Levitiko 7:1-38
7 “‘Teie te ture o te tusia no te hapa:+ Mea moˈa roa te reira.
2 E tupai ratou i te tusia no te hapa i te vahi e tupai ai ratou i te mau tusia taauahi e e pîpîhia to ˈna toto+ ati aˈe te fata.+
3 E hopoi mai te tahuˈa pauroa to ˈna mii,+ oia hoi te aero mii, te mii i nia iho i te aau,
4 e na mape e to raua mii i pihai iho i te tauupu. E tatara atoa oia i te puu o te upaa e na mape.+
5 E tutui te tahuˈa i te reira a au auahi atu ai i nia i te fata ei tusia pûpûhia ia Iehova na roto i te auahi.+ E tusia ïa no te hapa.
6 Pauroa te tane e tavini ra ei tahuˈa te amu i te reira,+ e ia amuhia te reira i roto i te hoê vahi moˈa. Mea moˈa roa te reira.+
7 E tano te ture o te tusia no te hara no te tusia no te hapa. Na te tahuˈa te iˈo o te animara pûpûhia ei tusia no te tapoˈi i ta ˈna hara.*+
8 “‘Ia pûpû te tahuˈa i te tusia taauahi no te hoê taata, na te tahuˈa ïa te iri+ o te tusia taauahi tei hopoihia mai ia ˈna.
9 “‘Pauroa te tusia huero maa tei euhia i roto i te umu aore ra tei tunu-pani-hia aore ra tei farai-pani-hia,+ na te tahuˈa ïa o tei pûpû i te reira. E riro te reira na ˈna.+
10 Area te mau tusia huero maa atoa tei anoihia i te hinu+ aore ra te mea mǎrô,+ na te mau tamaiti atoa ïa a Aarona. Hoê â tuhaa ta ratou.
11 “‘Teie te ture o te tusia no te hau+ ta te hoê taata e nehenehe e hopoi mai ia Iehova:
12 Ia hopoi mai oia i te reira ei faaiteraa i te mauruuru,+ e hopoi mai ïa oia i te tusia haamauruuru e te pane hopue ore mai te hei ra e tei ôihia e te hinu, te pai hopue ore paraihia i te hinu, e te pane mai te hei ra hamanihia i te faraoa ota oro-maitai-hia, tei ôi-maitai-hia e tei anoihia i te hinu.
13 E hopoi mai oia i ta ˈna tusia e te pane hopue mai te hei ra e te tusia haamauruuru o ta ˈna mau tusia no te hau.
14 E hopoi mai oia hoê o taua mau tusia tataitahi ra ei tuhaa moˈa ia Iehova. E riro te reira na te tahuˈa tei pîpî i te toto o te mau tusia no te hau.+
15 E amuhia te iˈo o te tusia haamauruuru o ta ˈna mau tusia no te hau i te mahana e pûpû ai oia i te reira. Eiaha oia e faaherehere i te tahi iˈo e poipoi noa ˈtu.+
16 “‘Mai te peu e euhe+ aore ra e tusia horoa noa+ te tusia ta ˈna e pûpû, e amuhia te iˈo i te mahana e hopoi mai ai oia i ta ˈna tusia, e e nehenehe atoa tei toe mai e amuhia ananahi aˈe.
17 Area tei toe mai o te iˈo o te tusia i te toru o te mahana, e taninahia ïa.+
18 Teie râ, ia amuhia te iˈo o ta ˈna tusia no te hau i te toru o te mahana, eita ïa te taata tei hopoi mai i te reira e fariihia. Eita oia e faufaahia i te reira. Mea faufau te reira e e faautuahia te taata e amu maa vahi o taua iˈo ra no ta ˈna hape.+
19 Eiaha te iˈo tei tano i nia i te tahi mea viivii ia amuhia. E taninahia te reira. Te taata viivii ore atoa te nehenehe e amu i te iˈo viivii ore.
