Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Tetepa 2014

 IA AU I TE BIBILIA

Te haapaoraa

Te haapaoraa

No te aha mea rahi te haapaoraa?

“Ua haapae hoi outou i te parau a te Atua, e te tapea nei i tei tuuhia mai e te taata.”—Mareko 7:8.

TA TE BIBILIA E PARAU RA

Te vai ra te hinaaro e haamori i te Atua i roto ia tatou paatoa. (Ioane 17:3) Ua haamauhia ïa e rave rahi haapaoraa tei haafaufaa i te mana‘o taata eiaha râ to te Atua.

Ei hi‘oraa, te parau ra te Bibilia no te feia o te tahi haapaoraa i te senekele matamua: “E itoito to ratou i ta te Atua, e ere râ i te itoito ite. No to ratou ite ore i te parau-tia a te Atua, o ratou hoi i titau ia tupu ta ratou iho parau-tia, aita a‘enei ratou i auraro maite i te parau-tia a te Atua.” (Roma 10:2, 3) Te haapii atoa ra te rahiraa haapaoraa i teie mahana i “tei tuuhia mai e te taata.”—Mareko 7:7.

 E titauhia anei ia tahoê i te tahi haapaoraa?

‘E haapao maite â tatou te tahi i te tahi, a faaaraara ’tu ai ia rahi te aroha, o te rave i te mau ohipa maitatai ra: eiaha hoi e faarue i ta tatou haaputuputuraa.’—Hebera 10:24, 25.

TA TE BIBILIA E PARAU RA

Te na ô ra te Hebera 10:25 ‘eiaha hoi e faarue i ta tatou haaputuputuraa.’ Te faaite maira ïa te reira e te hinaaro ra te Atua ia putuputu te taata ei pǔpǔ faanahohia no te haamori ia ’na. Tei te taata taitahi anei te parau o vai te Atua e eaha ta ’na e titau maira? Aita. Te parau ra te Bibilia e e haamori atu to ’na mau taata ma te “parau hoê” e te “ati maite . . . ma te aau hoê e te mana‘o hoê.” (Korinetia 1, 1:10) E mea faanahohia ïa ratou i roto i te mau amuiraa e e faaite ratou i te ‘aroha i te hui taeae’ na te ao nei. (Petero 1, 2:17; Korinetia 1, 11:16) No te fana‘o i ta te Atua farii maitai, mea faufaa ia tahoê e ia faanahohia te feia e haamori ia ’Na.

E nafea ia ite i te haapaoraa mau?

“O te mea teie e ite ai te taata atoa e, e pǐpǐ outou na ’u, ia aroha outou ia outou iho.”—Ioane 13:35.

TA TE BIBILIA E PARAU RA

Ua horoa te Parau a te Atua i te tahi faahoho‘araa no te ite o vai te feia o te haapaoraa mau a na ô ai: “E ite outou ia ratou i to ratou hoturaa, no nia anei te vine i te tataramoa i te pafairaa mai; e te suke no nia anei i te motuu?” (Mataio 7:16) Eita e titauhia ia riro ei aivanaa no te ite e suke tera e e raau taratara te tahi atu. Eita atoa e titauhia ia riro ei aivanaa no te haapaoraa no te parau e teie te haapaoraa mau e tera te mea hape. Eaha vetahi hotu aore ra tapao o te haapaoraa mau?

  • E haapii te feia o te haapaoraa mau i te parau mau no roto mai i te Parau a te Atua, te Bibilia. (Ioane 4:24; 17:17) E ere te mana‘o taata ta ratou e haafaufaa.

  • E tauturu te feia o te haapaoraa mau i te taata ia ite o vai te Atua e o Iehova to ’na i‘oa.—Ioane 17:3, 6.

  • E tiaturi te feia o te haapaoraa mau e o te Basileia o te Atua te ravea hoê roa e maitai ai te huitaata, e ere râ te mau faatereraa taata.—Mataio 10:7; 24:14.

  • E faaite te feia o te haapaoraa mau i te here mau. (Ioane 13:35) E haapii hoi i te taata ia faatura i te feia o te mau nunaa atoa, ia tauturu ia vetahi ê ma te faaohipa i to ratou taime e ta ratou mau faufaa, ia ore ia turu i te mau tama‘i a te mau nunaa.—Mika 4:1-4.

  • E pee te feia o te haapaoraa mau i te aratairaa a te Atua i roto i to ratou oraraa taatoa, eiaha râ ma te faatia ture noa. E faaohipa to te haapaoraa mau i ta ratou e poro.—Roma 2:21; Ioane 1, 3:18.

Te tutava ra te mau Ite no Iehova, te feia i pia i teie vea, i te faahanahana i te Atua ma ta ratou mau parau e to ratou haerea. No te aha e ore ai e haere i te tahi putuputuraa i te tahi Piha a te Basileia no te ite roa ’tu?

 

No te ite atu â

PUTUPUTURAA

Eaha te ravehia i te Piha a te Basileia?

A tomo mai i roto e ite atu ai oe.

UIRAA A TE TAATA

E Kerisetiano anei te mau Ite no Iehova?

Mea taa ê mau matou i te mau pǔpǔ faaroo parauhia Kerisetiano, a hi‘o e nafea.