Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

Eaha ta te Bibilia e haapii mau ra?

 PENE VAU

Eaha te Basileia o te Atua?

Eaha te Basileia o te Atua?
  • Eaha ta te Bibilia e parau maira no nia i te Basileia o te Atua?

  • Eaha ta te Basileia o te Atua e rave?

  • Afea te Basileia e faatupu ai i te hinaaro o te Atua i te fenua nei?

1. Teihea pure tuiroo o te hi‘opoahia i teie nei?

E MAU mirioni taata i te ao nei tei matau i te pure e parauhia e rave rahi te Pure a te Fatu. E parau teie no te hoê pure tuiroo tei horoahia ei hoho‘a e Iesu Mesia iho. E pure faufaa roa, e na roto i te hi‘opoaraa i na aniraa matamua e toru, e ite atu â ïa outou i ta te Bibilia e haapii mau ra.

2. Eaha e toru o te mau mea ta Iesu i haapii i ta ’na mau pǐpǐ ia pure?

2 I te omuaraa o teie hoho‘a pure, teie ta Iesu i faaue i te feia e faaroo ra ia ’na: “E na ô outou ia pure: E to matou Metua i te ao ra, ia raa to oe i‘oa. Ia tae to oe ra hau. Ia haapaohia to oe hinaaro i te fenua nei, mai tei te ao atoa na.” (Mataio 6:9-13) Eaha te auraa o teie na aniraa e toru?

3. Ia ite tatou i te aha no nia i te Basileia o te Atua e tia ’i?

3 Mea rahi ta tatou i haapii ê na no nia i te i‘oa o te Atua, o Iehova. E ua paraparau rii na tatou i te hinaaro o te Atua—i ta ’na i rave e e rave â no te huitaata. Eaha râ ta Iesu e parau ra ia ’na i faaue ia tatou ia pure: “Ia tae to oe ra hau”? Eaha te hau, aore ra Basileia, o te Atua? E nafea te taeraa mai o te reira e faaraa ’i, aore ra e haamo‘a ’i, i te i‘oa o te Atua? E eaha te taairaa o te taeraa mai o te Basileia e te haapaoraa i te hinaaro o te Atua?

 TE BASILEIA O TE ATUA

4. Eaha te Basileia o te Atua, e o vai to ’na Arii?

4 E faatereraa te Basileia o te Atua i haamauhia e te Atua ra o Iehova ma te hoê Arii i maitihia e ana. O vai te Arii o te Basileia o te Atua? O Iesu Mesia. Ei Arii, e mea teitei a‘e oia i te mau taata faatere atoa e e parauhia oia “te Arii o te hui arii, e te Fatu o te mau fatu ra.” (Timoteo 1, 6:15) E mana to ’na e rave i te maitai rahi a‘e i te mau taata faatere atoa, te taata faatere maitai roa ’‘e atoa i rotopu ia ratou.

5. Maihea mai te Basileia o te Atua e faatere ai, e i te aha?

5 Maihea mai te Basileia o te Atua e faatere ai? E teihea hoi Iesu? Eita e ore e te haamana‘o ra outou e ua haapohehia oia i nia i te hoê pou haamauiuiraa, e ua faatiahia mai oia. I muri noa ’‘e, ua maue oia i nia i te ra‘i. (Ohipa 2:33) To reira atoa ïa te Basileia o te Atua—to nia i te ra‘i. No reira te Bibilia e parau ai e e “basileia i te ao ra,” aore ra i te ra‘i ra. (Timoteo 2, 4:18) To nia te Basileia o te Atua i te ra‘i, e faatere râ te reira i te fenua.—A taio i te Apokalupo 11:15.

6, 7. Na te aha e faariro ia Iesu ei Arii faahiahia?

6 Na te aha e faariro ia Iesu ei Arii faahiahia? A tahi, e ore roa oia e pohe. Ma te faaau ia Iesu i te mau arii taata, te parau ra te Bibilia ia ’na “tei ia ’na ana‘e te pohe ore, e te parahi ra hoi i roto i te maramarama taea-ore-hia e te taata atoa.” (Timoteo 1, 6:16) Te auraa ra e e vai noa te mau mea maitatai atoa ta Iesu e rave ra. E mea rahi te ohipa maitai ta ’na e rave.

