Levitiko 4:1-35
-
Te tusia no te hara (1-35)
4 Na ô faahou maira Iehova ia Mose:
2 “A parau i te ati Iseraela: ‘Ia hara te hoê taata ma te opua ore+ a rave ai i ta Iehova i faaue eiaha e rave, mai teie ia ravehia:
3 “‘Ia hara te tahuˈa faatavaihia+ e ia faatae oia i te hara+ i nia i te nunaa, e hopoi mai oia no te hara ta ˈna i rave i te hoê puaatoro oni apî oraora maitai ia Iehova ei tusia no te hara.+
4 E putô oia i te puaatoro oni i te tomoraa o te tiahapa o te amuiraa+ i mua ia Iehova, e tuu oia i to ˈna rima i nia i te afii o te puaatoro oni, e e tupai oia i te puaatoro oni i mua ia Iehova.+
5 I muri iho, e rave te tahuˈa faatavaihia+ maa toto o te puaatoro oni, e e hopoi atu oia i roto i te tiahapa o te amuiraa,
6 e e tutau te tahuˈa i to ˈna manimani rima i roto i te toto,+ a pîpî atu ai maa toto e hitu taime+ i mua ia Iehova, i mua i te paruru o te vahi moˈa.
7 E parai atoa te tahuˈa maa toto i nia iho i te mau tara o te fata mea noˈanoˈa,+ to mua ia Iehova i roto i te tiahapa o te amuiraa, e e manii pauroa oia i te toea o te toto o te puaatoro oni i te raroraa o te fata tusia taauahi,+ tei te tomoraa o te tiahapa o te amuiraa.
8 “‘E tatara pauroa oia i te mii o te puaatoro oni o te tusia no te hara, oia atoa te mii i nia iho i te aau e te mii ati aˈe te aau,
9 e na mape e piti e te mii i nia iho i na mape tei pihai iho i te tauupu. E tatara oia i te puu o te upaa e na mape.+
10 Tera atoa te tatarahia i roto i te hoê puaatoro oni o te tusia no te hau.+ E tutui te tahuˈa i te reira ia au auahi i nia i te fata tusia taauahi.
11 “‘Area te iri o te puaatoro oni, to ˈna iˈo taatoa e to ˈna afii, to ˈna na avae, to ˈna aau e to roto i to ˈna aau,+
12 pauroa tei toe mai o te puaatoro oni, e faaue oia ia hopoihia i rapaeau i te puhapa i te hoê vahi viivii ore i reira te rehu* e faaruehia ˈi, e e tanina oia i te reira i nia i te vahie.+ E taninahia te reira i te vahi e faaruehia ˈi te rehu.
13 “‘I teie nei, ia hara te amuiraa taatoa o Iseraela a rave ai i te hoê hara ma te opua ore,+ aita râ te amuiraa i ite e ua rave ratou i te tahi mea ta Iehova i faaue eiaha e rave,+
14 e a itehia ˈtu ai taua hara ra, e hopoi mai te amuiraa i te hoê puaatoro oni apî no te tusia no te hara e e putô ratou i te reira i mua i te tiahapa o te amuiraa.
15 E tuu te mau matahiapo o te amuiraa i to ratou rima i nia i te afii o te puaatoro oni i mua ia Iehova e e tupaihia te puaatoro oni i mua ia Iehova.
16 “‘I muri iho, e hopoi te tahuˈa faatavaihia maa toto o te puaatoro oni i roto i te tiahapa o te amuiraa.
17 E tutau te tahuˈa i to ˈna manimani rima i roto i te toto e e pîpî oia maa toto e hitu taime i mua ia Iehova, i mua i te paruru.+
18 I muri iho, e parai oia maa toto i nia iho i te mau tara o te fata+ to mua ia Iehova i roto i te tiahapa o te amuiraa, e e manii pauroa oia i te toea o te toto o te puaatoro oni i te raroraa o te fata tusia taauahi, tei te tomoraa o te tiahapa o te amuiraa.+
19 E tatara oia pauroa to ˈna mii, a tutui atu ai ia au auahi i nia i te fata.+
20 E na reira oia no te puaatoro oni mai ta ˈna i na reira no te tahi atu puaatoro oni o te tusia no te hara. Mai tera ia rave te tahuˈa no te faaore i te hara a* te nunaa,+ e e faaorehia ta ratou hara.
