Levitiko 17:1-16
17 Na ô faahou maira Iehova ia Mose:
2 “A paraparau ia Aarona e ta ˈna na tamaiti e pauroa te ati Iseraela e a parau ia ratou: ‘Teie ta Iehova i faaue:
3 “‘“Ia tupai te hoê taata o te utuafare o Iseraela i te hoê puaatoro oni aore ra te hoê mamoe oni apî aore ra te hoê puaaniho i roto i te puhapa aore ra ia tupai oia i te reira i rapae i te puhapa,
4 aita râ i putô mai i te reira i te tomoraa o te tiahapa o te amuiraa no te hopoi mai ei tusia na Iehova i mua i te sekene o Iehova, ua hara taua taata ra i te haamaniiraa toto. Ua faatahe oia i te toto e e haapohehia taua taata ra mai rotopu mai i to ˈna nunaa.
5 Ia putô mai hoi te ati Iseraela i ta ratou mau tusia, ta ratou e pûpû nei i te mau vahi ěê, ia Iehova ra, i te tomoraa o te tiahapa o te amuiraa, i te tahuˈa ra. Ia pûpû ratou i te reira ia Iehova ei tusia no te hau.+
6 E pîpî te tahuˈa i te toto i nia i te fata a Iehova i te tomoraa o te tiahapa o te amuiraa e e tutui oia i te mii a au auahi atu ai ei mea hauˈa noˈanoˈa au maitai* no Iehova.+
7 No reira, eiaha ratou e pûpû faahou i te tusia i te mau demoni hohoˈa puaaniho,*+ te taiata nei ratou e te reira.+ E riro te reira ei faatureraa vai maoro no outou e hope noa ˈtu to outou mau uˈi.”’
8 “E parau oe ia ratou: ‘Te taata atoa o te utuafare o Iseraela aore ra te taata ê atoa e parahi ra i rotopu ia outou o te pûpû i te hoê tusia taauahi aore ra te hoê tusia,
9 e o te ore e putô mai i te reira i te tomoraa o te tiahapa o te amuiraa no te pûpû atu ia Iehova, e haapohehia ïa mai roto mai i to ˈna nunaa.+
10 “‘Ia amu te tahi taata o te nunaa o Iseraela aore ra te tahi taata ê e parahi ra i rotopu ia outou i te mau huru toto atoa,+ e hiˈo mau â vau ma te riri i tei amu ra i te toto, e e haapohe au ia ˈna mai rotopu mai i to ˈna nunaa.
11 To roto hoi te ora o te mea ora i te toto,+ e ua faataa vau i te reira no outou ia pûpû outou i te faahauraa no outou iho i nia i te fata,+ no te mea o te toto te riro ei faahauraa+ maoti te ora i roto.
12 No reira vau i parau ai i te ati Iseraela: “Eiaha te hoê o outou e amu i te toto, e eiaha te taata ê e parahi ra i rotopu ia outou+ e amu i te toto.”+
13 “‘Mai te peu e te aˈuaˈu ra hoê o te ati Iseraela aore ra te tahi taata ê e parahi ra i rotopu ia outou i te hoê animara oviri aore ra te hoê manu e nehenehe e amuhia, a noaa ˈtu ai ia ˈna, e faatahe oia i to ˈna toto i raro,+ a tapoˈi atu ai i te repo.
14 Te ora hoi o te mau mea ora e rave rau atoa, o to ratou ïa toto, no te mea to roto te ora i te toto. No reira vau i parau ai i te ati Iseraela: “Eiaha outou e amu i te toto o te mau mea ora e rave rau atoa, no te mea o to ratou toto te ora o te mau mea ora e rave rau atoa. E haapohehia te taata atoa e amu i te reira.”+
15 Ia amu te tahi taata, e taata tumu anei aore ra e taata ê, i te hoê animara ua pohe ê na aore ra ua hahaehia e te hoê animara oviri,+ e horoi oia i to ˈna mau ahu, e hopu oia i te pape e e vai viivii oia e ahiahi noa ˈtu,+ i reira noa mea viivii ore ai oia.
16 Ia ore râ oia e horoi i to ˈna mau ahu e ia ore e hopu ia ˈna, e faautuahia oia no ta ˈna hape.’”+