7 A hi‘o na i teie parau tohu Bibilia no nia ia Iesu: “E vai â te varua o Iehova i nia ia ’na; te varua o te paari e no te ite; te varua faaa‘o e no te puai; te varua no te ite, e no te mǎta‘u ia Iehova; e rahi hoi to ’na ite i te mǎta‘u ia Iehova; e ore hoi ta ’na parau e faaauhia i tei itea e tana mata; e ore hoi oia e a‘o i ta to ’na tari‘a i faaroo ra: e haava râ oia i te taata rii ma te parau-tia ra; e tuu hoi oia i te parau au i  te feia mamahu o te fenua nei.” (Isaia 11:2-4) Ia au i teie mau parau, e riro o Iesu ei Arii parau-tia e te aumihi i nia i te feia i te fenua nei. Eita anei outou e hinaaro i te hoê arii mai tera?

8. O vai ma te faatere e o Iesu?

8 Teie te tahi atu parau mau no nia i te Basileia o te Atua: E ere o Iesu ana‘e te faatere mai. E mau hoa arii to ’na. Ei hi‘oraa, ua parau te aposetolo Paulo ia Timoteo e: “Ia faaoromai atoa tatou i te ino ra, e basileia atoa to tatou i ǒ na ra.” (Timoteo 2, 2:12) Oia, e faatere atoa Paulo, Timoteo, e te tahi atu feia haapao maitai tei maitihia e te Atua, e o Iesu i roto i te Basileia i te ra‘i. Ehia te fana‘o i tera haamaitairaa otahi?

9. Ehia te faatere e o Iesu, e inafea ra to te Atua haamataraa i te maiti ia ratou?

9 Mai tei faaitehia i roto i te pene 7 o teie buka, ua ite orama te aposetolo Ioane e “te tia noa ra te Arenio [Iesu Mesia] i nia iho i te mou‘a ra o Siona [to ’na tiaraa arii i nia i te ra‘i], ma te taata atoa hoi i pihai iho ia ’na, hoê hanere e maha ahuru ma maha i te tausani, ma te i‘oa o to ’na Metua i te papairaahia i nia iho i to ratou mau rae.” O vai tera na 144 000? Te na ô maira Ioane iho e: “O te feia teie e pee i te Arenio i to ’na atoa mau haerea. I tauihia teie nei feia no roto i te taata nei, ei oho matamua na te Atua e na te Arenio ra.” (Apokalupo 14:1, 4) Oia, e mau pǐpǐ haapao maitai ratou na Iesu Mesia tei maiti-taa-ê-hia no te faatere e o ’na i nia i te ra‘i. Ia oti ratou i te faatiahia mai te pohe mai no te ora i nia i te ra‘i, “e riro ia [r]atou te hau i teie nei ao” e o Iesu. (Apokalupo 5:10) Mai te tau o te mau aposetolo mai â, te maiti ra te Atua i te mau Kerisetiano haapao maitai ia tia te numera 144 000.

10. No te aha e faanahoraa î i te here ai ia faatere Iesu e na 144 000 i te huitaata?

10 E faanahoraa î roa i te here ia faatere Iesu e na 144 000  i te huitaata. Na mua, ua ite Iesu mai te aha te huru ia riro ei taata e ia mauiui. Ua parau Paulo no nia ia Iesu: “E ere hoi to tatou i te tahu‘a rahi e ore e tia ia aroha mai ia tatou i to tatou mau paruparu nei; i ati atoa hoi oia i te mau mea atoa mai ia tatou atoa nei, aita roa râ e hara.” (Hebera 4:15; 5:8) Ua mauiui e ua faaruru atoa to ’na mau hoa arii ei taata. Ua aro atoa ratou i te huru tia ore e ua faaruru i te mau huru ma‘i atoa. Papu roa ïa e e taa ia ratou te fifi ta te taata e farerei ra!

EAHA TA TE BASILEIA O TE ATUA E RAVE?

