Evangeli Ya Luka 7:1-50
7 Musi o no fhedza u amba zwe a vha a tshi ṱoḓa u vha vhudza zwone, a ya Kapernaume.
2 Muṅwe muhulwane wa maswole o vha e na mulanda we a vha a tshi mu funa, we a vha a tshi khou lwala vhukuma, e tsini na u fa.+
3 Musi a tshi pfa nga ha Yesu, a ruma vhaṅwe vhahulwane vha Vhayuda uri vha ye vha mu humbele uri a ḓe a fhodze mulanda wawe.
4 Vha ya kha Yesu vha mu humbela vha ri: “Mu thuse,
5 ngauri u funa lushaka lwashu, o ri fhaṱela sinagogo.”
6 Yesu a ṱuwa navho. Musi e tsini na u swika nḓuni, muhulwane wa maswole a ruma khonani uri dzi mu vhudze uri: “Muṋe wanga, u songo ḓidina nga u ḓa nḓuni yanga ngauri a thi fanelei.+
7 Ndi ngazwo na nṋe ndi songo ḓa kha iwe. Amba fhedzi uri mushumeli wanga a fhole.
8 Ngauri na nṋe ndi muthu a vhuswaho, fhedzi ndi na maswole ane nda a vhusa, ndi amba na uyu nda ri, ‘Ṱuwa!’ a ṱuwa, nda amba na muṅwe nda ri, ‘Iḓa!’ a ḓa, nda amba na mulanda wanga nda ri, ‘Ita itshi!’ a ita.”
9 Musi Yesu a tshi pfa zwenezwo a mangala, a rembuluwa a lavhelesa gogo ḽe ḽa vha ḽi tshi khou mu tevhela a ri: “Ndi a ni vhudza uri, a thi athu u wana muthu a re na lutendo lungafha kha ḽa Isiraele.”+
10 Hone vhaḽa vho rumiwaho, vha tshi humela hayani vha wana mulanda o fhola.+
11 Nga murahu ha zwenezwo, a ya muḓini wa Naini, a tshi khou tshimbila na vhafunziwa vhawe na gogo.
12 Musi a tshi vho sendela tsini na khoro ya muḓi a ṱangana na vhathu vho hwala tshitumbu tsha muṱhannga, we a vha e ene ṅwana e eṱhe kha mme awe.+ Mme awe o vha e tshilikadzi. Vhathu vhanzhi vha muḓini wonoyo vho vha vhe nae.
13 Musi Murena a tshi mu vhona, a mu pfela vhuṱungu,+ a amba nae a ri: “Litsha u lila.”+
14 A sendela a kwama vhulalo, vho mu hwalaho vha ima. Yesu a ri: “Muṱhannga, vuwa!”+
15 Muṱhannga a vuwa, a thoma u amba, Yesu a mu ṋea mme awe.+
16 Vhoṱhe vha tshuwa, vha renda Mudzimu vha ri: “Ri na muporofita muhulu.”+ Vha dovha vha ri: “Mudzimu o pfela vhathu vhawe vhuṱungu.”+
17 Enea mafhungo a ambiwa kha ḽoṱhe ḽa Yudea na mashangoni oṱhe a tsini.
18 Musi Yohane o no vhudzwa nga vhafunziwa vhawe zwoṱhe zwe Yesu a zwi ita,+
19 a ruma vhafunziwa vhawe vhavhili uri vha ye vha vhudzise Murena uri: “Naa ndi iwe we ha pfi u ḓo ḓa,+ kana hu na muṅwe ane ra fanela u mu lindela?”
20 Musi vhenevho vhanna vha tshi swika kha Yesu, vha ri: “Yohane Mulovhedzi o ri ruma kha iwe uri ri vhudzise uri, ‘Naa ndi iwe we ha pfi u ḓo ḓa, kana hu na muṅwe ane ra fanela u mu lindela?’”
21 Nga tshenetsho tshifhinga, Yesu a fhodza vhathu vhanzhi vha lwalaho,+ a pandela madimoni na u bonyolosa vhanzhi vha sa vhoni.
22 A vha fhindula a ri: “Tshimbilani ni vhudze Yohane zwe na zwi vhona na zwe na zwi pfa, ni ri: Vha sa vhoni vha vho vhona,+ vho holefhalaho vha vho tshimbila, vha mapele vha khou fhodzwa, vho dzingaho nḓevhe vha vho pfa,+ vhafu vha khou vuswa, vhashai vha khou funzwa mafhungo maḓifha.+
23 Hu takala ane a si khukhuliswe nga nṋe.”+
24 Musi vhaḓinḓa vha Yohane vho no ṱuwa, Yesu a amba na gogo nga ha Yohane a ri: “No vha no ya u vhona mini sogani? Naa no vha no ya u vhona luṱanga lu vhudzulwaho nga muya?+
25 No vha no ya u vhona mini? Naa no vha no ya u vhona muthu o ambaraho zwiambaro zwi ḓuraho?*+ Vhane vha zwi ambara vha pfamoni.
