Levitiko 20:1-27
20 Paraparau faahou maira Iehova ia Mose, a na ô ai:
2 “E parau oe i te ati Iseraela: ‘Te taata o Iseraela e te taata ê e parahi ra i Iseraela o te horoa i te tahi o ta ˈna mau tamarii na Moleha, e haapohe-mau-hia.+ E pehi te nunaa ia ˈna i te ofai e ia pohe roa.
3 E hiˈo vau i taua taata ra ma te riri, e e haapohe au ia ˈna mai rotopu mai i to ˈna nunaa, no te mea ua horoa oia vetahi o ta ˈna mau tamarii na Moleha, ua haaviivii oia i to ˈu vahi moˈa+ e ua haafaufaa ore i to ˈu iˈoa moˈa.
4 Ia tapo mau â te nunaa i to ratou mata i ta taua taata ra i rave a horoa ˈi oia i ta ˈna tamarii na Moleha, a ore atu ai e haapohe ia ˈna,+
5 e hiˈo mau â vau i taua taata ra e to ˈna utuafare+ ma te riri. E haapohe au i taua taata ra mai roto mai i to ˈna nunaa e te feia atoa o te apiti ia ˈna i te taiataraa e o Moleha.
6 “‘E te taata o te fariu i te feia e demoni hiˈohiˈo to ratou+ e te feia hiˈohiˈo,+ no te taiata e o ratou i te pae varua, e hiˈo mau â vau i taua taata ra ma te riri e e haapohe au ia ˈna mai roto mai i to ˈna nunaa.+
7 “‘E haamoˈa outou ia outou iho e ia moˈa outou,+ no te mea o vau o Iehova to outou Atua.
8 E auraro outou i ta ˈu mau faatureraa e e haapao outou i te reira.+ O vau o Iehova, o te haamoˈa nei ia outou.+
9 “‘Ia faaino te tahi taata* i to ˈna metua tane aore ra metua vahine, e haapohe-mau-hia oia.+ I te mea ua faaino oia i to ˈna metua tane aore ra metua vahine, tei nia ia ˈna iho to ˈna toto.
10 “‘No te hoê tane o te faaturi e te vahine faaipoipo a te tahi atu tane: E haapohe-mau-hia tei faaturi e te vahine faaipoipo a to ˈna taata tupu, te tane faaturi e te vahine faaturi.+
11 Te tane o te taoto i te vahine faaipoipo a to ˈna metua tane, ua faatae oia i te haama i nia i* to ˈna metua tane.+ Ia haapohe-mau-hia raua e piti. Tei nia ia raua iho to raua toto.
12 Ia taoto te hoê tane i ta ˈna hunoa vahine, ia haapohe-mau-hia raua e piti. Ua ofati raua i te mea natura. Tei nia ia raua iho to raua toto.+
13 “‘Ia taoto te hoê tane i te tahi atu tane mai ta te hoê tane e taoto i te hoê vahine, ua rave raua e piti i te mea faufau.+ Ia haapohe-mau-hia raua e piti. Tei nia ia raua iho to raua toto.
14 “‘Ia faaipoipo te hoê tane i te hoê vahine e ia taoto oia i te metua vahine o taua vahine ra, e ohipa faufau* te reira.+ Ia taninahia raua,+ ia ore taua haerea faufau ra ia tamau noa i rotopu ia outou.
15 “‘Ia taoto te hoê taata i te hoê animara, ia haapohe-mau-hia oia, e e haapohe outou i te animara.+
16 Ia tapiri atu te hoê vahine i te tahi animara no te taoto i te reira,+ e haapohe oe i taua vahine ra e te animara. Ia haapohe-mau-hia raua. Tei nia ia raua iho to raua toto.
17 “‘Ia taoto te hoê tane i to ˈna tuahine, te tamahine a to ˈna metua tane aore ra te tamahine a to ˈna metua vahine, a ite ai raua i te vai-tahaa-raa o te tahi e te tahi, mea haama ïa.+ E haapohehia raua i mua i te mata o te nunaa. Ua faatae oia i te haama i nia i* to ˈna tuahine. Ia faautuahia oia no ta ˈna hape.
18 “‘Ia taoto te hoê tane i te hoê vahine e maˈi avaˈe to ˈna, aita raua i faatura i to ˈna toto.+ Ia haapohehia raua e piti mai rotopu mai i to raua nunaa.
19 “‘Eiaha oe e taoto i te tuahine o to metua vahine aore ra te tuahine o to metua tane, no te mea e faatae te reira i te haama i nia i te hoê fetii piri.+ E faautuahia raua no ta raua hape.
20 Te hoê tane o te taoto i te vahine faaipoipo a te taeae o to ˈna metua tane, ua faatae oia i te haama i nia i* te taeae o to ˈna metua tane.+ E faautuahia raua no ta raua hara. Ia pohe raua ma te tamarii ore.
21 Ia rave te hoê tane i te vahine faaipoipo a to ˈna taeae, mea hairiiri ïa.+ Ua faatae oia i te haama i nia i* to ˈna taeae. Eiaha raua ia tamariihia.
22 “‘E auraro outou i ta ˈu mau faatureraa atoa e ta ˈu mau faaotiraa haavaraa atoa+ e e haapao outou i te reira,+ ia ore te fenua i reira vau e aratai ai ia outou no te ora e pihaˈe ia outou.+
23 Eiaha outou e pee i te mau faatureraa a te mau nunaa ta ˈu e tiahi mai mua ia outou,+ ua rave hoi ratou i teie mau mea atoa e ua haafaufau vau ia ratou.+
24 No reira vau i parau atu ai: “E fatu outou i to ratou fenua, e e horoa ˈtu vau i te reira ei fenua no outou, e fenua e tahe noa te û e te meri.+ O vau o Iehova to outou Atua, tei faataa ê ia outou mai roto mai i te mau nunaa.”+
25 Ia faataa ê outou i te animara viivii ore i te animara viivii e te manu viivii i te manu viivii ore.+ Eiaha e haaviivii ia outou i te tahi animara aore ra manu aore ra tei nee haere na raro i te repo ta ˈu i faataa ê no outou ei mea viivii.+
26 Ia moˈa outou i to ˈu aro, no te mea mea moˈa vau o Iehova,+ e ua faataa ê au ia outou mai roto mai i te mau nunaa ei nunaa no ˈu.+
27 “‘Te tane aore ra te vahine o te rave i te peu a te feia e demoni hiˈohiˈo to ratou aore ra a te feia hiˈohiˈo, ia haapohe-mau-hia ratou.+ Ia pehi te nunaa ia ratou i te ofai e ia pohe roa. Tei nia ia ratou iho to ratou toto.’”
Nota i raro i te api
^ Aore ra “Ia faatae te tahi taata i te ino i nia.”
^ Heb: “faaite oia i te vai-tahaa-raa o.”
^ Aore ra “haerea haama,” “mea hairiiri.”
^ Heb: “faaite oia i te vai-tahaa-raa o.”
^ Heb: “faaite oia i te vai-tahaa-raa o.”
^ Heb: “faaite oia i te vai-tahaa-raa o.”
