o ṱalwaho, u ita vhupombwe.+
19 “Ho vha hu na muṅwe munna wa mupfumi we a vha a tshi ambara zwiambaro zwa phephulu zwa ḽinene, we a vha a tshi ḓiphiṋa nga madzanga ḓuvha ḽiṅwe na ḽiṅwe.
20 Fhedzi ho vha hu na munna wa mushai* we a vha a tshi pfi Lazaro, we a vha o ḓala zwilonda, a tshi anzela u vhewa khoroni ya mupfumi,
21 a tshi tama u fushwa nga matshakatshaka a waho ṱafulani ḽa mupfumi. Na mmbwa dzo vha dzi tshi ḓa dza ṋanzwa zwilonda zwawe.
22 Nga u ya ha tshifhinga munna wa mushai a fa, a hwalwa nga vharuṅwa vha mu isa tsini na Abrahamu.
“Na mupfumi a fa a vhulungwa.
23 Musi e Vhiḓani,* a sedza nṱha a tshi khou pfa vhuṱungu, a vhona Abrahamu e kule, na Lazaro e tsini nae.
24 A vhidzelela a ri, ‘Khotsi anga Abrahamu, nkhathutshele, u rume Lazaro a dzhenise munwe wawe maḓini a ḓe a rothisele kha lulimi lwanga, ngauri ndi khou tambula hafha muliloni.’
25 Fhedzi Abrahamu a ri, ‘Ṅwananga, u songo hangwa uri wo ḓiphiṋa musi u tshi kha ḓi tshila, ngeno Lazaro a tshi khou tambula. Zwino Lazaro u khou khuthadzwa fhano, iwe u khou tambula.
26 Zwiṅwe hafhu, hu na luwa luhulu vhukati hashu na inwi, uri vhane vha ṱoḓa u pfukela kha inwi vha tshi bva ngeno vha si kone, na vhathu vha bvaho ngeo vha tshi ḓa kha riṋe, vha si kone.’
27 Mupfumi a ri, ‘Arali zwo ralo, ndi humbela uri u mu rume nḓuni ya khotsi anga,
28 ngauri ndi na vharathu vhaṱanu, uri a vha tsivhudze uri na vhone vha si ḓe hafha fhethu hune ha tambulwa.’
29 Fhedzi Abrahamu a ri, ‘Vha na Mushe na Vhaporofita; kha vha thetshelese vhenevho.’+
30 Mupfumi a ri, ‘Khotsi anga Abrahamu, a vha nga vha thetshelesi, fhedzi vha ḓo rembuluwa arali muṅwe muthu a bvaho vhafuni a ya khavho.’
31 Fhedzi Abrahamu a ri, ‘Arali vha sa thetshelesa Mushe+ na Vhaporofita, vha nga si thetshelese naho ha vuwa muthu vhafuni.’”
Ṱhaluso dzi re magumoni a siaṱari
^ Kana “mulangi wa nnḓu.”
^ Kana “mielo ya bathi.” Bathi nthihi i lingana na ḽithara dza 22. Sedzani Ṱhume. B14.
^ Kana “mielo ya 100 ya koro.” Koro nthihi i lingana na ḽithara dza 220. Sedzani Ṱhume. B14.
^ Sedzani Mutevhe Wa Ṱhalutshedzo Ya Maipfi.
^ Thevhedz., “u fhira vharwa vha tshedza.”
^ Onoyo munna o vha a tshi humbela tshelede na zwithu.
^ Kana “Hades.” Sedzani Mutevhe Wa Ṱhalutshedzo Ya Maipfi.
