Yoshua 8:1-35
8 Tsô Yehova kaa a Yoshua ér: “De cie ga shi de gbidi ikyarkyase iyol kpaa ga.+ Za vea nomso mba nôngon ityav cii za ta num sha Ai. Nenge, m na tor u Ai man ior nav man gar na kua tar na cii, sha ikyev you.+
2 Er a Ai man tor na vough, er yange u er a Yeriko man tor na nahan.+ Kpa gema ya nen un ishar shi kura nen uzendenya nav sha ci wen. Ver mbautyaav mbagenev ve yer ken ijime i gar la.”
3 Nahan Yoshua man nomso mba nôngon ityav cii, kôndo za ta num sha Ai. Yoshua tsua mbautyaav mba ageev 30,000 kaa a ve tugh ér ve yem.
4 A kaa a ve ér: “Nenge, yer nen ken ijime i gar ne. De yemen nen ica a gar la kpishi ga, shi ne cii wa nen iyol keghen nen a kegh.
5 Mo man ior mba ve lu vea mo la cii, se za ikyua a gar la, nahan vea duen u tan num sha a vese, er yange ve vande eren nahan la yô,+ se yevese ve se hide ijime.
6 Vea duen u tan ityav sha a vese yô, se er ve ve zenda se ve undu gar ica, sha ci u vea kaa ér, ‘Mba yevese se er yange ve vande eren nahan.’+ Nahan se yevese ve.
7 Maa ne due ape ne yer la, ne ngohol gar la; Yehova Aôndo wen una na un sha ikyev yen.
8 Ne ngohol gar la yô, fese je, nande nen un sha usu.+ Er nen er Yehova a kaa la nahan. Nenge, ka akaa a i gbe u ne er je m ôr ne ne.”
9 Tsô Yoshua kaa a ve ér ve yem, maa ve yem hen ijiir i lu u vea za yer la; ve za haa afo hen atô u Betel man Ai, vegher u shin ityôtar i Ai la, kpa Yoshua gema tsa vea ior tugh mbura.
10 Yoshua nderen pepe pepe yô, a kohol mbautyaav kpishi, maa un man mbatamen mba ken Iserael ve hemen ve gbenda u yemen Ai.
11 Nomso mba nôngon ityav+ mba ve lu a na la cii, ve kôndo ve za hen ishigh ki gar la. Ve haa afo hen imbusutarimese i Ai, pev gema lu hen atô ve man Ai.
12 Hen shighe ne, a tôô nomso 5,000 a za ver ve, ve yer+ hen atô u Betel+ man Ai, vegher u shin ityôtar i gar la.
13 Nahan ior ver afo a vesen la ken imbusutarimese i gar la,+ kpa mbautyaav mba ve yer la yô, gema lu vegher u shin ityôtar i gar la,+ maa Yoshua kar tugh mbura za hen atô u pev* la.
14 Nahan tor u Ai nengen kwagh ne yô, fese je, un man nomso mba ken gar la ve due ayem pepe pepe u za kohol Iserael, nôngon ityav a na hen ijiir igen, i i lu sha ishigh ki desereti u lun gburumaa la. Kpa tor la gema fa er i yer mbautyaav mbagenev ken ijime i gar la sha u ve ta ityav sha a na ga.
15 Nomso mba ken Ai mba va te ityav yô, Yoshua man Iserael cii gba yevese yemen sha gbenda, vegher u zan ken taaikyôngo la.+
16 Maa i kaa a ior mba ve lu ken gar la cii ér ve due ve zenda ve. Nahan mba ngur zendan Yoshua yô, ve undu gar ica.
17 Nomsoor môm u ken Ai man Betel u yange nan due u zendan Iserael ga yô, nan lu ga. Ve undu gar feng, ve yem zendan Iserael.
18 Yehova maa kaa a Yoshua ér: “Gema iwange i u ker sha uwe la hôn vegher u Ai a lu la+ sha ci u me na un sha ikyev you.”+ Tsô Yoshua gema iwange i a kôr sha uwe la, hôn vegher u gar shon lu la.
