Evangeli Ya Luka 19:1-48
19 Yesu a dzhena Yeriko a fhira nga vhukati hawo.
2 Henefho ho vha hu na muṅwe munna we a vha a tshi pfi Saxeo; o vha e muhulwane wa vhathelisi, o pfuma.
3 O vha a tshi ṱoḓa u vhona Yesu, fhedzi a sa koni u mu vhona nga nṱhani ha gogo, ngauri o vha e mupfufhi.
4 Ngauralo, a gidimela phanḓa a gonya muhuyu uri a mu vhone, ngauri Yesu o vha a tshi ḓo fhira nga yeneyo nḓila.
5 Musi Yesu a tshi swika henefho, a lavhelesa nṱha, a amba nae a ri: “Saxeo, ṱavhanya u tse, ngauri ṋamusi ndi mueni nḓuni yau.”
6 A ṱavhanya a tsa, a mu ṱanganedza nḓuni yawe o takala.
7 Musi vhathu vha tshi zwi vhona vha gungula vha ri: “O dalela muitazwivhi.”+
8 Fhedzi Saxeo a takuwa a amba nae a ri: “Murena, ndi ḓo kovhela vhashai thundu yanga nga vhukati, zwoṱhe zwe nda zwi dzhiela vhathu nga vhufhura ndi ḓo zwi lifha zwo andiswa luṋa.”+
9 Yesu a ri: “Ṋamusi Mudzimu o tshidza hoyu munna na muṱa wawe, ngauri na Saxeo ndi murwa wa Abrahamu.
10 Ngauri Murwa muthu o ḓa u ṱoḓa na u tshidza vho xelaho.”+
11 Musi vho thetshelesa zwenezwo, a vha vhudza tshiṅwe tshifanyiso, ngauri o vha e tsini na Yerusalema, ngauri vho vha vha tshi humbula uri Muvhuso wa Mudzimu wo vha u tshi ḓo vha hone nga tshenetsho tshifhinga.+
12 Yesu a ri: “Muṅwe munna wa mukololo o ya shangoni ḽa kule+ uri a vhe khosi, a kone u vhuya hayani.
13 A vhidza vhalanda vhawe vha fumi, a vha ṋea mina* dza fumi a vha vhudza a ri, ‘Dzi binduliseni u swika ndi tshi vhuya.’+
14 Fhedzi vhadzulapo vho vha vha tshi mu vhenga, vha rumela tshigwada tsha vhaimeleli uri vha mu vhudze uri, ‘A ri ṱoḓi u tshi vha khosi yashu.’
15 “Musi a tshi vhuya o no vha khosi, a vhidza vhaḽa vhalanda vhawe vhe a vha ṋea tshelede.* O vha a tshi ṱoḓa u ḓivha zwe vha bindulisa mushumoni wavho.+
16 Wa u thoma a ḓa a ri, ‘Murena, mina yau yo bindulisa dza fumi.’+
17 Khosi ya ri, ‘Wo shuma zwavhuḓi, iwe mulanda wavhuḓi! Ngauri wo fhulufhedzea kha zwiṱuku, u ḓo vhusa miḓi ya fumi.’+
18 Wa vhuvhili a ḓa a ri, ‘Murena, mina yau yo bindulisa dziṅwe ṱhanu.’+
19 A amba na onoyo a ri, ‘Na iwe u ḓo vhusa miḓi miṱanu.’
20 Ha ḓa muṅwe a ri, ‘Murena, mina yau kheyi, ndo vha ndo i dzumba.
21 Murena, ndo ita zwenezwo nge nda u ofha ngauri u na vhuhali; u dzhia zwe wa si vhulunge na u kaṋa zwe wa si zwale.’+
22 A amba nae a ri, ‘Iwe mulanda muvhi, ndi ḓo u haṱula nga zwe wa amba. Wo vha u tshi zwi ḓivha uri ndi munna wa vhuhali, ndi dzhia zwe ndi si vhulunge na u kaṋa zwe ndi si zwale.+
23 Ndi ngani u songo vhea tshelede* yanga banngani? Ndo vha ndi tshi ḓo wana i na nzwalelo musi ndi tshi vhuya.’
24 “A amba na vho imaho henefho a ri, ‘Mu dzhieleni yeneyo mina ni ṋee ane a vha na mina dza fumi.’+