11. No te aha Iesu i parau ai e ia pure ta ’na mau pǐpǐ ia haapaohia te hinaaro o te Atua i nia i te ra‘i e tia ’i?

11 I to Iesu parauraa e ia pure ta ’na mau pǐpǐ ia tae mai te Basileia o te Atua e tia ’i, ua parau atoa oia e ia pure ratou ia haapaohia te hinaaro o te Atua “i te fenua nei, mai tei te ao atoa na” e tia ’i. To nia te Atua i te ra‘i, e ua haapao-ê-na-hia to ’na hinaaro i reira e te mau melahi taiva ore. I roto i te pene 3 râ o teie buka, ua haapii tatou e ua faaea te hoê melahi ino i te haapao i te hinaaro o te Atua e ua turai o ’na ia Adamu e ia Eva ia hara. I roto i te pene 10, e ite atu â tatou i ta te Bibilia e haapii ra no nia i taua melahi ino ra, parauhia te Diabolo ra o Satani. Ua faatiahia ia faaea Satani e te mau varua melahi o tei maiti i te pee ia ’na—parauhia demoni—maa taime i nia i te ra‘i. No reira, e ere o te taatoaraa i nia i te ra‘i te haapao ra i te hinaaro o te Atua. Ua taui râ te mau mea a haamata ’i te Basileia o te Atua i te faatere. Ua aro atu Iesu Mesia, te Arii faaterono-apî-hia, ia Satani.—A taio i te Apokalupo 12:7-9.

12. Eaha e piti tupuraa faufaa i faataahia i roto i te Apokalupo 12:10?

12 Te faataa ra te mau parau tohu i muri nei eaha tei tupu: “E faaroo atura vau i te hoê reo rahi i nia i te ra‘i, i te na ôraa e, Teie mai nei te ora, e te puai, e te basileia o to tatou Atua, e te mana o ta ’na ra Mesia: ua hurihia hoi te  tihotiho [ra o Satani] i to tatou mau taeae i raro, o tei tihotiho ia ratou i mua i te aro o to tatou Atua i te rui e te ao.” (Apokalupo 12:10) Ua tapao anei outou e piti tupuraa faufaa roa e faataahia ra i roto i teie irava Bibilia? A tahi, e haamata te Basileia o te Atua, o Iesu Mesia te Arii, i te faatere. A piti, ua hurihia Satani mai te ra‘i mai i te fenua nei.

13. Eaha te faahopearaa o to Satani huriraahia mai te ra‘i mai?

13 Eaha te faahopearaa o taua na tupuraa e piti ra? No nia i tei tupu i nia i te ra‘i, te taio nei tatou e: “E teie nei, a oaoa, e te mau ra‘i ra e, e o outou atoa hoi o tei parahi i reira ra.” (Apokalupo 12:12) Oia, e oaoa te mau melahi taiva ore i nia i te ra‘i no te mea aita faahou o Satani e ta ’na mau demoni, e mea haapao maitai ana‘e te mau mea ora atoa i nia i te ra‘i i te Atua ra o Iehova. E hau e e au-maite-raa hope roa e te tamau to reira. Ua haapaohia ïa te hinaaro o te Atua i nia i te ra‘i.

E ati to te fenua i to Satani e ta ’na mau demoni huriraahia mai te ra‘i mai. E fatata te reira i te mou

14. Eaha tei tupu no to Satani huriraahia mai i te fenua nei?

14 E te fenua ïa? Te na ô ra te Bibilia e: “E ati . . . to te fenua e to te tai, tei raro atu na hoi te diabolo ia outou na; e riri rahi to ’na, no te mea ua ite oia e maa taime poto to ’na e toe nei.” (Apokalupo 12:12) E riri to Satani i to ’na huriraahia mai te ra‘i mai e i te mea e e maa taime poto to ’na e toe nei. No to ’na riri, te faatupu ra oia i te ahoaho, aore ra “ati,” i te fenua nei. E haapii atu â tatou no nia i taua “ati” ra i roto i te pene i muri nei. A mana‘o ai râ tatou i te reira, e nehenehe tatou e ui, E nafea te Basileia e nehenehe ai e faatupu i te hinaaro o te Atua i te fenua nei?

15. Eaha te hinaaro o te Atua no te fenua?

15 A haamana‘o na i te hinaaro o te Atua no te fenua. Ua ite outou i te reira i roto i te pene 3. I Edene ra, ua faaite te Atua i to ’na hinaaro ia riro teie fenua ei paradaiso î i te hoê nunaa taata parau-tia o te ore roa e pohe. Ua turai Satani ia Adamu e ia Eva ia hara, e ua haafifi te reira i te tupuraa o te hinaaro o te Atua no te fenua, aita râ i taui atu. Te  opua noa ra Iehova e “e parahi te feia parau-tia i nia i te fenua, e parahi tamau â ratou i reira.” (Salamo 37:29) E na te Basileia o te Atua e faatupu i te reira. E nafea?

