Evangeli Ya Luka 17:1-37
17 Yesu a amba na vhafunziwa vhawe a ri: “Hu ḓo dzula hu na zwikhukhulisi. Naho zwo ralo, khombo kha ane zwa ḓa ngae!
2 Zwo vha zwi tshi ḓo vha khwine khae arali o vhofhelelwa guyo* mukuloni a poswa lwanzheni, nṱhani ha uri a khukhulise muṅwe wa vhenevha vhaṱuku.+
3 Ni ṱhogomele. Arali wahaṋu a ni khakhela, ni mu kaidze,+ arali a rembuluwa ni mu hangwele.+
4 Naho arali a ni khakhela lwa sumbe nga ḓuvha, a ḓa kha inwi lwa sumbe, a ri, ‘Ndo rembuluwa,’ ni mu hangwele.”+
5 Vhaapostola vha amba na Murena vha ri: “Ri engedze lutendo.”+
6 Murena a ri: “Arali ni na lutendo lu linganaho na thoro ya luṋonya, no vha ni tshi nga amba na hoyu muthabeila na ri, ‘Tupuwa hafha, u ḓiṱavhe lwanzheni,’ wa ni thetshelesa.+
7 “Arali mulanda waṋu o vha a tshi khou lima tsimuni kana a tshi khou lisa, no vha ni tshi ḓo mu ṱanganedza hani musi a tshi vhuya? Naa no vha ni tshi ḓo ri, ‘Iḓa nga u ṱavhanya u ḽe zwiḽiwa’?
8 Naa no vha ni sa ḓo ri, ‘Nndugisele zwiḽiwa zwa nga madekwana, u ambare zwiambaro zwa u shuma, u ḓe u ntshumele u swikela ndi tshi fhedza u ḽa na u nwa; u kone u ḽa na u nwa nga murahu’?
9 Naa ni ḓo livhuwa onoyo mulanda nge a ni itela zwe na mu vhudza?
10 Na inwi musi no no ita zwoṱhe zwe na vhudzwa uri ni zwi ite, ni ambe ni ri: ‘A ri vhalanda vha tshithu. Ro ita zwe ra vha ro fanela u zwi ita.’”+
11 Yesu a fhira nga vhukati ha Samaria na Galilea, musi a tshi khou ya Yerusalema.
12 Musi a tshi khou dzhena kha muṅwe muḓana, a ṱangana na vhanna vha fumi vha re na mapele, fhedzi vha imela kule.+
13 Vha vhidzelela vha ri: “Yesu, Mufunzi, ri khathutshele!”
14 A tshi vha vhona, a amba navho a ri: “Iyani kha vhotshifhe vha ni vhone.”+ Vha fhola musi vha tshi khou ya henengei.+
15 Muṅwe wavho a tshi vhona uri o fhola, a rembuluwa, a humela murahu a tshi khou renda Mudzimu nga ipfi ḽihulu.
16 A gwadama milenzheni ya Yesu, a mu livhuwa. Onoyo munna o vha e Musamaria.+
17 Yesu a ri: “Naa a ho ngo fhodzwa vha fumi? Vhaṅwe vha ṱahe vha ngafhi?
18 Naa a hu na na muthihi o vhuyaho uri a rende Mudzimu, nga nnḓa ha onoyu munna wa luṅwe lushaka?”
19 A amba nae a ri: “Takuwa u tshimbile; lutendo lwau lwo u fhodza.”+
20 Musi Vhafarisei vha tshi mu vhudzisa uri Muvhuso wa Mudzimu u ḓo ḓa lini,+ a vha fhindula a ri: “Muvhuso wa Mudzimu u nga si ḓe nga nḓila ine ya ḓo vhonala;
21 vhathu a vha nga ambi vha ri, ‘Vhonani khoyu!’ kana ‘Khouḽaa!’ Ngauri Muvhuso wa Mudzimu u vhukati haṋu.”+
22 A amba na vhafunziwa a ri: “Hu ḓo ḓa maḓuvha ane na ḓo tama u vhona Murwa muthu nga ḽiṅwe ḽa eneo maḓuvha, fhedzi ḽeneḽo ḓuvha a ni nga ḓo ḽi vhona.
23 Vhathu vha ḓo amba na inwi vha ri, ‘Vhonani khouḽaa!’ kana ‘Vhonani khoyu!’ Ni songo ya kana u vha tevhela.+
24 U fana na lupenyo lu tshi penya lu tshi bva kha tshiṅwe tshipiḓa tsha ḽiṱaḓulu lu tshi ya kha tshiṅwe, zwi ḓo tou ralo na nga ḓuvha ḽa Murwa muthu.+
25 Naho zwo ralo, u fanela u tambudzwa zwihulu na u landulwa nga wonoyu murafho.+
26 Zwiṅwe hafhu, samusi zwo itea misini ya Noaxe,+ zwi ḓo tou ralo na misini ya Murwa muthu:+
27 Vho vha vha tshi ḽa, vha tshi nwa, vha tshi vhinga, vha tshi vhingwa, ha vhuya ha swika ḓuvha ḽe Noaxe a dzhena ngaḽo gungwani,+ ha ḓa Maḓi Mahulu a vha fhelisa vhoṱhe.+
28 Ndi zwe zwa itea na misini ya Loto:+ Vho vha vha tshi ḽa, vha tshi nwa, vha tshi renga, vha tshi rengisa, vha tshi ṱavha, vha tshi fhaṱa.
29 Nga ḓuvha ḽe Loto a bva ngaḽo Sodoma, ha na mulilo na matombo a dugaho zwa vha fhelisa vhoṱhe.+
30 Na nga ḓuvha ḽine Murwa muthu a ḓo dzumbululwa ngaḽo, zwi ḓo tou ralo.+
31 “Nga ḽeneḽo ḓuvha, a re kha ṱhanga a songo tsa a ya a dzhia thundu dzi re nḓuni, a re tsimuni a songo humela zwithu zwi re murahu.
32 Humbulani mufumakadzi wa Loto.+
33 Ane a tsireledza vhutshilo hawe u ḓo fa, ane a fa u ḓo tshila.+
34 Ndi a ni vhudza ndi ri, nga honoho vhusiku vhathu vhavhili vha ḓo vha vhe mmbeteni muthihi; muṅwe u ḓo dzhiiwa, muṅwe a siiwa.+
35 Vhafumakadzi vhavhili vha ḓo vha vha tshi khou kuya; muṅwe u ḓo dzhiiwa, muṅwe a siiwa.”
36 * ——
37 Vha mu vhudzisa vha ri: “Zwi ḓo itea ngafhi Murena?” Ene a ri: “Hune ha vha na tshitumbu, ndi hune magoni a kuvhangana hone.”+