20 “‘Area te taata viivii o te amu i te iˈo o te tusia no te hau, na Iehova hoi, e haapohehia taua taata ra mai roto mai i to ˈna nunaa.+
21 Ia tapea te hoê taata i te tahi mea viivii, te viivii anei o te hoê taata+ aore ra te hoê animara viivii+ aore ra te tahi mea faufau e te viivii,+ a amu atu ai maa iˈo o te tusia no te hau, na Iehova hoi, e haapohehia taua taata ra mai roto mai i to ˈna nunaa.’”
22 Paraparau noa maira Iehova ia Mose, a na ô ai:
23 “A parau i te ati Iseraela: ‘Eiaha outou e amu i te mii+ o te hoê puaatoro oni aore ra to te hoê mamoe oni apî aore ra to te hoê puaaniho.
24 E nehenehe e faaohipa i te mii o te hoê animara tei pohe ê na e te mii o te hoê animara tei haapohehia e te tahi atu animara no te tahi atu ohipa, eiaha roa ˈtu râ outou e amu i te reira.+
25 Tei amu hoi i te mii o te hoê animara ta ˈna e hopoi mai ei tusia pûpûhia ia Iehova na roto i te auahi, e haapohehia mai roto mai i to ˈna nunaa.
26 “‘Eiaha outou e amu i te toto+ i roto i to outou mau nohoraa, to te manu anei aore ra to te tahi atu animara.
27 Te taata o te amu i te toto, e haapohehia oia+ mai roto mai i to ˈna nunaa.’”
28 Parau faahou maira Iehova ia Mose:
29 “A parau i te ati Iseraela: ‘Te taata o te hopoi mai i ta ˈna tusia no te hau ia Iehova, e hopoi mai ïa i te tahi tuhaa o ta ˈna tusia no te hau ei tusia ia Iehova.+
30 E hopoi mai oia i roto i to ˈna rima i te mii+ e te ouma ei tusia pûpûhia ia Iehova na roto i te auahi, e e taueue oia i te reira ei tusia taueuehia+ i mua ia Iehova.
31 E tutui te tahuˈa i te mii a au auahi atu ai i nia i te fata,+ area te ouma, e riro ïa na Aarona e ta ˈna mau tamaiti.+
32 “‘E horoa outou i te tahuˈa i te huha atau ei tuhaa moˈa o ta outou mau tusia no te hau.+
33 Te tamaiti a Aarona o te pûpû i te toto o te mau tusia no te hau e te mii, na ˈna ïa te huha atau ei tuhaa na ˈna.+
34 E rave hoi au i te ouma o te tusia taueuehia e te huha o te tuhaa moˈa o te mau tusia no te hau a te ati Iseraela, e e horoa vau i te reira na Aarona te tahuˈa e ta ˈna mau tamaiti ei faaueraa vai maoro no te ati Iseraela.+
35 “‘Tera te tuhaa o te mau tusia pûpûhia ia Iehova na roto i te auahi ia faataahia na te mau tahuˈa, na Aarona e ta ˈna mau tamaiti, i te mahana i faatoroa ˈi oia ia ratou no te tavini ia Iehova ei tahuˈa.+
36 Ua faaue Iehova i te ati Iseraela ia horoa na ratou i tera tuhaa i te mahana i faatavai ai oia ia ratou.+ E faatureraa mure ore ïa no to ratou mau uˈi.’”
37 Tera ïa te ture o te tusia taauahi,+ te tusia huero maa,+ te tusia no te hara,+ te tusia no te hapa,+ te tusia faatoroaraa,+ e te tusia no te hau,+
38 mai ta Iehova iho â i faaue ia Mose i nia i te mouˈa Sinai+ i te mahana i faaue ai oia i te ati Iseraela ia hopoi mai i ta ratou mau tusia ia Iehova i te medebara o Sinai.+
Nota i raro i te api
^ Aore ra “ei tusia faahau.”
