Marka 9:1-50

TLANGA

Ku hundzuriwa ka Yesu (1-13)
Ku hanyisiwa ka jaha leri nga ni dimona (14-29)
- Hinkwaswo swa koteka eka loyi a nga ni ripfumelo (23)
Rifu ra Yesu ri tlhela ri profetiwa (30-32)
Vadyondzisiwa va phikizana (33-37)
Loyi a nga hi kanetiki u yima na hina (38-41)
Swikhunguvanyiso (42-48)
“Lungani ku fana ni munyu” (49, 50)

9 Yesu a tlhela a ku: “Ndzi tiyisile ndzi ri eka n’wina, ku ni van’wana lava yimeke laha lava nga ta ka va nga fi va nga si vona Mfumo wa Xikwembu wu ri eku fumeni.”+ ² Endzhaku ka masiku ya tsevu, Yesu a teka Petro, Yakobo na Yohane va khandziya ntshava leyi tlakukeke. Hiloko a hundzuriwa emahlweni ka vona;+ ³ swiambalo swakwe swa le handle swi sungula ku vangama, swi basa swi ku paa, ku tlula leswi muhlantswi wa swiambalo a nga swi basisisaka xiswona. ⁴ Ku tlhela ku humelela Eliya na Muxe va ri karhi va vulavula na Yesu. ⁵ Kutani Petro a byela Yesu a ku: “Rabi, swa tsakisa ku va laha. Hi pfumelele hi dzima mitsonga* yinharhu, wun’we wu va wa wena, wun’wana wu va wa Muxe, wun’wanyana wu va wa Eliya.” ⁶ Kahlekahle, a a nga swi tivi leswaku u ta ku yini hikuva a va chuhe ngopfu. ⁷ Hiloko ku humelela papa ri va funengeta, kutani ku twala rito+ ri huma epapeni ri ku: “Loyi i N’wananga, loyi ndzi n’wi rhandzaka.+ N’wi yingiseni.”+ ⁸ Loko va languta ematlhelo, va vona Yesu ntsena. ⁹ Loko va ri karhi va rhelela entshaveni, a va lerisa leswaku va nga byeli munhu leswi va swi voneke,+ ku fikela loko N’wana wa munhu a pfuxiwa eku feni.+ ¹⁰ Va swi tekele enhlokweni leswi a swi vuleke,* kambe va bula va ri voxe hi leswaku a a vula yini loko a ku u ta pfuxiwa eku feni. ¹¹ Kutani va sungula ku n’wi vutisa, va ku: “Hikwalaho ka yini vatsari va vula leswaku ku fanele ku rhanga ku ta+ Eliya?”+ ¹² A va hlamula a ku: “Eliya u ta rhanga a fika a lunghisa swilo hinkwaswo;+ kambe hikwalaho ka yini ku tsariwile mayelana ni N’wana wa munhu leswaku u ta xanisiwa+ swinene ni ku hlekuriwa?+ ¹³ Kambe ndzi ri eka n’wina, kahlekahle Eliya+ se u tile naswona va n’wi xanisile, hilaha swi tsariweke hakona mayelana na yena.”+ ¹⁴ Loko va tshinela eka vadyondzisiwa lavan’wana, va vona ntshungu lowukulu wu va rhendzerile, vatsari va ri karhi va holova na vona.+ ¹⁵ Kambe loko ntshungu wu n’wi vona, wu hlamala kutani wu tsutsuma wu n’wi hlanganisa wu n’wi xeweta. ¹⁶ Yesu a wu vutisa a ku: “I yini lexi mi holovisaka?” ¹⁷ Munhu un’wana exikarhi ka ntshungu a ku: “Mudyondzisi, ndzi tise n’wana wa mina eka wena hikuva u ni dimona leri n’wi endlaka mbheveve.+ ¹⁸ Loko ri n’wi nghena ri n’wi lahlela ehansi, a tlhutlha khuvi, a luma ni matino, a heleriwa hi matimba. Ndzi kombele vadyondzisiwa va wena leswaku va ri hlongola kambe va tsandzekile.” ¹⁹ Hiloko a va hlamula a ku: “N’wina xitukulwana lexi nga riki na ripfumelo,+ xana ndzi fanele ndzi mi tiyiselela ku fikela rini? Ndzi ta mi lehisela mbilu ku fikela rini? N’wi tiseni haleni.”+ ²⁰ Kutani va n’wi yisa. Kambe loko dimona ri vona Yesu ri sungula ku hlasela jaha rolero, ri wela ehansi ri vumbuluka ri ri karhi ri tlhutlha khuvi. ²¹ Yesu a vutisa tata wakwe a ku: “Swi n’wi sungule rini?” A ku: “Ku sukela loko a ha ri ntsongo, ²² mikarhi yin’wana a ri n’wi hoxa endzilweni ni le matini leswaku ri n’wi dlaya. Kambe loko u swi kota ku hi pfuna, hi twele vusiwana u hi pfuna.” ²³ Yesu a ku eka yena: “U tiyisile loko u ku, ‘Loko u swi kota’! Hikuva swilo hinkwaswo swa koteka eka loyi a nga ni ripfumelo.”