Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  Tenuare 2014

 TUMU PARAU MATAMUA | PARAU HAAVARE NO NIA I TE ATUA

Te parau haavare e aita to te Atua e i‘oa

Te parau haavare e aita to te Atua e i‘oa

TA TE RAHIRAA E TIATURI

“Eita te mana‘o o te taatoaraa e tu ra no te parau e i‘oa to te Atua, oia atoa, eaha tera i‘oa.”—Orometua David Cunningham, Theological Studies.

TE PARAU MAU I ROTO I TE BIBILIA

Ua parau te Atua: “O vau o Iehova, o to ’u ïa i‘oa.” (Isaia 42:8) Na roto i te reo Hebera, “Na ’na e faariro” te auraa o te i‘oa “Iehova.”—Exodo 3:14.

Te hinaaro ra Iehova ia faahiti tatou i to ’na i‘oa. Te na ô ra te Bibilia: “E tiaoro atu i to ’na i‘oa; e faaite i te taata i ta ’na mau ravea puai; e faaite outou i te teitei o to ’na ra i‘oa.”—Isaia 12:4.

E faaohipa na Iesu i to te Atua i‘oa. A pure ai, ua parau oia ia Iehova: “E ua faaite atu hoi au ia ratou [ta Iesu mau pǐpǐ] e e faaite atu â vau, i to oe i‘oa.” No te aha Iesu i na reira ’i? Ua pahono atu oia mai te here o te Atua ia ’na, ia faatupu atoa ratou i tera here ia hoê o ’na e ratou.—Ioane 17:26.

TE FAUFAARAA IA ITE

Ua papai te orometua no te mau haapiiraa faaroo, Walter Lowrie: “Te taata i ore i ite e i‘oa to te Atua aita ïa oia e tiaturi papu ra e te vai nei O ’na. Mai te peu e e puai noa te reira no ’na, eita ïa ta ’na e nehenehe e here atu.”

Ma te huna aore ra mono i te i‘oa o te Atua e au e te tâpûhia ra te tahi tuhaa o te Bibilia

I haere pinepine na Victor i te fare pure i te mau hebedoma atoa. No ’na râ, aita oia i ite o vai mau te Atua. Te parau ra o ’na: “A haapii ai râ vau e o Iehova te i‘oa o te Atua, e au ra e ua faaite mai oia o vai ra o ’na. I faarooroo na vau i to ’na parau, i teie nei râ, ua matau vau ia ’na. Mea mau te Atua no ’u e te faatupu ra vau i te taairaa piri e o ’na.”

E haafatata Iehova i te taata e faaohipa i to ’na i‘oa. No “tei mana‘o i to ’na ra i‘oa,” ua fafau te Atua: “E riro ratou na ’u . . . ei tao‘a maitai roa ra; e na ’u e faaherehere ia ratou mai te taata e faaherehere i ta ’na ihora tamaiti ia tavini atu ia ’na ra.” (Malaki 3:16, 17) E haamaitai atoa te Atua i te feia e faahiti i to ’na i‘oa. Te na ô ra te Bibilia: “O te tiaoro atoa hoi i te i‘oa o Iehova ra, e hope roa ïa i te ora.”—Roma 10:13.