19 Yoshua dughun uwegh nahan maa, mbautyaav mba ve yer la ve due fese hen ijiir i ve lu la, ve yevese ve za nyôr ken gar la, ve ngohol un. Maa fese je, ve ta usu ve nande gar la.+
20 Nomso mba Ai mba gem ashe ken ijime yô, ve nenge mnyim lu duen ken gar la kôndon sha, nahan ve kera lu a agee a yevese yemen mape ga. Maa ior mba ve lu yevese yemen vegher u ken taaikyôngo la hide cir sha ior mba ve lu zendan ve la.
21 Yoshua man Iserael cii, mba nengen er mbautyaav mba ve yer la ngohol gar la, shi mnyim ma gar shon lu kôndon sha yô, ve hide ve ta num sha nomso mba ken Ai mbara.
22 Shi mbagenev mbara kpa due ken gar va kohol ve, maa ve wa nomso mba Ai atô, Mbaiserael mbagenev lu vegher ne, mbagen lu vegher la. Nahan Mbaiserael wua ve zan zan or môm u waren shin or môm u yevese yemen nan lu ga.+
23 Kpa ve kôr tor u Ai+ uma, ve va a na hen Yoshua.
24 Mbaiserael mba woo ior i Ai ken taaikyôngo, ape ve zenda ve ve yem la, shi mba woo hanmô ve sha sanker cii yô, maa Mbaiserael cii cin hide ken Ai, va wua ior mba ve mase shin ker la sha sanker.
25 Ior mba ve kpe sha iyange la cii, nomso man kasev, lu iorov 12,000, lu ior i Ai cii je la.
26 Yoshua hide a uwegh ku kôr iwange hôn la ga,+ zan zan i kar timin ior mba ve tema ken Ai la cii.+
27 Nahan Mbaiserael kura uzendenya shi ve ya ishar sha akaa a ken gar la sha ci ve, er Yehova ôr a Yoshua nahan.+
28 Maa Yoshua nande Ai shi er un hingir tihi u alôgh+ zan zan nyian.
29 Nahan Yoshua wua tor u Ai, hambe un sha kon zan zan aikighe, maa iyange va ngur miren yô, Yoshua kaa ér i hungwa a ikyom na sha kon kera.+ Mba hongo a í yô, ve za a í ve za ver ape nyôron hen hundagar la, maa ve ta zege tihi u awen sha a na. Tihi u awen la ngu her zan zan nyian.
30 Lu hen shighe ne Yoshua maa Yehova Aôndo u Iserael atse a nan nagh sha Uwo u Ebal ye,+
31 vough er Mose ortom u Yehova yange kaa a Mbaiserael, shi i nger ken takeda u Tindi+ u Mose la nahan, ér: “Er atse sha awen a jimin, a i tsehe a sha iyô ga yô.”+ Lu sha mi ve naan Yehova iniav mbi nanden man iniav mbi bem ye.+
32 Tsô Yoshua hide nger Tindi+ u Mose yange nger sha ishigh ki Mbaiserael la, sha awen shon hen ijiir la.+
33 Iserael cii, man mbatamen nav, man mbahemenev, kua mbaajiriv nav, tile Areki keen man keela, sha ishigh ki upristi mba Levi mba ve tôô areki u ikyuryan u Yehova la. Ushirmbaiorov man ior mba ve lu marnya la lu her.+ Vegher ve u môm tile sha ishigh ki Uwo u Gerishim, vegher ve ugen la di, tile sha ishigh ki Uwo u Ebal+ (vough er Mose ortom u Yehova vande ôron nahan),+ sha u haan ior i Iserael iveren.
34 Mba been yô, Yoshua ôr mkaanem ma i nger ken Tindi la cii,+ averen+ man afan,+ vough er yange i nger ken takeda u Tindi la nahan.
35 Yoshua ôr hanma kwagh u Mose yange kaa ér i er la genger genger, sha ishigh ki nongo u Iserael cii,+ man sha ishigh ki kasev man mbayev man ushirmbaiorov+ mba ve lu* hen atô ve la.+
