Levitiko 13:1-59
13 Paraparau noa maira Iehova ia Mose raua Aarona, a na ô ai:
2 “Ia faura mai te hoê puu, una, aore ra pata* i nia i te tino o te hoê taata, e e nehenehe te reira e riro ei maˈi lepera*+ i nia i to ˈna tino, e hopoihia oia ia Aarona te tahuˈa aore ra i te hoê o ta ˈna na tamaiti, te mau tahuˈa.+
3 E hiˈopoa te tahuˈa i te maˈi i nia i to ˈna tino. Ua uouohia anaˈe te huruhuru i roto i te vahi maˈihia e ua apoo te reira ia hiˈohia ˈtu, o te maˈi lepera ïa. E hiˈopoa te tahuˈa i te reira, a faaite atu ai mea viivii oia.
4 Mai te peu râ e mea uouo te pata i nia i to ˈna tino e aita te reira i apoo ia hiˈohia ˈtu e aita te huruhuru i uouohia, e faataa ê mai te tahuˈa i te taata maˈi e hitu mahana.+
5 I muri iho e hiˈopoa te tahuˈa ia ˈna i te hitu o te mahana, e mai te peu e te huru â te huru te maˈi ia hiˈohia, e aita i parare na nia i to ˈna tino, e faataa ê mai te tahuˈa ia ˈna e hitu â mahana.
6 “E hiˈopoa â te tahuˈa ia ˈna i te hitu o te mahana, e mai te peu e ua maheˈaheˈa te maˈi e aita i parare na nia i te tino, e faaite ïa te tahuˈa mea viivii ore oia,+ e una noa tera. E horoi ïa taua taata ra i to ˈna mau ahu, a vai viivii ore atu ai.
7 Mai te peu râ e ua parare roa te una* na nia i to ˈna tino i muri iho i to ˈna tiaraa ˈtu i mua i te tahuˈa ia faaitehia mea viivii ore oia, e tia faahou oia* i mua i te tahuˈa.
8 E hiˈopoa te tahuˈa i te reira, e mai te peu e ua parare te una na nia i to ˈna tino, e faaite ïa te tahuˈa mea viivii oia. E lepera ïa.+
9 “Ia roohia te hoê taata i te maˈi lepera, e arataihia oia i te tahuˈa,
10 e e hiˈopoa te tahuˈa ia ˈna.+ Mai te peu e puu uouo to nia i to ˈna tino e ua uouohia te huruhuru e ua apoo te puu a itehia ˈi te iˈo,+
11 e lepera tamau ïa i nia i to ˈna tino, e e faaite te tahuˈa mea viivii oia. Eiaha oia e faataa ê mai i taua taata ra,+ mea viivii hoi oia.
12 Mai te peu râ e tupu te lepera na nia i te tino taatoa, a î roa ˈi taua taata ra i te lepera mai te upoo tae roa i te avae, i ta te tahuˈa hiˈoraa,
13 e ua hiˈopoa te tahuˈa ia ˈna, a ite atu ai e ua î to ˈna tino taatoa i te lepera, e faaite ïa oia mea viivii ore te taata maˈi.* Ua uouohia te lepera taatoa, e mea viivii ore oia.
14 I te taime râ e apoo ai te iri a itehia ˈi te iˈo, e viivii ïa oia.
15 Ia ite te tahuˈa i te apoo e itehia te iˈo, e faaite ïa oia mea viivii oia.+ Mea viivii te apoo e itehia te iˈo. E lepera ïa.+
16 Ia uouo faahou râ te apoo e itehia te iˈo, e haere ïa oia i te tahuˈa ra.
17 E hiˈopoa te tahuˈa ia ˈna,+ e mai te peu e ua uouohia te apoo e itehia te iˈo, e faaite ïa te tahuˈa mea viivii ore te taata maˈi.
18 “Ia tupu te fêfê i nia i te tino o te hoê taata e ua ora,
19 e ua faura mai râ te hoê puu uouo aore ra te hoê pata uouo mauteute i te vahi to reira te fêfê, e faaite oia ia ˈna i te tahuˈa.
20 E hiˈopoa te tahuˈa i te reira,+ e mai te peu e ua apoo ia hiˈohia e ua uouohia te huruhuru, e faaite ïa te tahuˈa mea viivii oia. E maˈi lepera ïa tei tupu i roto i te fêfê.
21 Ia hiˈopoa râ te tahuˈa i te reira, a ite atu ai e aita e huruhuru uouo i roto, e aita e apoo e mea maheˈaheˈa ia hiˈohia, e faataa ê mai ïa te tahuˈa ia ˈna e hitu mahana.+
22 E mai te peu e ua parare iho â te reira na nia i to ˈna tino, e faaite ïa te tahuˈa mea viivii taua taata ra. E maˈi te reira.