16, 17. Eaha ta te Daniela 2:44 e parau maira no nia i te Basileia o te Atua?

16 A hi‘o na i te parau tohu o te Daniela 2:44. Te na ô ra te taioraa: “Ia tae i te anotau o taua mau arii ra, e faatupu ai te Atua o te ra‘i ra i te hoê basileia, o te ore roa ïa e mou, e ore roa hoi e riro ia vetahi ê; e hope roa hoi taua mau basileia ra i te parari e e pau, e vai tera e a muri noa ’tu.” Eaha ta teie irava e parau maira no nia i te Basileia o te Atua?

17 A tahi, e haamauhia te Basileia o te Atua “ia tae i te anotau o taua mau arii ra,” aore ra a vai noa ’i te tahi atu mau basileia. A piti, e vai noa te Basileia e a muri noa ’tu. Eita hoi e noaa i te haru e eita e monohia e te tahi atu faatereraa. A toru, e tupu te hoê tama‘i i rotopu i te Basileia o te Atua e te mau basileia o teie nei ao. E upootia te Basileia o te Atua. I te pae hopea, tera ana‘e te Basileia o te faatere i te huitaata. I reira ïa te taata e fana‘o ai i te faatereraa maitai roa ’‘e aita ratou i ite a‘enei.

18. O vai te i‘oa o te tama‘i hopea i rotopu i te Basileia o te Atua e te mau faatereraa a teie nei ao?

18 Mea rahi ta te Bibilia e parau ra no nia i taua tama‘i hopea ra i rotopu i te Basileia o te Atua e te mau faatereraa a teie nei ao. Ei hi‘oraa, te haapii ra te Bibilia e a fatata mai ai te hopea, e faaatutu te mau varua ino i te mau parau haavare no te faahema i “te hui arii o te fenua nei e o te ao atoa nei.” No teihea fa? No te “haaputu ia ratou [te hui arii] i te tama‘i i taua mahana rahi o te Atua Puai hope ra.” E haaputuputuhia te hui arii o te fenua i “te hoê vahi, o Aramagedo te i‘oa i te parau Hebera ra.” (Apokalupo 16:14, 16) No te mau mea i parauhia i roto i na irava e piti, e parauhia te aroraa hopea i rotopu i te mau faatereraa a te taata e te Basileia o te Atua, te tama‘i o Aramagedo.

19, 20. Eaha te haafifi ra i te haapaoraa i te hinaaro o te Atua i te fenua nei i teie mahana?

 19 Eaha te hinaaro ta te Basileia o te Atua e faatupu maoti Aramagedo? A mana‘o faahou na i te hinaaro o te Atua no te fenua. I opua na te Atua ra o Iehova ia î te fenua i te hoê nunaa taata parau-tia e te tia roa o te tavini ia ’na i roto i te paradaiso. Na te aha e haafifi ra i te tupuraa o te reira i teie mahana? A tahi, e taata hara tatou, e e ma‘ihia e e pohe tatou. Ua haapii râ tatou i roto i te pene 5 e ua pohe Iesu no tatou ia nehenehe tatou e ora e a muri noa ’tu. Te haamana‘o ra paha outou i te mau parau i papaihia i roto i te Evanelia a Ioane: “I aroha mai te Atua i to te ao, e ua tae roa i te horoa mai i ta ’na Tamaiti fanau tahi, ia ore ia pohe te faaroo ia ’na ra, ia roaa râ te ora mure ore.”—Ioane 3:16.

20 Te tahi atu fifi, oia ïa mea rahi te taata e rave ra i te ohipa ino. Te haavare ra ratou, te taviri ra, e te rave ra i te peu morare ore. Aita ratou e hinaaro ra e haapao i te hinaaro o te Atua. E haamouhia te feia o te rave i te ohipa ino i Aramagedo, te tama‘i a te Atua. (A taio i te Salamo 37:10.) Te tahi atu râ tumu e ore ai te hinaaro o te Atua e haapaohia i te fenua nei, oia ïa aita te mau faatereraa e faaitoito ra i te taata ia na reira. Mea rahi te faatereraa paruparu, te aroha ore, aore ra te pi‘o. Te parau roa ra te Bibilia e: “Ua faatere te taata i te taata e ia ino atu.”—Koheleta 8:9, Traduction du monde nouveau.

