Levitiko 16:1-34
-
Te mahana o te faahauraa (1-34)
16 Paraparau maira Iehova ia Mose i muri aˈe i te poheraa e piti tamaiti a Aarona tei pohe no te faafatataraa ˈtu ia Iehova.+
2 Na ô maira Iehova ia Mose: “A parau ia Aarona to tuaana e eita ta ˈna e nehenehe e tomo i te mau taime atoa i roto i te vahi moˈa+ i muri mai i te paruru,+ i mua i te tapoˈi o te Afata, ia ore oia ia pohe,+ e fa ˈtu hoi au i nia ˈˈe i te tapoˈi+ i roto i te hoê ata.+
3 “Teie ta Aarona e hopoi mai ia tomo oia i roto i te vahi moˈa: hoê puaatoro oni apî ei tusia no te hara+ e hoê mamoe oni ei tusia taauahi.+
4 E oomo oia i te ahu roa lino moˈa,+ e tapoˈi te mau piripou poto lino+ i to ˈna tino,* e taamu oia i te hatua lino i nia ia ˈna+ e te taamu upoo taa ê lino i nia i to ˈna upoo.+ E ahu moˈa te reira.+ E hopu oia i te pape,+ a oomo atu ai i te reira.
5 “E rave mai oia i te amuiraa o Iseraela+ e piti puaaniho oni apî ei tusia no te hara e hoê mamoe oni ei tusia taauahi.
6 “E hopoi mai Aarona i te puaatoro oni o te tusia no te hara, no ˈna iho, e e pûpû oia i te faahauraa no ˈna iho+ e no to ˈna opu fetii.
7 “I muri iho, e rave oia i na puaaniho e piti, a tuu atu ai i mua ia Iehova i te tomoraa o te tiahapa o te amuiraa.
8 E huti Aarona i te kelero i na puaaniho e piti, hoê kelero no Iehova e hoê kelero no Azazela.*
9 E hopoi mai Aarona i te puaaniho tei maitihia i te kelero+ no Iehova, a pûpû atu ai ei tusia no te hara.
10 Area te puaaniho tei maitihia i te kelero no Azazela, e putô-ora-hia mai ïa i mua ia Iehova no te pûpû i te faahauraa i nia iho ia ˈna, a nehenehe atu ai oia e tuuhia no Azazela i te medebara.+
11 “E hopoi mai Aarona i te puaatoro oni ei tusia no te hara, no ˈna iho, a pûpû atu ai i te faahauraa no ˈna iho e no to ˈna opu fetii. I muri iho, e tupai oia i te puaatoro oni o te tusia no te hara, no ˈna iho.+
12 “E rave oia i muri iho i te farii auahi+ î i te arahu ama no nia mai i te fata+ i mua ia Iehova e te mea noˈanoˈa huˈahuˈa maitai+ e piti rima î, a hopoi atu ai i muri mai i te paruru.+
13 E tuu atoa oia i te mea noˈanoˈa i nia i te auahi i mua ia Iehova,+ e e na nia iho te au auahi o te mea noˈanoˈa i te tapoˈi o te Afata,+ i nia iho i te Haamanaˈoraa,+ ia ore oia ia pohe.
14 “E rave oia maa toto o te puaatoro oni,+ a pîpî atu ai i to ˈna manimani rima i mua i te tapoˈi i te pae hitia o te râ, e e pîpî oia maa toto i to ˈna manimani rima e hitu taime i mua i te tapoˈi.+
15 “E tupai oia i muri iho i te puaaniho o te tusia no te hara, no te nunaa,+ e e hopoi oia i to ˈna toto i muri mai i te paruru,+ a rave atu ai i to ˈna toto+ mai ta ˈna i rave i te toto o te puaatoro oni. E pîpî oia i te reira i te tapoˈi e i mua i te tapoˈi.
16 “E pûpû oia i te faahauraa no te vahi moˈa no te mau peu viivii a te ati Iseraela e no ta ratou mau hapa e ta ratou mau hara+ e e na reira atoa oia no te tiahapa o te amuiraa, e vai ra i rotopu ia ratou o te rave ra i ta ratou mau peu viivii.