23 Mai te peu râ e vai te pata i te hoê noa vahi, aita i parare, e haapêraa noa ïa no roto mai i te fêfê, e e faaite te tahuˈa mea viivii ore taua taata ra.+
24 “Aore ra mai te peu e ua paapaa te hoê taata i te auahi, a riro atu ai te iˈo o te vahi tei paapaa ei pata uouo mauteute aore ra uouo,
25 e hiˈopoa te tahuˈa i te reira. Ia uouohia te huruhuru i roto i te pata e ia apoo ia hiˈohia, e lepera ïa tei tupu i roto i te vahi tei paapaa, e e faaite te tahuˈa mea viivii oia. E maˈi lepera ïa.
26 Ia hiˈopoa râ te tahuˈa i te reira, a ite atu ai e aita e huruhuru uouo i roto i te pata, aita e apoo, e mea maheˈaheˈa, e faataa ê mai ïa te tahuˈa ia ˈna e hitu mahana.+
27 E hiˈopoa te tahuˈa ia ˈna i te hitu o te mahana, e mai te peu e ua parare iho â te reira na nia i to ˈna tino, e faaite ïa te tahuˈa mea viivii oia. O te maˈi lepera ïa.
28 Mai te peu râ e vai te pata i te hoê noa vahi, aita i parare na nia i te tino, e mea maheˈaheˈa, e puu noa o te vahi tei paapaa, e faaite te tahuˈa mea viivii ore taua taata ra no te mea e haapêraa te reira o te vahi tei paapaa.
29 “Ia tupu te hoê maˈi i nia i te upoo aore ra te taa o te hoê tane aore ra vahine,
30 e hiˈopoa te tahuˈa i taua maˈi ra.+ Mai te peu e ua apoohia te reira ia hiˈohia e mea rearea e mea rairai te rouru aore ra te huruhuru, e faaite ïa te tahuˈa mea viivii taua taata ra. E maˈi ïa o te iri o te upoo aore ra o te huruhuru taa. O te lepera ïa o te upoo aore ra o te taa.
31 Mai te peu râ e ite te tahuˈa e aita te reira i apoohia ia hiˈohia e aita e rouru aore ra e huruhuru ereere i roto, ia faataa ê mai ïa te tahuˈa i te taata maˈi e hitu mahana.+
32 E hiˈopoa te tahuˈa i te maˈi i te hitu o te mahana, e mai te peu e aita te maˈi i parare, aita e rouru aore ra e huruhuru rearea i tupu i roto, e aita te vahi maˈi i apoohia ia hiˈohia,
33 e hahuhia taua taata ra, eiaha râ ia hahuhia te vahi maˈi. I muri iho, e faataa ê mai te tahuˈa i te taata maˈi e hitu mahana.
34 “E hiˈopoa faahou te tahuˈa i te vahi maˈi i te hitu o te mahana, e mai te peu e aita te maˈi o te iri o te upoo e o te huruhuru taa i parare na nia i te tino, e aita i apoohia ia hiˈohia, e faaite te tahuˈa mea viivii ore taua taata ra, e e horoi taua taata ra i to ˈna mau ahu, a mâ ˈtu ai.
35 Mai te peu râ e ua parare iho â te maˈi na nia i to ˈna tino i muri iho i to ˈna tamâraa ia ˈna,
36 e hiˈopoa te tahuˈa ia ˈna, e mai te peu e ua parare te maˈi na nia i to ˈna tino, aita e faufaa ia imi te tahuˈa i te rouru aore ra huruhuru rearea, mea viivii taua taata ra.
37 Ia faaite râ te hiˈopoaraa aita te maˈi i parare e ua tupu mai te rouru aore ra te huruhuru ereere i nia iho, ua ora ïa te maˈi. Mea viivii ore taua taata ra, e e faaite te tahuˈa mea viivii ore oia.+
38 “Ia faura mai te pata na nia i te tino o te hoê tane aore ra vahine, e mea uouo tera mau pata,
39 e hiˈopoa te tahuˈa i te reira.+ Mai te peu e mea uouo maheˈaheˈa te mau pata, e maˈi iri ïa e ere mea atâta tei faura mai na nia i te tino. Mea viivii ore taua taata ra.
40 “Ia marua te rouru o te hoê tane, a upoo pahure atu ai oia, mea viivii ore oia.
41 Ia marua to ˈna rouru i nia noa mai i to ˈna rae, a pahure atu ai i reira, mea viivii ore oia.
42 Ia faura mai râ te hoê tutuˈa uouo mauteute i te vahi pahure o te iri o to ˈna upoo aore ra i nia noa mai i to ˈna rae, o te lepera ïa tei tupu i nia i te iri o to ˈna upoo aore ra i nia noa mai i to ˈna rae.