26 Ndi ri no vha no ya u ita mini? Naa no vha no ya u vhona muporofita? Ngoho ndi a ni vhudza ndi ri, u fhira na vhaṅwe vhaporofita.+
27 Onoyu ndi ene we ha ṅwaliwa nga hae ha pfi: ‘Ndi khou ruma muḓinḓa wanga phanḓa hau ane a ḓo u lugiselela nḓila!’+
28 Ndi a ni vhudza ndi ri, kha vhathu vhoṱhe* a hu na ane a fhira Yohane, fhedzi u fhirwa nga a re muṱuku Muvhusoni wa Mudzimu.”+
29 (Musi vhathu vhoṱhe na vhathelisi vha tshi pfa zwenezwo, vha amba uri Mudzimu o luga, ngauri vho lovhedzwa nga Yohane.+
30 Fhedzi Vhafarisei na vhaḓivhi vha Mulayo vho vha vha sa ṱoḓi u ita zwine Mudzimu a zwi funa,+ ngauri a vho ngo lovhedzwa nga Yohane.)
31 “Uyu murafho ndi nga u vhambedza na mini, u fana na vhonnyi?+
32 U fana na vhana vho dzulaho makete vhane vha amba na vhane vha tamba navho, vha ri: ‘Ro ni lidzela tshiṱiringo, fhedzi inwi na hana u tshina; ro lila, fhedzi inwi ni si lile.’
33 Yohane Mulovhedzi o ḓa a si ḽe vhurotho na u nwa waini,+ fhedzi inwi na ri: ‘U na dimoni.’
34 Murwa muthu a ḓa a ḽa na u nwa, fhedzi inwi na ri: ‘Vhonani! Muthu wa u ḽesa na wa u nwesa waini, khonani ya vhathelisi na vhaitazwivhi!’+
35 Naho zwo ralo, vhuṱali vhu vhonala nga mishumo* yaho.”+
36 Muṅwe wa Vhafarisei a mu humbela uri a ḓe a ḽe nae. Yesu a ya nḓuni ya Mufarisei a ḽa nae zwiḽiwa.
37 Musi mufumakadzi we a vha a tshi ḓivhiwa kha wonoyo muḓi uri ndi muitazwivhi, a tshi pfa uri Yesu u khou ḽa zwiḽiwa nḓuni ya Mufarisei, a ḓa na mudzio wa alabasita wa mapfura a nukhelelaho.+
38 A ḓa a gwadama tsini na milenzhe ya Yesu, a lila, a ṋukadza milenzhe ya Yesu nga miṱodzi yawe, a i phumula nga mavhudzi awe. A khisa na milenzhe yawe, a i ḓodza mapfura a nukhelelaho.
39 Musi Mufarisei we a ramba Yesu a tshi vhona zwenezwi, a ambela mbiluni a ri: “Arali onoyu munna e muporofita, o vha a tshi ḓo zwi ḓivha uri u khou kwamiwa nga mufumakadzi-ḓe, ngauri onoyu mufumakadzi ndi muitazwivhi.”+
40 Yesu a ri: “Simoni, ndi khou ṱoḓa u amba na iwe.” A ri: “Mufunzi, amba!”
41 “Ho vha hu na vhanna vhavhili vhane vha koloda muṅwe munna; muṅwe o vha a tshi mu koloda dinari* dza 500, muṅwe a tshi mu koloda dza 50.
42 Musi vha si tsha kona u mu lifhela, a vha hangwela vhoṱhe. Kha avho vhavhili, ndi ufhio ane a ḓo funa mukolodisi u fhira muṅwe?”
43 Simoni a ri: “Khamusi ndi we a hangwelwa mulandu muhulwane.” Yesu a ri: “Wo amba zwone.”
44 A tshi fhedza u amba zwenezwo, a rembuluwa a lavhelesa onoyo mufumakadzi, a amba na Simoni a ri: “U khou mu vhona uyu mufumakadzi? Ndo dzhena muḓini wau; wa si nṋee maḓi a u ṱamba milenzhe. Fhedzi hoyu mufumakadzi o ṱanzwa milenzhe yanga nga miṱodzi yawe, a i phumula nga mavhudzi awe.
45 Iwe a wo ngo nkhisa; fhedzi onoyu mufumakadzi o vha a tshi khou khisa milenzhe yanga u bva tshee nda swika.
46 A wo ngo ḓodza ṱhoho yanga mapfura, fhedzi hoyu mufumakadzi o ḓodza milenzhe yanga mapfura a nukhelelaho.
47 Nga nṱhani ha zwenezwo, ndi a u vhudza uri, naho zwivhi zwawe zwi zwinzhi,* o hangwelwa.+ Ndi ngazwo e na lufuno luhulu, fhedzi ane a hangwelwa zwivhi zwiṱuku u funa zwiṱuku.”
48 A amba na onoyo mufumakadzi a ri: “Wo hangwelwa zwivhi.”+
49 Musi vhane a khou ḽa navho vha tshi zwi pfa, vha amba nga tshavho vha ri: “Ndi nnyi onoyu ane a kona na u hangwela zwivhi?”+
50 Fhedzi Yesu a amba na onoyo mufumakadzi a ri: “Lutendo lwau lwo u tshidza;+ ṱuwa nga mulalo.”
