TUMU PARAU MATAMUA | PARAU HAAVARE NO NIA I TE ATUA
Te parau haavare e miterio te Atua
TA TE RAHIRAA E TIATURI
Ei haapaoraa Kerisetiano, te farii nei “na pûpû faaroo rahi o te haapaoraa Katolika, Ekalesia Orthodoxe no Hitia o te râ e Porotetani e e Toru tahi te Atua: te Metua, te Tamaiti e te Varua Maitai hoê ïa. Ia au i te haapiiraa Kerisetiano, e ere e toru atua, e toru râ tuhaa i roto i te hoê atua.”—The New Encyclopædia Britannica.
TE PARAU MAU I ROTO I TE BIBILIA
Aita Iesu, te Tamaiti a te Atua, i parau noa ˈˈe e ua faito o ˈna i to ˈna Metua aore ra hoê â raua. Ua na ô râ: “O vau e haere tia i te Metua ra; e rahi hoi tau Metua ia ˈu.” (Ioane 14:28) Ua parau atoa oia i te hoê o ta ˈna mau pǐpǐ: “Te haere nei au i tau Metua ra e to outou Metua ra, e i tau Atua ra e to outou Atua.”—Ioane 20:17.
E ere te varua moˈa i te hoê atua. No te mau Kerisetiano matamua, te na-ô-hia ra: ‘E î aˈera ratou atoa i te varua moˈa.’ Ua parau atoa Iehova: ‘E ninii atu ai au i tau varua i nia iho i te taata atoa.’ (Ohipa 2:1-4, 17) E ere ïa te varua moˈa i te tahi tuhaa o te hoê Toru tahi, o te puai ohipa râ o te Atua.—Genese 1:2.
TE FAUFAARAA IA ITE
No te Toru tahi, ua faataa na aivanaa hiˈopoa i te haapaoraa Katolika Karl Rahner e Herbert Vorgrimler, “aita anaˈe e faaiteraa, eita e nehenehe e ite i te reira e i muri aˈe i te faaiteraa, eita iho â e nehenehe e taa i te taatoaraa o te reira.” E au ra ïa e e miterio te Atua. E nehenehe anei e here i te tahi o ta oe i ore i matau maitai? E au ra ïa e ua riro te haapiiraa o te Toru tahi ei patu o te tapea ra ia oe ia ite o vai te Atua e ia here ia ˈna.
Tera iho â no Marco i faahitihia i te tumu parau matamua. Te na ô ra o ˈna: “No ˈu, te huna ra te Atua i te tahi mea no nia ia ˈna, huru ê atura vau a manaˈo atu ai e eita e nehenehe e ite o vai mau o ˈna, eita atoa e tia ia haafatata ˈtu ia ˈna.” Tera râ, “e ere hoi te Atua i te tumu no te anoi.” (Korinetia 1, 14:33) Aita te Atua i huna ia ˈna i te taata, ua hinaaro râ e faaite o vai mau o ˈna. Ua parau Iesu: “Ua ite matou i ta matou e haamori nei.”—Ioane 4:22.
Te na ô atoa ra Marco: “A haapii ai e e ere te Atua i te tahi tuhaa o te hoê Toru tahi, ua nehenehe atura vau e faatupu i te taairaa piri roa e o ˈna.” Mai te peu e e mea mau Iehova e e haafatata ˈtu oe ia ˈna, e nehenehe oe e here ia ˈna. Te na ô ra te Bibilia: “O tei ore i aroha ra, aore ïa i ite i te Atua; e aroha hoi te Atua.”—Ioane 1, 4:8.