25 Fhedzi vha amba nae vha ri, ‘Murena, u na mina dza fumi!’
26 Ene a ri, ‘Ndi a ni vhudza ndi ri, ane a vha nazwo, u ḓo ṋewa zwinzhi, a si na u ḓo dzhielwa na zwiṱuku-ṱuku zwine a vha nazwo.+
27 Zwiṅwe hafhu, ḓisani maswina anga e a vha a sa ṱoḓi ndi tshi a vhusa, ni a vhulaye ndi tshi zwi vhona.’”
28 Musi Yesu o no fhedza u amba zwenezwo, a gonya Yerusalema.
29 Musi vha tshi vho swika tsini na Bethefage na Bethania hune ha vha Thavhani ya Miṱwari,+ Yesu a ruma vhafunziwa vhawe vhavhili,+
30 a vha vhudza a ri: “Iyani muḓanani we na livhana nawo, musi ni tshi swika ni ḓo wana tshidonngana tsho vhofhiwa, tshi sa athu u ṋamelwa nga muthu. Ni tshi vhofholole ni tshi ḓise.
31 Arali muṅwe muthu a ni vhudzisa a ri, ‘Ndi ngani ni tshi khou tshi vhofholola?’ Ni ri: ‘Murena u khou tshi ṱoḓa.’”
32 Vho rumiwaho vha ṱuwa vha wana zwi nga nḓila ye a vha vhudza ngayo.+
33 Musi vha tshi khou vhofholola tshidonngana, vhaṋe vhatsho vha ri: “Ndi ngani ni tshi khou tshi vhofholola?”
34 Vhone vha ri: “Murena u khou tshi ṱoḓa.”
35 Vha ḓisa tshidonngana kha Yesu, vha vhea zwiambaro zwavho khatsho, vha ṋamedza Yesu khatsho.+
36 Musi a tshi khou tshimbila vhathu vha adza zwiambaro zwavho nḓilani.+
37 Musi a tshi vho swika nḓilani i tsaho nga Thavhani ya Miṱwari, gogo ḽoṱhe ḽa vhafunziwa ḽa takala ḽa renda Mudzimu, nga nṱhani ha mishumo yoṱhe ya maanḓa ye ḽa i vhona,
38 ḽa ri: “Nga hu fhaṱutshedzwe a ḓaho sa Khosi dzinani ḽa Yehova!* Kha hu vhe na Mulalo ngei ṱaḓulu, hu rendwe Mudzimu wa ngei ṱaḓulu!”+
39 Naho zwo ralo, vhaṅwe Vhafarisei vha re vhukati ha gogo vha ri: “Mufunzi, kaidza vhafunziwa vhau.”+
40 Fhedzi Yesu a ri: “Ndi a ni vhudza ndi ri, naho arali havha vhathu vha fhumula, matombo o vha a tshi ḓo vhidzelela.”
41 Musi a tshi vho swika tsini, a vhona muḓi a u lilela,+
42 a ri: “Ndi tama arali wo vha u tshi ṱalukanya zwithu zwe zwa vha zwi tshi ḓo u ḓisela mulalo, fhedzi zwenezwi zwithu wo dzumbelwa zwone.+
43 Ngauri hu ḓo ḓa maḓuvha ane maswina au a ḓo u tanga, a lwa na iwe a tshi bva thungo dzoṱhe.+
44 Vha ḓo u fhelisa na vhana vhau,+ a vha nga sii tombo nṱha ha ḽiṅwe,+ ngauri a wo ngo ṱalukanya tshifhinga tsha u ṱoliwa hau.”
45 Yesu a dzhena thembeleni a pandela vhane vha khou rengisa,+
46 a ri: “Ho ṅwaliwa u pfi, ‘Nnḓu yanga i ḓo vha ya thabelo,’+ fhedzi no i ita bako ḽa mavemu.”+
47 A funza thembeleni ḓuvha ḽiṅwe na ḽiṅwe. Fhedzi vhahulwane vha vhotshifhe, vhamaṅwalo na vharangaphanḓa vho vha vha tshi khou ṱoḓa u mu vhulaya;+
48 vha si kone u wana nḓila ya u ita zwenezwo, ngauri vhathu vhoṱhe vho vha vho mu kuvhanganela u itela u mu thetshelesa.+
Ṱhaluso dzi re magumoni a siaṱari
^ Mina ya Gerika i lemela gramu dza 340, i tshi dzhiiwa i ya ndeme u fhira dirakima dza 100. Sedzani Ṱhume. B14.
^ Thevhedz., “siḽiva.”
^ Thevhedz., “siḽiva.”