17 “Eiaha ei taata ê atu i roto i te tiahapa o te amuiraa mai te taime e tomo ai oia i roto no te pûpû i te faahauraa i te vahi moˈa e haere roa mai ai oia i rapaeau. E pûpû oia i te faahauraa no ˈna iho e no to ˈna opu fetii+ e no te amuiraa taatoa o Iseraela.+
18 “E haere mai oia i rapaeau i te fata,+ e vai ra i mua ia Iehova, a pûpû atu ai i te faahauraa no te reira, e e rave oia maa toto o te puaatoro oni e maa toto o te puaaniho, a parai atu ai i nia i na tara e maha o te fata.
19 E pîpî atoa oia maa toto i nia i te fata i to ˈna manimani rima e hitu taime, e tamâ e e haamoˈa oia i te reira i te mau peu viivii a te ati Iseraela.
20 “Ua oti anaˈe ia ˈna i te pûpû i te faahauraa+ no te vahi moˈa, no te tiahapa o te amuiraa e no te fata,+ e hopoi atoa mai oia i te puaaniho ora.+
21 E tuu Aarona i to ˈna rima i nia i te afii o te puaaniho ora, a faˈi atu ai i nia ia ˈna pauroa te hapa a te ati Iseraela, pauroa ta ratou hapa e pauroa ta ratou hara, e e tuu oia i te reira i nia i te afii o te puaaniho,+ a horoa ˈtu ai ia ˈna i te hoê tane tei maitihia* no te putô ia ˈna i te medebara.
22 E amo te puaaniho i nia iho ia ˈna pauroa ta ratou mau hape+ tae roa i te hoê fenua pâpâmǎrô,+ e e putô oia i te puaaniho i te medebara.+
23 “E tomo Aarona i muri iho i roto i te tiahapa o te amuiraa, e tatara oia i te mau ahu lino ta ˈna i oomo i to ˈna tomoraa i roto i te vahi moˈa, a vaiiho atu ai i reira.
24 E hopu oia ia ˈna i te pape+ i roto i te hoê vahi moˈa e e oomo oia i to ˈna mau ahu.+ I muri iho oia e haere mai ai i rapaeau, e pûpû oia i ta ˈna tusia taauahi+ e ta te nunaa tusia taauahi+ e e pûpû oia i te faahauraa no ˈna iho e no te nunaa.+
25 E tutui oia i te mii o te tusia no te hara a au auahi atu ai i nia i te fata.
26 “Te tane tei putô i te puaaniho no Azazela,+ e horoi oia i to ˈna mau ahu, e hopu oia ia ˈna i te pape, e i muri iho oia e nehenehe ai e haere mai i roto i te puhapa.
27 “E te puaatoro oni o te tusia no te hara e te puaaniho o te tusia no te hara, tei hopoihia te toto i roto i te vahi moˈa no te pûpû i te faahauraa, e hopoihia ïa i rapaeau i te puhapa. E taninahia to raua iri e to raua tino e te mea e vai ra i roto i to raua aau.+
28 Te tane o te tanina i te reira, e horoi oia i to ˈna mau ahu, e hopu oia ia ˈna i te pape, e i muri iho oia e nehenehe ai e haere mai i roto i te puhapa.
29 “E riro te reira ei faatureraa vai maoro no outou: I te ahuru o te mahana o te hitu o te avaˈe, e faaite outou i to outou oto,* e eiaha outou, e taata tumu anei aore ra e taata ê e parahi ra i rotopu ia outou, e rave i te tahi ohipa.+
30 I taua mahana ra e pûpûhia ˈi te faahauraa+ no outou, no te tamâ ia outou. E mâ outou i ta outou mau hara atoa i mua ia Iehova.+
31 E Sabati te reira, e mahana faafaaearaa no outou, e faaite outou i to outou oto.+ E faatureraa vai maoro te reira.
32 “Te tahuˈa tei faatavaihia+ e tei faatoroahia* no te tavini ei tahuˈa*+ ei mono i to ˈna metua tane,+ e pûpû oia i te faahauraa e e oomo oia i te mau ahu lino,+ te mau ahu moˈa.+
33 E pûpû oia i te faahauraa no te nao* moˈa,+ te tiahapa o te amuiraa+ e te fata,+ e e pûpû oia i te faahauraa no te mau tahuˈa e no to te amuiraa taatoa.+
34 E riro te reira ei faatureraa vai maoro no outou,+ no te pûpû i te faahauraa no te ati Iseraela no ta ratou mau hara atoa hoê taime i te matahiti.”+
Na reira ˈtura oia mai ta Iehova iho â i faaue ia Mose.
