Evangeli Ya Luka 20:1-47
20 Ḽiṅwe ḓuvha musi a tshi khou funza thembeleni na u ḓivhadza mafhungo maḓifha, vhahulwane vha vhotshifhe, vhamaṅwalo na vhahulwane vha ḓa khae,
2 vha ri: “Ri vhudze uri izwi zwithu u zwi ita nga maanḓa a nnyi? Kana ndi nnyi o u ṋeaho enea maanḓa?”+
3 Yesu a ri: “Na nṋe ndi ḓo ni vhudzisa mbudziso, ni mphindule:
4 Ndi nnyi we a ri Yohane a lovhedze, naa ndi Mudzimu kana ndi vhathu?”
5 Vha amba nga tshavho vha ri: “Arali ra ri, ‘Ndi Mudzimu,’ u ḓo ri, ‘Ndi ngani ni songo mu tenda?’
6 Fhedzi arali ra ri, ‘Ndi vhathu,’ vhathu vha ḓo ri kanḓa nga matombo, ngauri vha tenda uri Yohane o vha e muporofita.”+
7 Vha ri a vha ḓivhi.
8 Yesu a ri: “Na nṋe a thi nga ni vhudzi uri zwenezwi zwithu ndi zwi ita nga maanḓa a nnyi.”
9 A vhudza vhathu tshifanyiso a ri: “Ho vha hu na muṅwe munna we a vha o ṱavha minḓirivhe tsimuni yawe,+ a ri vhalimi vha i ṱhogomele, a ya shangoni ḽa kule lwa tshifhinga tshilapfu.+
10 Fhedzi musi tshifhinga tsha u fula nḓirivhe tshi tshi swika, a ruma mulanda wawe kha vhalimi uri a wane mukovhe wawe wa nḓirivhe. Naho zwo ralo, vhalimi vha mu rwa vha mu humisa a songo fara tshithu.+
11 A ruma muṅwe mulanda. Na onoyo vha mu rwa, vha mu shonisa, a huma a songo fara tshithu.
12 A ruma mulanda wa vhuraru; na onoyo vha mu huvhadza vha mu posela nnḓa ha tsimu.
13 Muṋe wa tsimu ya minḓirivhe a ri, ‘Ndi ḓo ita mini? Ndi ḓo ruma murwa wanga ane nda mu funa.+ Khamusi vha ḓo mu ṱhonifha.’
14 Musi vhalimi vha tshi mu vhona, vha amba nga tshavho vha ri, ‘Hoyu ndi ene muḽaifa; kha ri mu vhulaye uri ri wane ifa ḽawe.’
15 Vha mu posela nnḓa ha tsimu ya minḓirivhe vha mu vhulaya.+ Muṋe wa tsimu ya minḓirivhe u ḓo ita mini nga vhenevho vhalimi?
16 U ḓo ḓa a vhulaya vhenevho vhalimi, a ṋea vhaṅwe vhathu yeneyo tsimu.”
Musi vha tshi pfa zwenezwo, vha ri: “Zwi nga si vhuye zwa itea!”
17 A vha lavhelesa a ri: “Maṅwalo a amba mini musi a tshi ri: ‘Tombo ḽe ḽa laṱwa nga vhafhaṱi ḽo vha thikho ya tshifhaṱo’?+
18 Ane a wela nṱha ha ḽeneḽo tombo u ḓo vunḓekana.+ Ane ḽa mu wela, ḽi ḓo mu kwaṱula.”
19 Musi vhamaṅwalo na vhahulwane vha vhotshifhe vha tshi pfa tshenetsho tshifanyiso, vha zwi ṱhogomela uri u khou amba nga havho. Nga tshenetsho tshifhinga vho vha vha tshi ṱoḓa u mu fara, fhedzi vho vha vha tshi ofha vhathu.+
20 Nga murahu ha u mu vhea ḽiṱo, vha thola vhanna uri vha ḓiite vhavhuya, vha vha ruma uri vha mu fashe nga zwine a zwi amba,+ vha kone u mu kumedzela kha muvhuso na kha muvhusi.
21 Vhone vha ri: “Mufunzi, ri a zwi ḓivha uri zwine wa zwi amba na u zwi funza ndi zwone na uri a u ṱaluli muthu, u funza nḓila ya ngoho ya Mudzimu:
22 Naa zwo tea uri ri badele Kesare mithelo?”
23 Fhedzi a vhona uri vha na vhukwila, a amba navho a ri:
24 “Ntsumbedzeni dinari.* Tshifanyiso itshi na dzina iḽi ndi zwa nnyi?” Vhone vha ri: “Ndi zwa Kesare.”
