Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TETEPA 2014

 IA AU I TE BIBILIA

Te mau moemoeâ no ǒ mai i te Atua

Te mau moemoeâ no ǒ mai i te Atua

Ua faaite anei te Atua i te poroi i te taata na roto i te moemoeâ?

“E taoto ta Daniela [te peropheta a te Atua], e te orama i tana upoo i nia i tana roi; ua papai ihora oia i taua taoto ra, e ua faaite atura i ta ’na parau.”—Daniela 7:1.

TA TE BIBILIA E PARAU RA

E rave rau ravea ta te Atua i faaohipa na no te faaite i te poroi faufaa i to ’na nunaa. I tahito ra, o te moemoeâ te tahi o ta ’Na mau ravea, e ere râ mai te mau moemoeâ huru ê e te taa ore o te mau mahana atoa. Mea au e te tano te moemoeâ no ǒ mai i te Atua e e poroi taa maitai to te reira. I roto i te tahi taoto aore ra moemoeâ, ua ite te peropheta Daniela e rave rahi animara o tei faahoho‘a i te mau faatereraa rahi mai te hau o Babulonia e tae roa mai i teie tau. (Daniela 7:1-3, 17) Ua faaohipa te Atua i te moemoeâ no te parau ia Iosepha o Nazareta, te metua tane faaamu o Iesu, ia horo i Aiphiti e ta ’na vahine e te tamarii. Mea na reira Iesu i faaorahia ’i i te rima o te arii ino ra o Heroda. Na roto i te moemoeâ, ua faaite te Atua e ua pohe tera arii e ua faaue atu ia Iosepha e to ’na utuafare ia ho‘i i to ratou fenua tumu.—Mataio 2:13-15, 19-23.

 E faaite mai anei te Atua i te poroi na roto i te moemoeâ i teie mahana?

“Eiaha ia hau to outou mana‘o i te taata i tei papaihia.”—Korinetia 1, 4:6.

TA TE BIBILIA E PARAU RA

Ua riro te mau moemoeâ i papaihia i roto i te Bibilia ei tuhaa o te poroi a te Atua i te huitaata. No tera poroi, teie ta te Timoteo 2, 3:16, 17 e faaite ra: “Te mau parau mo‘a atoa i papaihia ra e mea faaurua mai ïa e te Atua, e e mea maitai ei haapiiraa, ei a‘oraa, ei faaiteraa hapa, ei faaite mai i te parau-tia ra; ia au roa te taata no te Atua i te mau ohipa maitatai atoa ra.”

Te faaite maira te Bibilia i te mea e ‘au roa ’i’ tatou. I roto hoi i faataahia ’i te mau mea atoa e titauhia ia ite no nia i te Atua, to ’na mau huru maitatai, ta ’na mau faaueraa tia e ta ’na opuaraa no te taata i te fenua nei. Aita te Atua e faaohipa faahou ra i te moemoeâ no te faaite i te poroi i te taata. Ia hinaaro tatou e ite i te tupu a muri a‘e e ta te Atua e titau maira, ‘eiaha ia hau to tatou mana‘o i tei papaihia’ i roto i te Bibilia. Hau atu â, e nehenehe te taata atoa e fana‘o i te Bibilia e e haapii e rave rahi faaiteraa no ǒ mai i te Atua, oia atoa i te mau moemoeâ.

No te aha e tiaturi ai i te mau moemoeâ e orama i roto i te Bibilia?

“Te mau taata rā i faaite mai i te parau no ō mai i te Atua ra, ua arataihia ïa e te Varua-Maitai.”—Petero 2, 1:21, Te Faufaa Api.

TA TE BIBILIA E PARAU RA

E parau tohu e rave rahi moemoeâ e orama i roto i te Bibilia, ua faaite hoi te reira te tupu i muri a‘e. Ma te papai i tera mau parau tohu, ua haapapu te feia papai Bibilia e nehenehe tatou e tiaturi ia ratou, oia atoa te Bibilia. Ua tano anei ta ratou i papai? E hi‘opoa ana‘e i te tahi orama i roto i te Daniela 8:1-7 o tei faaite mea nafea te faatereraa o Babulonia e haamouhia ’i.

E faahoho‘araa tei faaohipahia i roto i tera parau tohu, e taataahihia te tahi mamoe oni e te hoê puaaniho. Na Daniela anei e imi i te ravea no te taa i te auraa o tera orama? Aita. Ua na ô te melahi ta te Atua i tono atu: “O te mamoe oni ta oe i ite e tara tona, o te arii ïa no Medai e no Peresia. Area te puaaniho oni o te nana, o te arii ïa no Hereni.” (Daniela 8:20, 21, Te Bibilia Mo’a ra V.C.J.S., 1976) Ua faaite te tuatapaparaa e na to Medai e Peresia i haru i te faatereraa puai ra o Babulonia. Tau piti hanere matahiti i muri a‘e, ua haruhia to Medai e Peresia e te arii no Heleni o Alexandre le Grand. Mea papu mau te mau parau tohu, oia atoa te mau moemoeâ i roto i te Bibilia. Na tera noa e haapapu ra e mea taa ê mau te Bibilia i te tahi atu mau buka. E ere anei i te mea tano ia tiaturi i te reira?