Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TENUARE 2014

No te aha e hinaaro ai i te Atua?

No te aha e hinaaro ai i te Atua?

E parau te feia hi‘opoa i te pae feruriraa e eita te taata e oaoa ia haamâha-noa-hia to ratou mau hinaaro i te pae tino. Tera iho â te itehia, e hinaaro hoi te taata e rave i te tahi ohipa faahiahia aore ra e tavini i tei rahi a‘e ia ’na. Eaha ïa ta vetahi e rave? E haa ratou no te natura, te ohipa rimaî, te upaupa e te vai ra ’tu â. A tapi ai râ i tera mau mea, e rave rahi tei ore â i ite i te oaoa mau.

Te hinaaro ra te Atua ia oaoa te taata i teie nei â e a muri noa ’tu

Eita te feia taio Bibilia e maere i te reira. Ua ite hoi ratou e e ua poietehia te taata e tera hinaaro. Te faaite ra hoi te mau pene matamua o te buka Genese e i muri a‘e i te poieteraa i na taata matamua, e tauaparau noa na te Atua ia raua. Ua faatia ïa oia ia faatupu na hoa faaipoipo i te taairaa e o ’na. (Genese 3:8-10) Ua hamani ïa te Atua i te taata ia hinaaro e ite o vai o ’na eiaha râ no te ora ma te ore e tâu‘a ia ’na. Ua faahiti iho â te Bibilia i tera hinaaro.

Ei hi‘oraa, ua na ô Iesu: “Ia ite ratou ia oe i te Atua mau ra.” (Ioane 17:3) Ma tera mau parau, ua taa iho â ïa ia tatou e mea faufaa roa ia ite o vai te Atua no te oaoa. Eaha ïa te rave? Ua pahono Iesu a na ô ai oia: “E ore te taata e ora i te maa ana‘e ra, i te mau mea atoa râ i haapaohia e te Atua.” (Mataio 4:4) E ite tatou i te oaoa mau maoti ta te Atua mau parau e aratairaa, oia atoa to ’na mau mana‘o i roto i te Bibilia. E nafea? E hi‘opoa ana‘e e toru tumu faufaa.

E hinaaro tatou i te aratairaa maitai

E toroa no vetahi ia horoa i te mana‘o tauturu no nia i te taairaa e vetahi ê, te here, te oraraa utuafare, te ravea no te faaafaro i te fifi, te oaoa e te tumu o te oraraa. O vai râ te horoa i  te taata i te aratairaa maitai roa ’‘e? E ere anei to tatou Atua Poiete Iehova?

E au te Bibilia i te hoê buka o te haamaramarama i te taata no nia i te oraraa

A hoo mai ai i te tao‘a apî mai te pata hoho‘a aore ra matini roro uira, eita anei te hoê buka haamaramaramaraa e horoa-atoa-hia mai? Oia, na te reira hoi e faataa e nafea ia faaohipa ma te tano i te matini a tere maitai atu ai te reira. Hoê â atoa no te Bibilia. E buka haamaramaramaraa tera no nia i te oraraa o te taata. Tei hamani, o te Atua e te feia i fana‘o i te matini, o tatou ïa. I roto i te Bibilia e faataahia ’i te tumu o te oraraa e e nafea ia ite i te oaoa mau.

Mai te hoê buka haamaramaramaraa maitai, e faaite mai te Bibilia i te mau peu e ino e e maitai ai te oraraa. No tatou, mea tano e ohie a‘e paha ia haapao i ta vetahi ê e parau mai. Ia ore râ te fifi ia tupu e ia oaoa tatou, e ere anei i te mea maitai ia pee noa i te aratairaa a te Atua Poiete?

