Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TENUARE 2014

 E HAAFATATA ’TU I TE ATUA

Tei haamaitai i te feia e imi mau ra ia ’na

Tei haamaitai i te feia e imi mau ra ia ’na

No Iehova, mea faufaa anei ta tei haamori ia ’na e rave ra ia mauruuru oia? E pahono vetahi, aita, ma te parau e eita te Atua e tâu‘a maira ia tatou. Ua hape roa râ to ratou mana‘o no nia ia ’na. Tei roto i ta ’na Parau, te Bibilia, te faatiaraa tano. Te haapapu maira hoi te reira e no Iehova, e mea faufaa te mau tutavaraa a tei haamori ra ia ’na ma te taiva ore. E hi‘opoa ana‘e i ta Paulo i parau: “Aore e faaroo ra e ore roa ’tu oia e mauruuru: o te haafatata ’tu i te Atua ra, ia tiaturi e te vai nei oia e tia ’i e o oia te haamaitai i te feia e imi mau ra ia ’na.”—Hebera 11:6, Traduction du monde nouveau.

Eaha te mea e ore ai Iehova e mauruuru? Ua papai Paulo, “Aore e faaroo ra e ore roa ’tu [te Atua] e mauruuru.” A tapao na e aita Paulo i parau e aore ana‘e to te taata faaroo, e mea fifi no te Atua ia mauruuru ia ’na. Ua na ô râ, e ore roa ’tu oia e mauruuru. Te auraa, ia auhia tatou e te Atua, e mea faufaa roa te faaroo.

Ia aha ia mauruuru aore ra ia au Iehova i to tatou faaroo? A tahi, “e tiaturi [tatou] e te vai nei oia e tia ’i.” I roto i te tahi atu huriraa, ua papaihia “ia faaroo ïa e, te vai nei te Atua.” E nafea iho â te Atua e au mai ai ia ore tatou e tiaturi mau e te vai nei o ’na? Ua papu atoa hoi i te mau demoni e te vai mau nei Iehova! (Iakobo 2:19) Ia faatupu tatou i te faaroo mau i te Atua, e haapapu ana‘e i te reira ma te rave i ta te Atua e au.—Iakobo 2:20, 26.

Te piti, e mea tia ia faaroo e o te Atua “te haamaitai.” No te taata i faatupu i te faaroo mau, e ere ta ’na mau tutavaraa no te rave i ta te Atua e au i te mea faufaa ore. (Korinetia 1, 15:58) E nafea iho â Iehova e au mai ai ia ore tatou e tiaturi e nehenehe ta ’na e haamaitai ia tatou e te hinaaro atoa ra oia e na reira? (Iakobo 1:17; Petero 1, 5:7) Ia mana‘o te tahi taata e eita te Atua e tâu‘a, e mauruuru e e hamani maitai ia tatou, aita ïa o ’na i ite mau o vai te Atua o te Bibilia.

O vai ta Iehova e haamaitai? Te na ô ra Paulo, “te feia e imi mau ra ia ’na.” Ia au i te tahi buka no te taata huri Bibilia, ma tera mau parau, te matara ra te mana‘o e eita e navai noa ia “imi” aore ra ia haapii o vai te Atua, e mea tia râ ia tutava i te “haamori” ia ’na. Te faataa ra te tahi atu buka i tera parau Heleni mai te tahi ohipa e ravehia ma te puai e te haapao maite. E haamaitai ïa Iehova i te feia e haamori ia ’na ma te aau atoa e te itoito no to ratou faaroo ia ’na.—Mataio 22:37.

E nafea iho â Iehova e au mai ai ia ore tatou e tiaturi e nehenehe ta ’na e haamaitai ia tatou e te hinaaro atoa ra oia e na reira?

E nafea Iehova e haamaitai ai i tei haamori ia ’na ma te taiva ore? Ua fafau o ’na i te horoa ’tu i te tahi maitai faufaa mau no a muri a‘e, te ora mure ore i roto i te paradaiso i te fenua nei. Te ite ra anei oe i to ’na here e maitai rahi? (Apokalupo 21:3, 4) Te haamaitai ra Iehova i te feia e imi mau ra ia ’na i teie nei â. Ma te haapao i te aratairaa a to ’na varua mo‘a e te mau parau paari o ta ’na Parau, ua maitai mai to ratou oraraa. Auê ïa ratou i te oaoa!—Salamo 144:15; Luka 11:28.

Mea faufaa mau no Iehova te taviniraa taiva ore a te feia e haamori ra ia ’na ma te aau tae. Eita anei oe e hinaaro e haafatata ’tu ia ’na? Mai te peu e e, no te aha e ore ai e haapii atu â e nafea ia faatupu e ia faaite i te faaroo o ta Iehova e haamaitai rahi?

Taioraa Bibilia

Tito 1-3; Philemona 1-25; Hebera 1-13Iakobo 1-5