Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TENUARE 2014

 TUMU PARAU MATAMUA | PARAU HAAVARE NO NIA I TE ATUA

Te parau mau e faatiamâ

Te parau mau e faatiamâ

I te tahi mahana i Ierusalema, a faataa ’i Iesu i te taata o vai mau na to ’na Metua ra o Iehova, ua faaite atoa ’tu oia i te mau haapiiraa hape a te mau tia faaroo i to ’na tau. (Ioane 8:12-30) E haapii mai ta ’na i parau i tera taime e nafea ia papu e mea tano anei ta te taata e tiaturi ra no nia i te Atua. Ua na ô Iesu: “Ia mau maite outou i ta ’u parau, e pǐpǐ mau ia outou na ’u i reira. E ite ïa outou i te parau mau, e na te parau mau outou e faatiamâ.”—Ioane 8:31, 32.

“Ia mau maite outou i ta ’u parau.” Ua faaite ïa Iesu e nafea ia ite e e mea “mau” te tahi haapiiraa. Ia faaroo oe i te tahi mea no nia i te Atua, a uiui na: ‘Ua tano anei te reira i ta Iesu mau parau e te toea o te Bibilia?’ A rave mai tei faaroo i te aposetolo Paulo e tei “hiopoa . . . i te papairaa mo’a i te mau mahana atoa, ua ti’a mau anei te mau parau i faaitehia ia ratou.”—Ohipa 17:11, Te Faufaa Api.

Ua hi‘opoa maite Marco, Rosa e Raymonde i faahitihia ’tu na i ta ratou mau tiaturiraa ma te haapii i te Bibilia e te mau Ite no Iehova. Eaha ïa ta ratou i taa?

Marco: “No te pahono i ta ’u mau uiraa e ta to ’u hoa faaipoipo, ua faaohipa noa tei haapii mai ia ’u i te Bibilia. Rahi mai nei to mâua here ia Iehova e ua piri atu â vau i ta ’u vahine!”

Rosa: “I te haamataraa, no ’u, ua tuu noa te taata i to ratou mana‘o no nia i te Atua i roto i te Bibilia. I teie nei râ, ua pahono mai te Bibilia i ta ’u mau uiraa. I teie nei, e mea mau Iehova no ’u. O ’na ta ’u e tiaturi.”

Raymonde: “I pure na vau i te Atua ia tauturu mai ia ite o vai mau O ’na. Aita i maoro, ua haapii vau e ta ’u tane i te Bibilia. Ite a‘era mâua i te parau mau no nia ia Iehova! Auê mâua i te oaoa a ite ai eaha mau na te huru o te Atua!”

Eita noa te Bibilia e tauturu mai ia ite i te mau parau haavare no nia i te Atua, i te parau mau atoa râ no nia i to ’na mau huru maitatai. Maoti ta ’na Parau faaurua, e “ite tatou i te mau mea i horoa-noa-hia mai e te Atua no tatou nei.” Eaha ïa te reira? Te parau mau no nia i te Atua, ta ’na opuaraa e to tatou a muri a‘e. (Korinetia 1, 2:12) No te aha e ore ai e hi‘o i ta te Bibilia e pahono i tera mau uiraa faufaa roa? E nehenehe atoa oe e ani i te hoê haapiiraa Bibilia i nia www.jw.org/ty aore ra i te mau Ite no Iehova. Ma te na reira, e hinaaro atu â oe e here i te Atua.