“O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te e‘atia maitai ia haere oe ra. Ahiri oe i faaroo mai i te mau faaue na ’u e; ua riro ïa to oe maitai mai te pape pue ra; e ta oe utua mai te are moana ra.”—Isaia 48:17, 18

I roto i te Bibilia e itehia ’i te aratairaa e te tauturu ta tatou e hinaaro

Noa ’tu e te aratai e te a‘o nei te Atua ra o Iehova ia tatou, aita oia e faahepo maira ia farii i te reira. No to ’na râ here e hinaaro e tauturu ia tatou, te faaitoito maira oia ma te na ô: “O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te e‘atia maitai ia haere oe ra. Ahiri oe i faaroo mai i te mau faaue na ’u e; ua riro ïa to oe maitai mai te pape pue ra; e ta oe utua mai te are moana ra.” (Isaia 48:17, 18) Te auraa, ia haapao tatou i ta te Atua aratairaa, e oaoa tatou. No te reira, e hinaaro iho â tatou i te Atua no te ora ma te oaoa.

E hinaaro tatou e ite i te tumu o te mau fifi

Eita vetahi e taa no te aha te hoê Atua î i te here e vaiiho ai i te mau ohipa tano ore ia tupu. No ratou, e mea faufaa ore ia tiaturi i te Atua. Te uiui nei paha ratou: ‘No te aha te taata maitai e mauiui ai?’ ‘No te aha vetahi aiû e fanau-huma-hia ’i?’ ‘No te aha e mea fifi roa ’i te oraraa?’ Ma te ite i te pahonoraa i tera mau uiraa faufaa roa, e nehenehe to tatou oraraa e taui. Hou a pari ai i te Atua, e hi‘opoa ana‘e e nafea te Parau a te Atua, te Bibilia, e pahono mai ai.

Te faatia ra te pene toru o te Genese e mea nafea Satani i te faaohiparaa i te tahi ophi ia patoi na hoa faaipoipo matamua i ta te Atua faaueraa eiaha e amu i to te raau e ite ai i te maitai e te ino. Ua parau Satani ia Eva: “E ore roa orua e pohe: ua ite hoi te Atua e, ua amu ana‘e orua i to reira, e araara ïa to orua mata, e e riro orua mai te atua ra te huru, i te ite i te maitai e te ino.”—Genese 2:16, 17; 3:4, 5.

Aita noa ïa Satani i parau e te haavare ra te Atua, ua pari atoa râ e mea tia ore ta ’na faatereraa. No Satani, e oaoa a‘e te taata mai te peu  e na ’na e faatere ia ratou. Ua nafea Iehova? Ua vaiiho oia ia Satani e tei pee atu ia ’na ia haapapu e e oaoa te taata ia haapae i ta te Atua aratairaa. Na te tau e faaite e mea tano anei te reira.

Eaha ta oe e pahono i ta Satani mau pariraa? E oaoa anei te taata e e manuïa anei o ’na i te faatere ia ’na iho ma te tuu i te Atua i te hiti? Eaha te itehia ra mai te tau e te tau? Te mauiui, te ohipa tia ore, te ma‘i, te pohe, te taparahiraa taata, te haerea tano ore, te tama‘i, te haapoheraa taata e te vai ra ’tu â. Ua tamata te taata i te faatere ia ’na iho ma te ore e haapao i te Atua, aita râ i manuïa! E ere te Atua te tumu o te mau fifi. Te na ô ra hoi te Bibilia: “E faahepo te taata i te tahi taata è ei ino nona iho.”—Koheleta 8:9, Te Bibilia Mo’a V.C.J.S. (1976)

E ere anei ïa i te mea tano ia fariu atu i te Atua no te ite i te pahonoraa i tera mau uiraa e no te faaafaro i te fifi? E nafea te Atua?

E hinaaro tatou i ta te Atua turu

Mea maoro to te taata hinaaroraa e tiamâ mai i te ma‘i, te ruhiruhiaraa e te pohe. Ua mâu‘a rahi te taime, puai e faufaa i te tapiraa i te reira. Ua tiaturi vetahi e ma te faaohipa i te tahi raau parai aore ra inu e ma te ora i te hoê vahi taa ê, e nehenehe ratou e apî noa. E moemoeâ noa râ tera!