+ ²⁴ Hiloko tata wa n’wana a hlamula a ku: “Ndzi ni ripfumelo! Ndzi pfune ndzi va ni ripfumelo leri tiyeke!”+ ²⁵ Loko Yesu a vona leswaku ntshungu a wu tsutsumela eka vona, hiloko a tshinya moya lowu nga basangiki a ku: “Wena moya lowu nga basangiki lowu endlaka leswaku n’wana loyi a nga swi koti ku vulavula ni ku twa, ndza ku lerisa leswaku u huma eka yena naswona u nga ha tlheli u nghena eka yena.”+ ²⁶ Hiloko moya lowu wu endla leswaku n’wana loyi a huwelela a tlhela a rhurhumela, ivi wu huma, kutani n’wana a vonaka onge u file, lerova vo tala a va ku: “U file!” ²⁷ Kambe Yesu a n’wi khoma hi voko a n’wi pfuxa, kutani a pfuka. ²⁸ Loko va nghene endlwini va ri voxe, vadyondzisiwa vakwe va n’wi vutisa va ku: “Hikwalaho ka yini hi tsandzekile ku wu hlongola?”+ ²⁹ A ku eka vona: “Muxaka lowu wu nga huma ntsena hi xikhongelo.” ³⁰ Va suka kwalaho va kongoma eGaleliya, kambe a a nga lavi leswaku vanhu va swi tiva. ³¹ Hikuva a a dyondzisa a tlhela a byela vadyondzisiwa vakwe a ku: “N’wana wa munhu u ta xavisiwa a tlhela a dlayiwa,+ kambe hambiloko a dlayiwile, u ta pfuka hi siku ra vunharhu.”+ ³² Hambiswiritano, a va nga swi twisisi leswi a a swi vula naswona a va chava ku n’wi vutisa. ³³ Hiloko va fika eKapernawume. Loko va nghene endlwini, a va vutisa a ku: “A mi holovisa hi yini endleleni?”+ ³⁴ A va n’wi hlamulanga, hikuva a va phikizana hi mhaka ya leswaku i mani lonkulu eka vona. ³⁵ Hiloko a tshama ehansi kutani a vitana lava 12 a ku eka vona: “Loko munhu a lava ku va wo sungula, u fanele a titsongahata eka hinkwavo a tlhela a va tirhela.”+ ³⁶ Kutani a teka n’wana a n’wi yimisa exikarhi ka vona; a n’wi angarha, a ku eka vona: ³⁷ “Loyi a amukelaka n’wana+ wo fana ni loyi hikwalaho ka vito ra mina, wa ndzi amukela na mina; naswona loyi a ndzi amukelaka, a nga amukeli mina ntsena, kambe u amukela ni Loyi a ndzi rhumeke.”+ ³⁸ Yohane a ku eka yena: “Mudyondzisi, hi vone munhu un’wana a hlongola madimona hi vito ra wena naswona hi ringete ku n’wi tshikisa, hikuva a a nga fambi na hina.”+ ³⁹ Kambe Yesu a ku: “Mi nga n’wi siveli, hikuva a nga kona loyi a nga endlaka masingita hi vito ra mina kambe hi ku hatlisa a tlhela a ndzi rhukana. ⁴⁰ Hikuva loyi a nga hi kanetiki u yima na hina.+ ⁴¹ Loyi a mi nyikaka mati leswaku mi nwa hileswi mi nga valandzeri va Kreste,+ ndzi tiyisile ndzi ri eka n’wina, u ta katekisiwa.+ ⁴² Kambe loyi a khunguvanyisaka un’wana wa lava lavatsongo lava nga ni ripfumelo eka mina, nxupulo wakwe wu ta va wukulu lerova swi nga antswa loko o boheleriwa ribye lerikulu ro sila* enhan’wini, kutani a hoxiwa elwandle.+ ⁴³ “Loko voko ra wena ri ku dyohisa,* ri tseme. Swa antswa u kuma vutomi u lamarile ku ri ni ku nghena eGehena,* endzilweni lowu nga ta ka wu nga timiwi u ri ni mavoko mambirhi.+ ⁴⁴ * —— ⁴⁵ Loko nenge wa wena wu ku dyohisa,* wu tseme. Swa antswa u kuma vutomi u ri karhi u khwita ku ri ni ku hoxiwa eGehena*+ u ri ni milenge yimbirhi. ⁴⁶ * —— ⁴⁷ Loko tihlo ra wena ri ku dyohisa,* ri cukumete.+ Swa antswa u nghena eMfun’weni wa Xikwembu u ri ni tihlo rin’we ku ri ni ku hoxiwa eGehena*+ u ri ni matihlo mambirhi, ⁴⁸ laha swivungu swa kona swi nga fiki ni ndzilo wa kona wu nga timiwiki.+ ⁴⁹ “Ndzilo wu fanele wu chuluriwa ehenhla ka vanhu vo fana ni lava, ku fana ni loko munhu a chulula munyu.+ ⁵⁰ Munyu i wunene, kambe loko munyu wu heleriwa hi matimba, xana mi ta wu lunga hi yini ke?+ Lungani ku fana ni munyu+ mi hanyisana hi ku rhula.”+