Yoshua 5:1-15
5 Ator a Mbaamor cii,+ a a lu vegher u shin ityôtar* i Yordan, man ator a Mbakaanan cii,+ a a lu ikyua a zegemnger la nga ongo er Yehova yange uma mngerem ma Yordan sha ashe a Mbaiserael zan zan ve kar peren been yô, fese je mciem gba ve iyol,+ shi iyol kpe ve vindi vindi sha kwagh u Mbaiserael.+
2 Hen shighe la, Yehova kaa a Yoshua ér: “Er ahô sha awen, nahan tsôngo+ nomso mba ken Iserael sha kwa har.”
3 Tsô Yoshua er ahô sha awen, tsôngo nomso mba ken Iserael hen Gibiati-haraloti.*+
4 Ka ityôkyaa i yange i na ve Yoshua tsôngo ve je ne: Nomsombaiorov mba ve due ken Igipiti, ka ior mba zan ityav* cica cii je la, yange ve kpe ken taaikyôngo shighe u ve due ken Igipiti, ve lu yemen sha gbenda la.+
5 Ior mba ve due ken Igipiti la cii, yange i tsôngo ve, kpa ior mba yange i mar ve ken taaikyôngo, shighe u ve due ken Igipiti ve lu yemen sha gbenda la cii, i tsôngo ve ga.
6 Mbaiserael zende ken taaikyôngo anyom 40+ zan zan ikyurior la cii kpe kera, ka nomso mba nôngon ityav mba ve due ken Igipiti, mba ve venda u ungwan imo i Yehova la je la.+ Yehova yange bum a ve ér, mayange vea nenge a tar+ u Yehova bum a uter vev mba tsev ér una na se la ashe ga,+ ka tar u u mgbough a atumba man iyough la je la.+
7 Nahan ônov vev kar tile sha ityouv vev.+ Lu ônov vev mban Yoshua tsôngo ye; yange ve lu ipyusu sha ci u i tsôngo ve shighe u ve lu yemen sha gbenda la ga.
8 Yange mba tsôngon ikyurior la cii mba been yô, ve lu hen ape ve haa afo la zan zan icôngo ve la kar been.
9 Tsô Yehova kaa a Yoshua ér: “Nyian ne m kar a ihyeen i Igipiti sha a ven cii kera.” Nahan mba yer ijiir la ér Gilgal*+ zan zan nyian.
10 Mbaiserael za hemen u lun hen Gilgal ape ve haa afo la, shi ve ya Paseka ken uwer la ayange 14+ aikighe, hen taaikyôngo u Yeriko.
11 Mba ye Paseka kera yô, kpernan ve hii u yan iyiav mbi ken tar la, ve ya beredi u i we kwa sha mi ga la,+ man samuyia u mgbaghen sha iyange shon.
12 Mba hiin u yan iyiav mbi ken tar la yô, kpernan mana de u haan; Mbaiserael kera zua a mana ga,+ kpa ve gema ve hii u yan iyiav mbi ken tar u Kaanan la ken inyom shon.+
13 Shighe u Yoshua lu ikyua a Yeriko la, a kende ashe sha, maa a nenge a or+ tile un sha ishi, a sanker ken uwe.+ Nahan Yoshua kporom pine un ér: “U ngu ken vegher wase shinii, u ngu ken vegher u mbahyomov aseva?”
14 Tsô a kaa ér: “Ei, mo m ngu orhemen u ikyumutya i Yehova.”+ Yoshua ongo nahan yô, gure wa ityough inya sha u nan un icivir, a pine un ér: “Ka nyi terem a lu a mi u ôron ortom naa?”
15 Tsô orhemen u ikyumutya i Yehova la kaa a Yoshua ér: “Tsua akôv a ou shin angahar kera, sha ci u ijiir i u til her ne ka icighanjiir.” Maa fese je Yoshua er nahan.+