Te hinaaro ra te Atua ia maitai e ia oaoa te taata. Tera ta ’na i opua no te huitaata e aita i taui. (Genese 1:27, 28; Isaia 45:18) Te haapapu maira te Atua ra o Iehova e e tupu iho â ta ’na i opua. (Isaia 55:10, 11) Ia au i te Bibilia, e riro faahou te fenua ei paradaiso mai te haamataraa. Te na ô ra te buka hopea o te Bibilia: “Na te Atua [Iehova] e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito.” (Apokalupo 21:4) E nafea te Atua e faatupu ai i tera oraraa faahiahia? Ia aha tatou no te fana‘o i te reira?

Ua haapii te Tamaiti a te Atua o Iesu Mesia i ta ’na mau pǐpǐ ia pure ia tupu to te Atua hinaaro. E rave rahi tei ite aore ra tei faahiti pinepine i tei matauhia i te parau te Pure a te Fatu. Te na ô ra te reira: “E to matou Metua i te ao ra, ia raa to oe i‘oa. Ia tae to oe ra basileia. Ia haapaohia to oe hinaaro i te fenua nei mai tei te ra‘i atoa na.” (Luka 11:2) Maoti ïa te Basileia o te Atua ra o Iehova e ore ai te mau faahopearaa iino o te faatereraa a te taata e e tupu ai te ao apî parau-tia ta ’na i fafau. * (Daniela 2:44; Petero 2, 3:13) Ia nafea tatou no te fana‘o i ta te Atua parau fafau?

Ua faaite Iesu Mesia eaha te rave na mua: “Teie hoi te ora mure ore, ia ite ratou ia oe i te  Atua mau ra, e ia Iesu i te Mesia i ta oe i tono mai.” (Ioane 17:3) Ma te turu a te Atua, e nehenehe e fana‘o i te ora mure ore i roto i te ao apî. Aita anei teie tiaturiraa e haapapu ra e e hinaaro iho â te taata i te Atua?

Teie te taime no te imi i te Atua

I ineine na to Ateno i te faaroo i te mana‘o apî. A piti tausani matahiti a‘enei i te Areopago, teie ïa ta te aposetolo Paulo i parau atu no nia i te Atua: “Oia iho hoi tei horoa mai i te ora, e te aho, e te mau mea atoa, i te mau mea atoa nei. No ’na hoi to tatou ora, e i hahaere ai, e i parahi ai hoi; mai ta ve toofanu o to outou mau rohipehe i parau maira e, E tamarii atoa tatou na ’na.”—Ohipa 17:25, 28.

E mea tano noâ ta Paulo i parau i to Ateno. Te horoa maira hoi to tatou Atua Poiete i te aho ta tatou e huti, te maa ta tatou e amu e te pape ta tatou e inu. Aita ana‘e tera mau mea maitai, e pohe tatou. No te aha râ Iehova e horoa noa ’i i te reira i te taatoaraa noa ’tu e eita vetahi e tâu‘a ia ’na? Ua na ô Paulo: “Ia imi te taata i te Atua, penei a’e ’o te itea oia ia ratou ia imi perehahu ratou iana; aore roa hoi oia i atea roa ia tatou tataitahi.”—Ohipa 17:27, Te Faufaa Api.

E hinaaro anei oe e ite atu â no nia i te Atua e e haapii i ta ’na mau opuaraa e a‘oraa no te oaoa i teie nei â e a muri noa ’tu? Mai te peu e e, te faaitoitohia ra oe ia tauaparau e te taata i horoa ’tu i teie vea aore ra ia papai i te feia i pia i te reira. E oaoa roa ratou i te tauturu ia oe.

^ par. 19 No te ite atu â e nafea te Basileia o te Atua e faatupu ai i to ’na hinaaro i te fenua nei, a hi‘o i te pene 8 o te buka Eaha ta te Bibilia e haapii mau ra? piahia e te mau Ite no Iehova. E nehenehe atoa e rave mai i nia www.jw.org/ty.