21 E faaue oia ia hopoihia te puaatoro oni i rapaeau i te puhapa e e tanina oia i te reira, mai ta ˈna i tanina i te puaatoro oni matamua.+ E tusia ïa no te hara no te amuiraa.+
22 “‘Ia hara te hoê raatira+ ma te opua ore a rave ai hoê o te mau mea atoa ta Iehova to ˈna Atua i faaue eiaha e rave, a hara mau atu ai,
23 aore ra ia ite oia e ua rave oia i te hoê hara ma te auraro ore i te hoê faaueraa, e hopoi mai oia i te hoê puaaniho oni apî oraora maitai ei tusia na ˈna.
24 E tuu oia i to ˈna rima i nia i te afii o te puaaniho apî, a tupai atu ai i te reira i te vahi e tupaihia ˈi te tusia taauahi i mua ia Iehova.+ E tusia ïa no te hara.
25 E rave te tahuˈa maa toto o te tusia no te hara i to ˈna manimani rima, a parai atu ai i te reira i nia iho i te mau tara+ o te fata tusia taauahi, e e manii oia i te toea o to ˈna toto i te raroraa o te fata tusia taauahi.+
26 E tutui oia pauroa to ˈna mii ia au auahi i nia i te fata mai te mii o te tusia no te hau.+ E ani te tahuˈa ia faaorehia* ta ˈna hara e e faaorehia ta ˈna hara.
27 “‘Ia hara hoê o te nunaa o Iseraela ma te opua ore, a hara mau atu ai i te raveraa i ta Iehova i faaue eiaha e rave,+
28 aore ra ia ite oia e ua rave oia i te hoê hara, e hopoi mai oia i te hoê puaaniho ufa apî oraora maitai ei tusia na ˈna no te hara ta ˈna i rave.
29 E tuu oia i to ˈna rima i nia i te afii o te tusia no te hara, a tupai atu ai i te tusia no te hara i te hoê â vahi e tupaihia ˈi te tusia taauahi.+
30 E rave te tahuˈa maa toto o te animara i to ˈna manimani rima, a parai atu ai i te reira i nia iho i te mau tara o te fata tusia taauahi, e e manii pauroa oia i te toea o to ˈna toto i te raroraa o te fata.+
31 E tatara pauroa oia i to ˈna mii,+ mai te mii o te tusia no te hau tei tatarahia,+ e e tutui te tahuˈa i te reira ia au auahi i nia i te fata ei mea hauˈa noˈanoˈa au maitai* no Iehova, e e ani te tahuˈa ia faaorehia ta ˈna hara e e faaorehia ta ˈna hara.
32 “‘Tera râ, ia pûpû oia i te hoê fanauˈa mamoe ei tusia no te hara na ˈna, e hopoi mai oia i te hoê fanauˈa mamoe ufa oraora maitai.
33 E tuu oia i to ˈna rima i nia i te afii o te tusia no te hara, a tupai atu ai i te reira ei tusia no te hara i te vahi e tupaihia ˈi te tusia taauahi.+
34 E rave te tahuˈa maa toto o te tusia no te hara i to ˈna manimani rima, a parai atu ai i te reira i nia iho i te mau tara o te fata tusia taauahi,+ e e manii pauroa oia i te toea o to ˈna toto i te raroraa o te fata.
35 E tatara pauroa oia i to ˈna mii, mai te mii o te mamoe oni apî o te tusia no te hau tei tatarahia. E tutui te tahuˈa i te reira ia au auahi i nia i te fata na nia iho i te mau tusia pûpûhia ia Iehova na roto i te auahi,+ e ani te tahuˈa ia faaorehia te hara ta ˈna i rave e e faaorehia ta ˈna hara.+
