Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TENUARE 2014

 TUMU PARAU MATAMUA | PARAU HAAVARE NO NIA I TE ATUA

Te parau haavare e mea ino te Atua

Te parau haavare e mea ino te Atua

TA TE RAHIRAA E TIATURI

“I muri iti noa ’‘e i te pohe, e pou te mau varua o te taata i rave i te hara pohe i te po auahi, i reira ratou e mauiui ai i te faautuaraa o te po auahi, ‘te auahi mure ore.’” (Catéchisme de l’Église catholique) Ua parau vetahi tia haapaoraa e e vahi tera e faataa-ê-roa-hia ratou i te Atua.

TE PARAU MAU I ROTO I TE BIBILIA

“O tei rave i te hara ra, o te pohe ïa.” (Ezekiela 18:4) Aita “a te feia i pohe ra e parau itea.” (Koheleta 9:5) Mai te peu e e pohe tei hara e aita hoê a‘e mea o to ’na tino e ohipa faahou ra, e nafea o ’na e mauiui ai i “te auahi mure ore” aore ra i te faataa-ê-raa i te Atua?

E rave rahi te mana‘o nei e te parau “Hade” o te hoê ïa vahi e haamauiuihia ’i te taata i te auahi mure ore. Ia au râ i te Bibilia, ua taaihia te reira i te pohe. Ei hi‘oraa, te faahiti ra te Bibilia i te tahi parau tohu no nia ia Iesu: “E ore hoi oe e vaiiho i tau varua i hade [aore ra menema].” (Ohipa 2:27) Mea papu e aita Iesu i haere i te hoê vahi haamauiuiraa a faataa-ê-hia ’tu ai o ’na i te Atua, ua pohe noa râ o ’na.

TE FAUFAARAA IA ITE

E hinaaro anei tatou e haafatata ’tu i te Atua mai te peu e e mea ino o ’na? Te parau ra te tahi vahine no Mehiko o Rocío te i‘oa: “I to ’u tamariiraa, ua haapiihia ia ’u te parau o te po auahi. E riaria na vau i te Atua a mana‘o atu ai e aita to ’na e huru maitatai. No ’u, e riri rahi to te Atua e e mea ino roa atoa.”

Ua taui râ to Rocío mana‘o a ite ai oia i ta te Bibilia e parau ra no nia i ta te Atua mau haavaraa e te tupu i muri a‘e i te pohe. Te na ô ra o ’na: “Ua topa roa to ’u hau. Ua haamata ’tura vau i te tiaturi e te hinaaro mau ra te Atua i to tatou maitai, te here ra oia ia tatou a nehenehe atu ai te taata e here atoa ia ’na. E au o ’na i te hoê metua tane o te rave i ta ’na tamarii na te rima e o te hinaaro i to ’na maitai.”—Isaia 41:13.

No to ratou riaria i te po auahi, e rave rahi te haamori nei i te Atua ma te faatia ture noa. Eita râ hoi te Atua e hinaaro ia tavini te taata ia ’na no te riaria. Ua na ô Iesu: “E hinaaro [aore ra here] oe i to Atua ia Iehova.” (Mareko 12:29, 30) Hau atu â, ia papu ia tatou e eita te Atua e rave i te ohipa tia ore, e tiaturi ïa tatou i ta ’na mau haavaraa no a muri a‘e. Mai ia Elihu, te hoa o Ioba, e parau ana‘e: “Eiaha roa te Puaihope ia parauhia i te rave parau ino!”—Ioba 34:10.