43 E hiˈopoa te tahuˈa ia ˈna, e mai te peu te puu no roto mai i te tutuˈa, mea uouo mauteute ïa i te vahi pahure o to ˈna upoo aore ra i nia noa mai i to ˈna rae, e mai te lepera ra te huru i nia ia ˈna,
44 e lepera ïa oia. Mea viivii oia, e e faaite te tahuˈa mea viivii oia no te maˈi i nia i to ˈna upoo.
45 Area te taata tei roohia i te maˈi lepera, e hahaehia to ˈna mau ahu e eiaha to ˈna upoo ia atuatuhia. E puroˈu oia i to ˈna huruhuru utu e e tuô oia: ‘Viivii, viivii!’
46 Mea viivii oia i te taime taatoa e leperahia ˈi oia. I te mea e mea viivii oia, e ora oia o ˈna anaˈe to ˈna faaearaa. Tei rapaeau to ˈna nohoraa i te puhapa.+
47 “Ia viiviihia te hoê ahu i te lepera, e ahu huruhuru mamoe anei aore ra e ahu lino,
48 i roto anei i te taura raraa aore ra te taura tarava o te ahu lino aore ra o te ahu huruhuru mamoe, i roto i te iri animara aore ra te taihaa iri animara,
49 e ia peehia te ahu, te iri animara, te taura raraa, te taura tarava aore ra te taihaa iri animara i te tafeta matie marearea aore ra mauteute no roto mai i te maˈi, ua leperahia ïa te reira, e e faaitehia te reira i te tahuˈa.
50 E hiˈopoa te tahuˈa i te maˈi, e e faataa ê mai oia i tei peehia i te maˈi e hitu mahana.+
51 Ia hiˈopoa oia i te maˈi i te hitu o te mahana, a ite atu ai e ua parare te reira na roto i te ahu, te taura raraa, te taura tarava, aore ra te iri animara (noa ˈtu eaha te faaohiparaa o te iri animara), e maˈi lepera ino mau ïa, e mea viivii te reira.+
52 E tanina oia i te ahu, te taura raraa aore ra te taura tarava i roto i te ahu huruhuru mamoe aore ra i roto i te ahu lino aore ra te taihaa iri animara tei peehia i te maˈi, e lepera ino mau hoi. E taninahia te reira.
53 “Ia hiˈopoa râ te tahuˈa i te reira e aita te maˈi i parare na roto i te ahu, te taura raraa, te taura tarava aore ra te taihaa iri animara,
54 e faaue ïa te tahuˈa ia horoihia tei peehia i te maˈi, e e faataa ê mai oia i te reira e hitu â mahana.
55 I muri iho e hiˈopoa te tahuˈa i tei peehia i te maˈi ua horoi-maitai-hia anaˈe te reira. Mai te peu e te huru â te huru, noa ˈtu e aita te maˈi i parare, mea viivii te reira. E tanina oe i te reira, no te mea ua aihia te reira, na roto anei aore ra na rapaeau.
56 “Mai te peu râ e ua hiˈopoa te tahuˈa i te reira e mea maheˈaheˈa te vahi i peehia i te maˈi i muri iho i te horoi-maitai-raahia te reira, e hahae oia i te reira mai nia mai i te ahu, te iri animara, te taura raraa aore ra te taura tarava.
57 Mai te peu râ e e fa faahou mai te maˈi i te tahi atu vahi o te ahu, i roto i te taura raraa, te taura tarava aore ra te taihaa iri animara, o te lepera parare ïa, e e tanina oe i tei peehia i te maˈi.+
58 Ia ore râ te maˈi i nia i te ahu, te taura raraa, te taura tarava aore ra te taihaa iri animara ta oe i horoi, e horoihia te reira i te piti o te taime, a vai viivii ore atu ai.
59 “Tera te ture no te maˈi lepera i roto i te hoê ahu huruhuru mamoe, te ahu lino, te taura raraa, te taura tarava aore ra te taihaa iri animara, no te faaite mea viivii ore te reira aore ra mea viivii.”
Nota i raro i te api
^ Mai te tǎne ra.
^ Mea aano te auraa o te taˈo Hebera tei hurihia ei “lepera.” E ô atoa mai te maˈi iri pee ua rau te huru, tae noa ˈtu te tahi mau maˈi i nia i te ahu e i roto i te fare.
^ Aore ra “maˈi.”
^ Aore ra “e tia oia no te piti o te taime.”
^ Aore ra “e ere to ˈna i te maˈi pee.”