21. E nafea te Basileia e faatupu ai i te hinaaro o te Atua i te fenua nei?

21 I muri a‘e ia Aramagedo, e auraro te huitaata i te hoê noa faatereraa, te Basileia o te Atua. E faatupu taua Basileia ra i te hinaaro o te Atua e e hopoi mai i te mau haamaitairaa faahiahia. Ei hi‘oraa, e iriti ê te reira ia Satani e ta ’na mau demoni. (A taio i te Apokalupo 20:1-3.) E faaohipahia te mana o te tusia o Iesu ia ore te feia haapao maitai e ma‘ihia e e pohe faahou. I raro a‘e i te faatereraa a te Basileia, e tia ia ratou ia ora e a muri noa ’tu. (Apokalupo  22:1-3) E riro te fenua ei paradaiso. I reira ïa te Basileia e faatupu ai i te hinaaro o te Atua i te fenua nei e e faaraa ’i i te i‘oa o te Atua. Eaha ïa te auraa? I raro a‘e i te Basileia o te Atua, e faahanahana te taata ora atoa i te i‘oa o Iehova.

AFEA TE BASILEIA O TE ATUA E OHIPA ’I?

22. No te aha tatou i ite ai e aita te Basileia o te Atua i tae mai a vai ai Iesu i te fenua nei aore ra i muri noa ’‘e i to ’na tia-faahou-raa?

22 I to Iesu parauraa i ta ’na mau pǐpǐ ia pure, “Ia tae to oe ra hau,” mea maramarama maitai e aitâ te hau, aore ra Basileia, i tae mai atura i taua taime ra. Ua tae mai anei i to Iesu maueraa i nia i te ra‘i? Aita, no te mea ua parau Petero raua Paulo e i muri a‘e i to Iesu tia-faahou-raa, ua tupu te parau tohu i roto i te Salamo 110:1 i nia ia ’na: “Ua parau atura Iehova i tau Fatu, E parahi oe i tau rima atau nei; e ia faarirohia e au to mau enemi ei taahiraa avae no oe.” (Ohipa 2:32-35; Hebera 10:12, 13) Te vai ra ïa te hoê taime tiairaa.

I raro a‘e i te Basileia, e haapaohia te hinaaro o te Atua i te fenua nei mai tei te ra‘i atoa ra

23. (a) Inafea ra to te Basileia o te Atua haamataraa i te faatere? (b) Eaha te hi‘opoahia i roto i te pene i muri nei?

23 Eaha te maoro? I te roaraa o te mau senekele 19 e 20, ua taa maite i te mau piahi Bibilia haavare ore e e hope te taime tiairaa i te matahiti 1914. (No nia i taua matahiti ra, a hi‘o i te tuhaa hau “1914—Te hoê matahiti faufaa i roto i te parau tohu Bibilia.”) Te haapapu ra te mau tupuraa i te ao nei tei haamata i te matahiti 1914, e ua tano  iho â ratou. Ia au i te tupuraa o te parau tohu Bibilia, i te matahiti 1914 to te Mesia riroraa ei Arii e to te Basileia o te Atua i te ra‘i haamataraa i te faatere. No reira, te ora nei tatou i te “maa taime poto” to Satani e toe nei. (Apokalupo 12:12; Salamo 110:2) E nehenehe atoa tatou e parau ma te papu e e fatata te Basileia o te Atua i te ohipa no te faatupu i te hinaaro o te Atua i te fenua nei. E parau oaoa anei teie no outou? E parau mau anei i to outou mana‘o? E tauturu te pene i muri nei ia outou ia ite e te haapii mau ra te Bibilia i teie mau mea.

No te ite atu â

No te aha e haapii ai i te Bibilia?

E horoa te Bibilia i te mau pahonoraa i te mau uiraa faufaa o te oraraa i te mau mirioni taata na te ao nei. E hinaaro anei oe e ite i tera mau pahonoraa?