25 Yesu a ri: “Kesare mu ṋeeni zwi re zwawe,+ na Mudzimu ni mu ṋee zwi re zwawe.”+
26 Vha si kone u mu fasha kha zwe a vha a tshi khou zwi amba phanḓa ha vhathu, fhedzi vha fhumula nge vha mangadzwa nga phindulo yawe.
27 Ha ḓa vhaṅwe Vhasadukei vhane vha tenda uri vhathu a vha nga vuswi,+ vha mu vhudzisa vha ri:+
28 “Mufunzi, Mushe o ri ṅwalela a ri, ‘Arali munna a fa a sia mufumakadzi a si na ṅwana, murathu wawe u fanela u vhinga onoyo mufumakadzi uri a bebele mukomana wawe ṅwana.’+
29 Ho vha hu na vhanna vha sumbe vha re vhana vha muthu, wa u thoma a vhinga mufumakadzi, fhedzi a fa a si na ṅwana.
30 Wa vhuvhili
31 na wa vhuraru vha mu vhinga. Vhoṱhe vha sumbe vha mu vhinga, vha fa vha si na ṅwana.
32 Mafheleloni na onoyo mufumakadzi a fa.
33 Musi vhafu vha tshi vuswa, onoyo mufumakadzi u ḓo vha wa nnyi kha vhenevho vha sumbe? Ngauri vhoṱhe vho vha vho mu vhinga.”
34 Yesu a ri: “Vhathu vha ḽino shango* vha a vhinga na u vhingwa,
35 fhedzi vhane vha fanelea u tshila kha shango ḽi ḓaho na vhane vha fanelea u vuswa vhafuni a vha nga vhingi kana u vhingwa.+
36 A vha tsha ḓo fa, ngauri vha ḓo nga vharuṅwa, vha ḓo vha vhana vha Mudzimu vhe a vha vusa vhafuni.*
37 Musi Mushe a tshi amba nga ha zwe zwa itea tshiṱakani tsha mipfa tshi dugaho, o amba nga ha u vuswa ha vhafu. O ri Yehova* ‘ndi Mudzimu wa Abrahamu, Mudzimu wa Isaka na Mudzimu wa Yakobo.’+
38 Ndi Mudzimu wa vha tshilaho, hu si vho faho, ngauri khae vhoṱhe vha khou tshila.”+
39 Vhaṅwe vhamaṅwalo vha ri: “Mufunzi, wo amba zwavhuḓi.”
40 Ngauri vho vha vha si tshee na tshivhindi tsha u mu vhudzisa dziṅwe mbudziso.
41 Yesu a vha vhudzisa a ri: “Ndi ngani vhathu vha tshi ri Kristo ndi murwa wa Davida?+
42 Ngauri Davida o amba kha bugu ya Dziphisalema a ri: ‘Yehova* o amba na Murena wanga a ri: “Dzula thungo ya tshanḓa tshanga tsha u ḽa
43 u swika ndi tshi ita uri u kande maswina au.”’*+
44 Arali Davida o mu vhidza Murena; a nga vha hani murwa wawe?”
45 Musi vhathu vhoṱhe vho thetshelesa, a amba na vhafunziwa vhawe a ri:
46 “Thanyelani vhamaṅwalo vhane vha funa u tshimbila vho ambara zwiambaro zwavhuḓi, na u ṱoḓa u lumeliswa mimakete, na u funa u dzula zwiduloni zwa phanḓa sinagogoni, na u dzudzwa zwiduloni zwo vhetshelwaho vhaeni vha vhuimo ha nṱha zwimimani,+
47 na vhane vha dzhia nnḓu* dza tshilikadzi na u ita thabelo ndapfu u itela u vhonwa. Vhenevho vha ḓo wana khaṱhulo i vhavhaho vhukuma.”
Ṱhaluso dzi re magumoni a siaṱari
^ Sedzani Ṱhume. B14.
^ Sedzani Mutevhe Wa Ṱhalutshedzo Ya Maipfi.
^ Kana “vhana vha mvuwo.”
^ Thevhedz., “ita maswina au vhukando ha milenzhe yau.”
^ Kana “thundu.”
